11

Ẹsasa Gbe Oma-Iroro

Eme o gwọlọ nọ who re ru?

T’ẹme evaọ edhere nọ o re dhesẹ ọwhọ-eva nọ who wo gbe onọ o rọwo kugbe ẹme nọ whọ be ta na.

FIKIEME U JE WUZOU?

O r’oja otẹrọnọ whọ rẹ nyate idu enọ whọ be t’ẹme kẹ na.

ỌWHỌ-EVA yọ abọ ologbo ọrọ uzuazọ ohwo-akpọ. Ohwo o te dhesẹ ọwhọ-eva riẹ, o bi dhesẹ oware nọ o rọ udu riẹ, oghẹrẹ ohwo nọ ọ rọ evaọ obeva, oghẹrẹ nọ o bi roro kpahe iyero gbe ahwo. Fiki ebẹbẹ nọ e rọ izuazọ rai—yọ evaọ ẹsejọ fiki ikpomahọ iruemu-ẹwho—ahwo buobu a rẹ ko ọwhọ rai dhere. Rekọ Jihova ọ tuduhọ omai awọ re ma bọ emamọ ekwakwa họ ohwo obeva na re ma je dhesẹ oware nọ o rọ eva mai via.—Rom 12:10; 1 Tẹs. 2:7, 8.

Evaọ okenọ ma tẹ t’ẹme, eme nọ ma ta e sai dhesẹ ọwhọ-eva gbagba. Rekọ ma gbẹ rọ oma-iroro nọ u fo lele ẹme na ha, ahwo nọ a yo eme mai a rẹ vro oruọzewọ mai. Evaọ abọdekọ riẹ, ma tẹ rọ emamọ ẹsasa iroro ta eme na, ẹmeunu mai ọ sai wo erru gbe awere nọ i re duobọte udu enọ e be gaviezọ na.

Edhesẹ Ẹsasa. Iroro esasa i w’obọ kpahe iroro nọ ma re wo kpahe ahwo. Fikiere, evaọ okenọ ma tẹ be t’ẹme kpahe ekwakwa isiuru Jihova gbe okenọ ma te bi dhesẹ ovuhumuo mai kẹ ewoma Jihova, uvo mai o rẹ jọ sasasa. (Aiz. 63:7-9) Yọ okenọ whọ be t’ẹme kẹ ibe ahwo-akpọ, u fo re ona ẹmeọta mai u dhesẹ ẹsasa nọ o re siuru re.

Ọmoti jọ ọ nyabru Jesu ze ọ tẹ lẹe re o siwi ei. Dai roro oghẹrẹ uvo nọ Jesu ọ rọ t’ẹme evaọ okenọ ọ ta nọ: “O ruọ omẹ, a ru owhẹ fo.” (Mak 1:40, 41) Je roro kpahe ughe na evaọ okenọ aye jọ nọ o hwẹ azẹ evaọ ikpe 12 ọ lẹlẹ no emu Jesu ze ọ jẹ kaobọ te ẹroro ewu riẹ. Nọ ọ ruẹ nọ a mu rie, aye na ọ tẹ nya lahwe bi nuhu, kie fihọ otọ awọ Jesu, ọ tẹ jọ iraro ahwo kpobi feva oware nọ ọ jẹ kaobọ te ewu riẹ gbe epanọ ẹyao riẹ o ro kpo no. Dai roro edhere nọ Jesu ọ rọ ta kẹe nọ: “Ọmọtẹ, [ẹrọwọ] ra o si owhẹ no; nyawa tou.” (Luk 8:42b-48) Ẹsasa nọ Jesu o dhesẹ evaọ eria nana o duobọte idu mai rite inẹnẹ.

Wọhọ Jesu, okenọ ma te wo ohrọoriọ kẹ ahwo yọ ma tẹ ghinẹ gwọlọ fiobọhọ kẹ ae, u re dhesẹ oma via evaọ edhere nọ ma rẹ rọ t’ẹme kẹ ae. Edhesẹ ẹsasa otiọye na o rẹ jọ orọ oruọzewọ, orọnikọ o rẹ vrẹta ha. Ẹsasa mai o re fi ohẹriẹ ulogbo họ oghẹrẹ nọ ahwo a te j’owọ. Eme buobu nọ ma rẹ jọ usiuwoma ta e rẹ jọ wowolẹ, maero evaọ okenọ ma tẹ be jiroro, tuduhọ, kẹ ohrẹ, je bi weri kẹ amọfa.

Who te wo iroro nọ e rọ sasasa kẹ amọfa, dhesẹ iẹe evaọ ovao ra. Okenọ who te dhesẹ ẹsasa, ogbotu ra o re bigba owhẹ wọhọ epanọ a re bigba errae evaọ aso ekpahe. Ovao ra o gbẹ sasa ha, u ti mu ogbotu ra ẹro ho inọ who ghine wo ọdawẹ kẹ ae. A rẹ sae whẹ ẹsasa họ ovao ho—u re no obeva ze.

Ẹsasa o re je dhesẹ oma via evaọ uvo ra. Who te wo uvo ohahara, o rẹ sae jọ bẹbẹ re who dhesẹ ẹsasa evaọ ẹmeọta ra. Rekọ nọ oke o be nyaharo na jegbe avọ omodawọ, whọ te sai ru ei. Oware jọ nọ o rẹ sai fiobọhọ họ whọ rẹ kareghẹhọ nnọ ẹme nọ a rẹ ta jẹhọ o re ru ẹme do yoyoma. Wuhrẹ epanọ a re ro si edo ọlọlọhọ nọ ọ rrọ ibiẹme. Onana u ti fiobọhọ fi ẹsasa họ ẹme ra.

Rekọ oware jọ nọ o mai wuzou họ oria nọ isiuru ra e rrọ. Otẹrọnọ who bi roro kpahe ahwo nọ whọ be t’ẹme kẹ ziezi yọ who wo isiuru egaga re whọ t’ẹme nọ ọ rẹ kẹ ae erere, iroro yena i re dhesẹ oma via evaọ edhere nọ whọ rẹ t’ẹme.

Ẹme nọ a rẹ ta avọ ọwhọ ọ rẹ jaja oma, rekọ o gwọlọ oma-iroro iwowolẹ re. Iroro na nọ ma rẹ ta kurẹriẹ ọvo u te he, ma re duobọte udu na re.

Edhesẹ Oma-Iroro Efa. Ohwo nọ ọ rọ uye ọ rẹ sai dhesẹ ọwhọ-eva wọhọ awaọruọ, ozodhẹ, gbe ọkora. Oghọghọ yọ ọwhọ-eva nọ u fo nọ o rẹ da izuazọ mai fia gbe onọ ma re dhesẹ ẹsikpobi nọ ma tẹ be t’ẹme kugbe amọfa. Evaọ abọdekọ riẹ, u fo re a kpọ oghẹrẹ ọwhọ-eva jọ. I kiehọ uruemu Oleleikristi hi. (Ẹf. 4:31, 32; Fil. 4:4) Ma rẹ rọ eme nọ ma salọ, edo uvo mai, ẹgba nọ ma rọ t’ẹme, enwene ovao mai, gbe omarọtẹme mai dhesẹ ọwhọ-eva kpobi via.

Ebaibol na ọ niyẹrẹ kpahe oghoghẹrẹ ọwhọ-eva ohwo-akpọ. Ẹsejọ o rẹ fodẹ oghẹrẹ ọwhọ-eva na ọvo. Eva okiofa, o rẹ fodẹ oke hayo wariẹ eme nọ i dhesẹ ọwhọ-eva. Okenọ who te bi se oghẹrẹ eria eyena do via, u re duobọte ohwo viere, duobọte owhẹ gbe enọ e be gaviezọ, otẹrọnọ uvo ra u dhesẹ ọwhọ-eva ọyena. Re who ru ere u fo re who fi oma ra họ ẹta ahwo nọ who bi se kpahe na. Rekọ ẹme ọ wọhọ aruọza ha, fikiere yọroma re ọwhọ ra o wo umuo. Ru re eria eyena e jọ vevẹ evaọ iroro enọ e be gaviezọ na.

Onọ U re Kiehọ Ẹme Na. Wọhọ epaọ ajọwha, ẹsasa nọ who re fihọ ẹme ra gbe ọwhọ-eva efa nọ who bi dhesẹ e rẹ roma hwa oghẹrẹ ẹme nọ whọ be ta.

Rovie kpohọ Matiu 11:28-30 re who muẹrohọ eme nọ ọ ta. Who ve je se obrukpe Jesu kpahe ikere-ebe gbe otu Farisi na, wọhọ epanọ a kere fihọ Matiu uzou avọ 23 na. Ma riẹ nọ o fioma h’otọ t’ẹme na ha.

Oghẹrẹ oma-iroro vẹ who roro nọ ikuigbe nọ e rọ Emuhọ uzou avọ 44 na o gwọlọ, onọ o ta kpahe olẹ nọ Juda ọ lẹ fiki oniọvo riẹ Bẹnjamin? Muẹrohọ ọwhọ-eva nọ a jọ owọ avọ 13 dhesẹ, oware nọ Juda o roro nọ o wha okpẹtu na ze evaọ owọ avọ 16, gbe owọ nọ Josẹf omariẹ ọ jẹ, wọhọ epanọ a ta eva Emuhọ 45:1.

Fikiere, makọ ma bi se hayo ma be t’ẹme, re ma riẹ oyena ru ziezi ma re roro kpahe, orọnikọ eme gbe ẹjiroro ẹme na ọvo ho, rekọ jẹ kpahe oma-iroro nọ i re lele enana.

EPANỌ A RE RO DHESẸ IẸE

Ukpenọ whọ rẹ ruawa hrọ kpahe eme nọ whọ be te ta, tẹrovi isiuru ra nọ who re ro fiobọhọ kẹ enọ e be gaviezọ k’owhẹ.

Te edo uvo ra gbe enwene ovao ra u re dhesẹ ọwhọ-eva nọ o fo ẹme ra.

Wuhrẹ ẹkwoma ẹromuhọ amọfa nọ a rẹ t’ẹme ziezi.

ORIA IRUO: Se eria Ikereakere enana do via, rọ oghẹrẹ oma-iroro nọ u fo oria na sei: Matiu 20:29-34; Luk 15:11-32.