Uwuhrẹ 10

Ajọwha

Eme o gwọlọ nọ who re ru?

Ẹkwoma ẹmeọta ọjaja ra, kẹ imuẹro ọwhọ ọgaga nọ who wo kpahe erere ẹme nọ whọ be ta na.

FIKIEME U JE WUZOU?

Ajọwha ra o re fiobọhọ kru isiuru enọ e be gaviezọ k’owhẹ; o rẹ sae jẹ kẹ ae ọwhọ re a j’owọ. Who te wo ajọwha kpahe ẹme nọ whọ be ta, ogbotu ra o re wo ajọwha re.

AJỌWHA o re fiobọhọ ru ẹme jọ jajaja. Dedenọ o rọ ziezi re a ru ẹme nọ ọ rẹ kẹ uwuhrẹ na, ẹmeọta ọjaja, ọrọ ajọwha họ ọnọ o re si iroro ogbotu na. Makọ oria nọ who no ze hayo oghẹrẹ ohwo nọ whọ rrọ kpobi, whọ rẹ sai wuhrẹ ajọwha.

T’Ẹme avọ Oma-Iroro. Okenọ ọ jẹ t’ẹme kẹ aye obọ Sameria jọ, Jesu ọ ta nọ enọ e rẹ gọ Jihova a rẹ rọ “ẹzi gbe uzẹme” gọe hrọ. (Jọn 4:24) Idu ovuhumuo e rẹ wọ egagọ rai, egagọ rai e vẹ jẹ rọwokugbe uzẹme nọ o rọ Ẹme Ọghẹnẹ. Okenọ ohwo o te wo ovuhumuo odidi ọyena, u re dhesẹ oma via evaọ edhere nọ ọ rẹ t’ẹme. Oma o rẹ wọe re ọ t’ẹme kẹ amọfa kpahe eruẹrẹfihotọ iyoyou Jihova. Eriwo ovao riẹ, omarọtẹme riẹ, gbe uvo riẹ i re dhesẹ epanọ ẹme na ọ riẹe oma.

Kọ eme ọ rẹ sae so iẹe ze nọ, oruẹme nọ o you Jihova jẹ rọwo oware nọ ọ be ta na ọ jẹ kare ajọwha evaọ okenọ ọ be t’ẹme? Oma nọ ọ rẹ ruẹrẹ kpahe kẹ ẹme nọ ọ be te ta na ọvo u te he. Uzoẹme riẹ na o rẹ daruọ iẹe oma riẹriẹriẹ, o re fi iroro riẹ kpobi họ iẹe. Dae rehọ iẹe nọ a kẹ riẹ ẹme re ọ ta kpahe idhe ẹtanigbo Jesu Kristi. Okenọ oruẹme na o bi ti ru ẹme riẹ, orọnikọ eme na ọvo e rẹ jọ uzou riẹ hẹ rekọ ovuhumuo ọrọ oware nọ idhe Jesu i dhesẹ kẹ oruẹme na omariẹ gbe ogbotu riẹ. U fo re o dhesẹ iroro uyere nọ o wo kẹ Jihova Ọghẹnẹ gbe Jesu Kristi fiki ọruẹrẹfihotọ ogbunu nana via. U re fo re o roro kpahe ẹruore ogbunu ọrọ uzuazọ nọ onana u ru lọhọ kẹ ahwo-akpọ na—evawere ebẹdẹ bẹdẹ evaọ omokpokpọ ogbagba evaọ aparadase otọakpọ nọ a zihe ze no! Fikiere u re fo re o fi udu riẹ họ iẹe.

Rọ kpahe Ẹzra okere-obe na, owuhrẹ evaọ Izrẹl, Ebaibol na e ta inọ “ọ rehọ udu riẹ kpobi rọ kẹ ewuhrẹ uzi ỌNOWO na, re o je koko iei, re o je wuhrẹ [iẹe evaọ] Izrẹl.” (Ẹzra 7:10) Ma te ru epọvo na—ruẹrẹ idu mai họ orọnikọ ẹme mai ọvo ho—ma te t’ẹme no udu ze. Ẹme uzẹme otiọye nọ o no udu ze o sai fiobọhọ gaga kẹ enọ ma be t’ẹme kẹ re a wo uvi uyoyou kẹ uzẹme na.

Roro Kpahe Ogbotu Ra. Oware ofa nọ u wuzou evaọ edhesẹ ajọwha họ ewo imuẹro inọ u fo re ogbotu ra o yo ẹme nọ whọ gwọlọ ta na. Onana u dhesẹ nọ okenọ whọ tẹ be ruẹrẹ ẹme ra họ, orọnikọ who re koko emamọ eme họ ọvo ho rekọ whọ rẹ jẹ lẹ se Jihova kẹ ọkpọvio riẹ re whọ rehọ iẹe ro ruiruo kẹ erere enọ whọ be te t’ẹme kẹ na. (Ol. 32:8; Mat. 7:7, 8) Kiẹ oware nọ u je fo nọ ogbotu ra o re yo ovuẹ na, epanọ o te rọ kẹ ae erere, gbe epanọ whọ rẹ rọ tae evaọ edhere nọ a re ro wo ovuhumuo kẹ aghare riẹ.

Ruẹrẹ ẹme ra bẹsenọ whọ rẹ jariẹe ruẹ oware jọ nọ o rẹ k’owhẹ ọwhọ. U du gwọlọ nọ o rẹ nwane jọ oware okpokpọ họ, rekọ whọ sae rehọ edhere ọkpokpọ rọ tae. Whọ tẹ ruẹrẹ oware jọ họ nọ u re ghine fiobọhọ kẹ ogbotu ra bọ usu rai ga kugbe Jihova, re a wo ovuhumuo kẹ eruẹrẹfihotọ riẹ, re a thihakọ otunyẹ uyerakpọ anwae nana avọ obokparọ, hayo re a sae kparobọ evaọ odibọgba rai, koyehọ who wo ẹjiroro kpobi nọ who re ro wo ajọwha evaọ ẹme ra.

Kọ ẹvẹ otẹrọnọ ẹme ra yọ orọ isase evaọ ẹgbede? Re whọ sai ru oyena avọ ajọwha, o gwọlọ vi eme na nọ who re se gbagba jẹ jẹ ai họ kugbe ohwohwo ọvo. Wuhrẹ oria na. Otẹrọnọ who bi ti se oria Ebaibol jọ, ru ekiakiẹ jọ kpahe iẹe. Jọ u mu owhẹ ẹro nọ who wo ugogo otofa riẹ. Roro kpahe epanọ o rọ rrọ erere k’owhẹ jẹ rọkẹ ogbotu ra, je sei avọ isiuru nọ who re ro kpeze erere ọyena se enọ e be gaviezọ k’owhẹ na.

Kọ whọ be ruẹrẹ oma kpahe kẹ usiuwoma ota? Kiẹ uzoẹme ra gbe ikereakere nọ who bi ti se na riwi. Je roro kpahe oware nọ o rọ iroro ahwo na. Didi usi o r’otọ kẹlena? Didi ebẹbẹ a be nyaku? Whọ tẹ ruẹrẹ oma kpahe re who dhesẹ kẹ ahwo na inọ Ẹme Ọghẹnẹ o wo ifue kẹ uzedhe ebẹbẹ nọ e be kẹ ae idhọvẹ na, who ti wo ọwhọ re whọ t’ẹme na, ajọwha ọ vẹ te romavia.

Dhesẹ Ajọwha Ẹkwoma Ẹme Ọjaja. Ajọwha ọ rẹ mai dhesẹ oma via evaọ ẹme ọjaja. Onana u re dhesẹ oma via evaọ eriwo ovao ra. Whọ rẹ t’ẹme na avọ imuẹro, orọnọ avọ ọgbahọ họ.

O gwọlọ owowa. Oma o rẹ sai mu ahwo jọ kpahe oware kpobi. U re fo re a fiobọhọ kẹ ai vuhumu nnọ ohwo o te bi fu uke, ogbotu riẹ o re roro kpahe iẹe viukpọ ovuẹ na. Evaọ abọdekọ riẹ, ahwo nọ a rẹ dhomovuọ a gwọlọ uduotahawọ re a t’ẹme no unu ze ziezi viere.

Ajọwha ọ rẹ whaliẹ. Whọ tẹ be r’ovao dhe ogbotu ra ziezi je wo ajọwha kpahe ẹme ra, ajọwha ra o re vo ruọ ogbotu ra. Apọlọs o dhesẹ ajọwha evaọ ẹmeọta riẹ, yọ a dhesẹ i rie wọhọ ọnọ unu riẹ u muẹme. Ẹzi Ọghẹnẹ ọ tẹ rọ owhẹ oma jajaja, ẹme ọwhọ ra ọ te wọ enọ e be gaviezọ k’owhẹ re a j’owọ.—Iruẹru 18:24, 25; Rom 12:11.

Ajọwha nọ O Kiehọ Ẹme Na. Yọroma re ajọwha ọ siọ ẹme ra ba ẹdafia nọ oma o rẹ rọ lọhọ ogbotu ra no. Ohrẹ kpobi nọ whọ kẹ re a ro ruiruo u re mu ai ezọ họ efi vrẹ. Onana u fiẹgba họ ẹgwọlọ nọ ma rẹ rọ ruẹrẹ ẹme nọ o re do oghoghẹrẹ họ. Daoma re whọ whaha ekiero ẹmeọta nọ ọ kare isiuru. Whọ tẹ riẹ eme ra salọ, who ti wo isiuru kpahe iẹe gaga. Rekọ eme jọ e rẹ gwọlọ ajọwha vi efa, yọ whọ sae gua enana kugbe evaọ ẹme ra.

A rẹ rọ ajọwha ta igogo eme na. U re te oria nọ owọ ẹme na o rrọ. Nọ enana e rọ eme nọ i w’uzou evaọ ẹme ra na, e rẹ jọ eme nọ e rẹ kẹ ogbotu ra ọwhọ. Nọ whọ tẹ t’ẹme na muọ ogbotu ra ẹro no, u fo re who duobọte ai, re who dhesẹ irere efihiruo ẹme nọ whọ ta no na kẹ ae. Ajọwha ra o ti fiobọhọ k’owhẹ nyate idu enọ e be gaviezọ k’owhẹ. A re mu t’ẹme avọ ẹgba ha. Oware jọ o rẹ whae ze, yọ ẹme ra o ti dhesẹ eria eyena k’owhẹ.

EPANỌ A RE RO WOI

Whọ rẹ ruẹrẹ udu ra họ orọnikọ eme nọ whọ te ta na ọvo ho; koyehọ ẹme na ọ rẹ dhẹ ruọ owhẹ oma.

Roro ziezi kpahe oghẹrẹ nọ ẹme nọ whọ be te ta na ọ te rọ kẹ enọ whọ be tae kẹ na erere.

Muẹrohọ eria nọ e gwọlọ ajọwha obọdẹ.

T’ẹme na jajaja. Jọ u mu owhẹ ẹro nọ ovao ra u dhesẹ epanọ ẹme na ọ rọ owhẹ oma. T’ẹme avọ ẹgba gbe ẹzẹ.

ORIA IRUO: Kiẹ Joshua uzou 1 gbe ọrọ avọ 2 riwi, jiroro oria gbe oghẹrẹ nọ a re jo dhesẹ ajọwha nọ who bi ti se oria nana. Wuhrẹ epanọ who re ro sei do via avọ ajọwha nọ o fo.