Uwuhrẹ 14

Ẹkoma Ẹmeọta Ohwo

Eme o gwọlọ nọ who re ru?

Dhoma mu—ẹjọ epaọ ẹsenọ who bi lele ohwo gbiku, avọ oruọzewọ, seba ẹfakiru.

FIKIEME U JE WUZOU?

Who te bi nuhu, be yọrọ oma hrọ, hayo jọ kpakre kpakre evaọ ẹmeọta ra fikinọ whọ be ruawa hrọ kpahe oghẹrẹ nọ amọfa a bi rri owhẹ, iroro amọfa e rẹ sai no ẹme nọ whọ be ta na.

ẸKOMA ra nọ whọ rẹ rọ t’ẹme u re fiobọhọ k’owhẹ wo evaifihọ amọfa. Kọ who re fieva họ ẹme nọ ohwo nọ ọ rọ oware ruru ovao riẹ ọ ta? Kọ o rẹ mae k’owhẹ evaifihọ otẹrọnọ oware nọ o ro ruru ovao na u woma vi uzedhe ovao riẹ? Vievie. Fikiere ukpenọ who re nwene kpohọ oghẹrẹ nọ whọ rrọ họ, jọ ẹkoma ra.

A re rri ẹmeọta ẹkoma ohwo wọhọ ẹmeọta eveve he. Ẹme nọ a ta gba ha, ẹme nọ a re se thọthọ, gbe eme nọ a rẹ ta họ akọ i fo ho. A rẹ jẹ whaha ẹta eme nọ i kie ze. Ma gwọlọ dhesẹ ọghọ ẹsikpobi, evaọ ẹmeunu gbe uruemu mai. Ohwo nọ ọ rẹ rọ ẹkoma riẹ t’ẹme ọ rẹ gwọlọ dhesẹ oma k’amọfa ha.

Evaọ Iruo Odibọgba Na. Evaọ okenọ whọ tẹ nya kẹle uwou jọ hayo nyabru ohwo jọ evaọ oria ẹgbede re who se isẹri, kọ udu u re bru owhẹ? Udu u re bru ibuobu mai, rekọ udu u re bru ejọ vi efa. Awa-ọruọ ọ sae lẹliẹ uvo na do yaya, tube nuhu, hayo a sae ruẹ enuho evaọ abọ gbe uzou nọ ohwo o re nuhu thọthọ.

Owhowho-uvie ọ sai kieruọ ẹbẹbẹ nana fiki ẹjiroro sa-sa. Ẹsejọhọ o bi roro kpahe oghẹrẹ nọ ahwo a ti rri rie hayo o bi roro sọ ọ te riẹ ẹme na ta. Oware ovuovo o jọ enana thọ họ, rekọ ebẹbẹ e rẹ roma via nọ ohwo o te roro kpahe eware itieye na ga hrọ. Otẹrọnọ who re nuhu re who te ti muọ usiuwoma họ ẹta, eme ọ rẹ sai fiobọhọ? Emamọ omaruẹrẹhọ gbe olẹ nọ u n’evaze ro se Jihova. (Iruẹru 4:29) Roro kpahe ohrọ ulogbo Jihova nọ o ro zizie ahwo re a te reawere omokpokpọ ogbagba gbe uzuazọ ebẹdẹ bẹdẹ evaọ Aparadase. Roro kpahe ahwo nọ whọ be daoma fiobọhọ kẹ na gbe ẹgwọlọ rai re a yo emamọ usi na.

Jẹ kareghẹhọ nọ ahwo a wo ufuoma iroro-ejẹ, fikiere a rẹ sae jẹ ovuẹ na rehọ hayo se iẹe. Epọvo na o jọ evaọ okenọ Jesu o se isẹri evaọ Izrẹl anwae. Iruo ra kpobi họ re whọ ta usiuwoma na. (Mat. 24:14) Ahwo a gbẹ make j’owhẹ t’ẹme he, ẹnya ra ọvo o re se isẹri. Whọ kparobọ no keme whọ kẹ Jihova uvẹ re ọ rehọ owhẹ ru oreva riẹ gba. Evaọ etoke nọ who ro wo uvẹ re whọ t’ẹme na, oghẹrẹ vẹ whọ te t’ẹme na? Who te wuhrẹ re whọ tẹrovi ẹgwọlọ amọfa, ẹme ra o ti siuru jẹ jọ ẹkoma ẹmeọta ra.

Who te bi se isẹri, whọ tẹ j’owọ jẹ t’ẹme wọhọ epanọ who re ru kẹdẹ kẹdẹ, onana o te lẹliẹ udu kie ọnọ ọ be kezọ k’owhẹ na vi. A te tubẹ gaviezọ kẹ eme Ikereakere nọ whọ be ghale kugbe ai na viere dede. Ukpenọ whọ rẹ kẹ ae ovuẹ, ru ei epaọ ẹsenọ who bi lele ai gbiku. Jọ whẹtiẹwhẹtiẹ. Dhesẹ isiuru kẹ ae, je dede ọkpahefihọ rai rehọ. Dede na, oria nọ izi ẹvẹrẹ hayo erọ okegbe na e jọ gwọlọ uruemu jọ nọ a re dhesẹ evaọ okenọ whọ tẹ be t’ẹme kẹ erara, who re koko enana. Rekọ unu ra o rẹ jọ ohwohwẹ ẹsikpobi.

Evaọ Eplatfọmo Na. Whọ tẹ be t’ẹme kẹ ẹko ahwo, ẹme na nọ whọ rẹ ta evaọ ẹkoma ẹmeọta ra, epaọ ẹsenọ wha bi gbiku o rẹ mai woma. Dede na, okenọ ahwo na a tẹ rrọ buobu, whọ rẹ kpare uvo ra kpehru viere. Otẹrọnọ who fi eme ra họ uzou hayo otẹrọnọ eme nọ who kere fihọ obe i bu hrọ, koyehọ whọ be ruawa hrọ kpahe eme nọ whọ te ta evaọ ẹme ra na. U fo re a ta eme nọ i kiehọ, rekọ whọ tẹ roma kẹ onana hrọ, ẹme ra ọ rẹ jọ dokpodokpo. O gbẹ jọ ẹkoma ẹmeọta ra ha. Who re roro kpahe oghẹrẹ eme nọ e rẹ rehọ ẹjiroro ẹme na via oke krẹkri tao, rekọ mai roro kpahe ẹjiroro ẹme na, orọnikọ ibieme ẹme na ha.

Epọvo na o rọ re evaọ okenọ a tẹ be kiẹ owhẹ riwi eva ewuhrẹ. Ruẹrẹ oma kpahe ziezi, rekọ who se hayo fi iyo ra họ uzou hu. Ta ẹme na epanọ whọ rẹ ta vẹre re ẹme ra o siuru.

Makọ ekwakwa ẹmeọta isiuru dede, nọ a te fi ẹgba họ ae ga hrọ, o rẹ lẹliẹ ogbotu na riẹ nọ yọ ẹkoma ẹmeọta ra ha. Wọhọ oriruo, u fo re whọ t’ẹme vẹ who ve je se eme liọ rekọ who re fiẹgba họ se ai te epanọ ẹme ra o re ro do dokpodokpo ho. Omarọtẹme ẹgba-ofihọ hayo orọ edhesẹ, a tẹ rehọ ae ro ruiruo ziezi, e rẹ sae lẹliẹ ẹme ra jọ jajaja, rekọ omarọtẹme nọ a jọ yọrọ oma hrọ hayo onọ a ru vrẹta u re si iroro no ẹme nọ whọ be ta no. T’ẹme na do ziezi, rekọ whọ va ha. U re woma ẹsejọ re who fi ajọwha họ ẹme ra, rekọ orọnikọ who re fu uke he. Whọ rehọ enwene edo-uvo, ajọwha, gbe ẹsasa ruiruo evaọ edhere nọ o re si ẹjiroro bru omobọ ra hayo tu ogbotu ra oma ha.

Ahwo jọ a wo oghẹrẹ ovo jọ nọ a rẹ t’ẹme, makọ evaọ oke nọ a be kẹ ovuẹ hẹ. Oghẹrẹ ẹmeọta amọfa o re do wọhọ ẹsenọ a bi gbiku gheghe. Oware nọ u wuzou họ re ma riẹ ẹme ta kẹdẹ kẹdẹ re ma je dhesẹ uruemu ọghọ Oleleikristi. Kẹsena whọ tẹ rọ eplatfọmo, o vẹ mae lọhọ owhẹ obọ re whọ t’ẹme je dhesẹ uruemu isiuru nọ o rọ ẹkoma mai.

Okenọ Whọ tẹ Be Jọ Ẹgbede Se. Re who ru isase ẹgbede avọ ẹkoma ra o gwọlọ omodawọ. Re whọ sae ru ei, vuhu igogo ẹjiroro oria nọ who bi ti se na ziezi, je muẹrohọ oghẹrẹ nọ a rọ tae. Wo enana fihọ iroro ziezi; ogbẹrọ ere he, kọ eme na ọvo who bi ti mu se. Kiẹ kpahe oseliọ eme nọ whọ riẹ hẹ. Wuhrẹ ese do via jẹ gua eme kugbe ziezi evaọ edhere nọ o re ru ẹme na vẹ. Dhei erueru bẹsenọ isase na e rẹ jọ owhẹ unu whrae. Daoma riẹ oria isase na ziezi re okenọ who bi ti se do via na, isase ra i ve do wọhọ ẹmeọta-kugbe ajọwha. Oyena họ ẹmeọta ẹkoma ohwo.

Uzẹme, isase ẹgbede mai buobu i re no ebe mai nọ a kporo no Ebaibol ze. U te no ẹme ọ isase evaọ Isukulu Odibọgba Esuo-Ọghẹnẹ na no, ma re se ikereakere evaọ usiuwoma ota gbe okenọ ma bi ru ẹme evaọ eplatfọmo na. A rẹ kẹ inievo iruo re a se oria nọ ma bi wuhrẹ evaọ Uwuhrẹ Uwou-Eroro na gbe eva Uwuhrẹ Obe Ukoko. A rẹ kẹ inievo-emezae jọ nọ i te ziezi ẹme re a se eme nọ a kere via kẹ ogbotu evaọ ikokohọ. Makọ who bi se Ebaibol na hayo ebe efa, se eria nọ i wo eme nọ amọfa a ta wọhọ ẹsenọ ahwo na ọvo a be t’eme na. Otẹrọnọ eme nọ ahwo sa-sa a ta a jọ oria na wariẹ, dina nwene uvo ra kẹ onọ who te kpobi. Ẹme unuovẹvẹ: Whọ nwani ru ei thomawa ha, rekọ fi awere họ isase na evaọ edhere ẹkoma ẹmeọta ra.

Isase nọ e rọ ẹkoma ohwo o rẹ wọhọ ẹsenọ imava i bi gbiku. U re do wọhọ ẹsenọ a be raro kele ohwo jọ họ rekọ u re wo imuẹro.

EPANỌ A RE RO RU EI

T’ẹme wọhọ epanọ whọ rẹ t’ẹme kẹdẹ kẹdẹ. Who fi iroro họ omobọ ra ha, rekọ fi iroro họ Jihova gbe ẹgwọlọ nọ ahwo a re ro wuhrẹ kpahe iẹe.

Whọ tẹ be ruẹrẹ oma họ kẹ ẹme, tẹrovi ẹjiroro ẹme na, orọnikọ ibiẹme na ha.

Okenọ who te bi ru ẹme jegbe okenọ whọ be t’ẹme kẹdẹ kẹdẹ, whaha uruemu ẹmeọta epanọ-uje gbe eroruiruo ekwakwa ẹmeọta evaọ edhere nọ u re si iroro bru omobọ ra.

Ruẹrẹ oma kpahe ziezi kẹ isase ẹgbede. Se avọ oma osasa gbe ovuhumuo ovevẹ ọrọ otofa eme na.

ORIA IRUO: (1) Se Malakae 1:2-14 ababọ ese do via, re who muẹrohọ ahwo nọ a be t’ẹme na. Kẹsena who ve sei do via avọ ẹliọliọ eme na. (2) Evaọ isiasa sa-sa, taure who te ti kpohọ usiuwoma ota, se idhe-ẹme ivẹ ọsosuọ uwuhrẹ nana gbe eme nọ e rọ otọ uzoẹme-osese na “Evaọ Iruo Odibọgba Na,” evaọ ẹwẹ-obe avọ 128. Daoma re who fi ohrẹ na h’iruo.