Ẹkpẹti Onọ

◼ Eme a re wo họ iroro kpahe isase edhe-eme evaọ obọ iwuhrẹ na?

A rẹ rehọ abọ ologbo ọrọ oke nọ a fihọ kẹ Uwuhrẹ Uwou-Eroro na gbe Uwuhrẹ Obe Ukoko na ro se edhe-eme na. Onana u dhesẹ nọ ọnọ a riobọhọ wọhọ osisase na o wo owha-iruo ogbẹgbẹdẹ wọhọ owuhrẹ. O re se eva edhere nọ u re ‘fi otofa’ họ eme na, re enọ e be gaviezọ a wo otoriẹ riẹ je wo ọwhọ iruo na. (Neh. 8:8) Fikiere, o gwọlọ nọ ọnọ o bi se na ọ ruẹrẹ oma kpahe ziezi kẹ iruo isase riẹ. (1 Tim. 4:13; rri uzou avọ 6 ọrọ obe ọ School Guidebook na.) Eware jọ nọ i w’uzou kẹ isase ogbotu ena.

Se Avọ Ẹgba nọ A Re Fihọ Ẹme nọ O w’Uzou: Kake jọ obọ uwou muẹrohọ eme hayo uhie-eme nọ e gwọlọ nọ a re fiẹgba họ re e sae wha otoriẹ ogbagba ze.

Se Eme na Gbagba: Ese gbagba eme gbe ehwekugbe ovevẹ eme e rọ oja otẹrọnọ ogbotu na a re w’otoriẹ eme obe na. Jọ eva obe-ofeme rri eme nọ whọ riẹ hẹ hayo nọ a re dhe ekekere he, hayo gaviezọ kẹ ekasẹte Ukoko-Ulogbo.

T’Ẹme Do Via Avọ Ajọwha: Ẹme nọ a ta do via avọ ajọwha ọ rẹ wha isiuru ze, ọ rẹ kpare ọwhọ-eva, jẹ kpakpa enọ e be k’ezọ na oma.

Jọ Ruọruọruọ Avọ Oma ọ Ẹmeọta-Kugbe: Re a t’ẹme malẹ o rẹ gwọlọ nọ a re se ẹme na gbiae. Avọ oma oruẹrẹkpahe gbe ewuhrẹ-se, osisase na o re dhoma mu, yọ o rẹ wha isase nọ i re siuru ze viukpenọ o rẹ jọ orọ edheuru-ọvo jẹ jọ kpakre kpakre.—Hab. 2:2.

Se Eme na Wọhọ Epanọ A Ro Kere Ai: Ẹme-otofa gbe ovuẹ nọ a siusi wariẹ họ na a re se ai dovia otẹrọnọ e rọ eruvẹ kẹ eme ewuhrẹ na. Enọ a re se he họ, eme nọ a fodẹ ro dhesẹ oria nọ a rọ eme na nọ ze. A re se ẹme-otofa otẹrọnọ a jọ evaọ edhe-ẹme na riobọhọ iẹ, whọ vẹ kake ta nọ: “Ẹme-otofa-obotọ na u se nọ . . .” Who te sei no, who ve se abọ edhe-ẹme na nọ okiọkọ na vrẹ.

Nọ a tẹ riẹ isase ogbotu ru, o rẹ jọ edhere jọ nọ u w’uzou nọ ma sai ro ‘wuhrẹ amọfa re a koko eware kpobi nọ’ Owuhrẹ Ologbo mai na ‘ọ k’omai ujaje riẹ na.’—Mat. 28:20.