Uwuhrẹ 28
Edhere Ẹmeọta-kugbe
Eme o gwọlọ nọ who re ru?
T’ẹme epanọ whọ rẹ ta kẹdẹ kẹdẹ rekọ dina nwene iei re u kiehọ ogbotu ra.
FIKIEME U JE WUZOU?
Oghẹrẹ ẹmeọta-kugbe nọ o kiehọ o rẹ lẹliẹ udu kie ogbotu ra vi je fiobọhọ kẹ ae j’owọ kẹ ẹme nọ whọ be ta.
UDU u re kie ahwo vi okenọ a te bi lele egbẹnyusu t’ẹme. A rẹ t’ẹme no eva rai ze lọlọhọ. Ahwo jọ a rọ jakajaka; amọfa a dina rọ dhedhẹ. Ghele na, ma tẹ be rọ ẹkoma mai t’ẹme u re siuru.
Rekọ, nọ whọ tẹ be t’ẹme kẹ ọrara, u fo re who ru ei jevejeve he epaọ ẹsenọ ọ rrọ ohwo nọ wha gbẹ rioma gaga. Evaọ uzẹme, evaọ eria jọ ẹmeọta-kugbe erara kpobi o re muhọ avọ ona uyere. Who te ru ona uyere adhẹẹ na no, whọ vẹ tẹ te ruọ ẹme nọ whọ rẹ rọ whẹtiẹ ohwo na h’oma jẹ rọ ẹkoma ra t’ẹme.
Whọ tẹ be t’ẹme no eplatfọmo ze, whọ rẹ yọroma gaga re. Whọ tẹ be rọ oma aroza t’ẹme na u re si ọghọ no ewuhrẹ Ileleikristi na jegbe epanọ ẹme nọ whọ be ta na o wuzou te. Evaọ evẹrẹ jọ, u wo eme nọ whọ rẹ rọ t’ẹme kẹ ọkpako, iticha, ohwo egọmeti, hayo ọsẹ hayo oni. (Muẹrohọ eme nọ a rọ t’ẹme eva Iruẹru 7:2 gbe 13:16.) U wo oghẹrẹ eme efa nọ a rẹ rọ t’ẹme kẹ ọrivẹ orọo hayo ogbẹnyusu ọkpekpe. Dede nọ o rẹ gwọlọ re ma rehọ eme nọ ma be jọ eplatfọmo ta rọ whẹtiẹ ahwo h’oma, ma re ru ere avọ adhẹẹ.
Rekọ eware jọ e riẹ nọ e rẹ lẹliẹ ẹme nọ ohwo o bi ru jọ dokpodokpo. Ovo rai jọ họ ẹruẹrẹhọ ona ẹmeọta na. Ẹbẹbẹ ọ rẹ romavia nọ ohwo ọ tẹ be gwọlọ wariẹ eme nwane wọhọ epanọ a kere i rai fihọ obe. Ohẹriẹ o rrọ ẹme nọ a kere avọ ẹme nọ a rẹ ta. Uzẹme, ebe nọ a kporo a re ro ru ekiakiẹ evaọ omaruẹrẹhọ kẹ ẹme. Ẹsejọhọ a k’owhẹ omaa-ẹmeọta nọ a kere no nọ who ti ro ru ẹme na. Rekọ otẹrọnọ who bi se eme na wọhọ epanọ a kere i rai fihọ omaa-ẹmeọta na ze ovavo evaọ ẹme ra, ẹme na o ti do wọhọ ẹsenọ who bi lele ahwo gbiku hu. Re ẹme na o do epaọ ẹsenọ who bi lele ahwo gbiku, rọ eme obọ ra t’ẹme na jẹ whaha eme nọ e rẹ jọ kpakre kpakre.
Oware ofa họ enwene ẹkpata ẹme. Ẹme okpikpimẹ yọ ọnọ ọ rọ dokpodokpo nọ o re do oghẹrẹ ovona. Evaọ ẹmeọta ekẹdẹ kẹdẹ, a re nwene ẹkpata ẹme na yọ inwene e rẹ jọ epanọ who re dhizu lehie te.
Rekọ, nọ whọ tẹ be t’ẹme kẹ ogbotu ologbo, who re fi edo-uvo okpehru gbe ajọwha gbe ẹgba-ofihọ ba ona ẹmeọta-kugbe na re a ruẹse gaviezọ k’owhẹ.
Re whọ sai wo edhere ẹmeọta-kugbe nọ o re kiehọ odibọgba na, who re ru ei fihọ uruemu re whọ riẹ ẹme ta kẹdẹ kẹdẹ. Orọnikọ onana u dhesẹ nọ whọ rẹ jọ ohwo nọ ọ riobe gaga ha. Rekọ u re woma re ohwo o wo ona ẹmeọta nọ o rẹ lẹliẹ amọfa gaviezọ avọ adhẹẹ okenọ ọ tẹ be t’ẹme. Avọ oyena nọ who fihọ iroro, roro sọ u fo re who ruiruo kpahe igogo eware nana evaọ ẹmeọta ekẹdẹ kẹdẹ ra.
(1) Whaha eme nọ e wọso emamọ ona-ẹmeọta hayo onọ a re ro rri owhẹ kugbe ahwo nọ edhere uzuazọ rai o wọso itee Ọghẹnẹ. Rọwokugbe ohrẹ nọ o rọ Ahwo Kọlọsi 3:8, whaha eme etọtọ. Evaọ abọdekọ riẹ, eme elọlọhọ nọ a rẹ rọ t’ẹme k’ẹdẹ k’ẹdẹ e thọ họ. Ahwo kpobi a rẹ sae rọ eme itieye na t’ẹme, yọ dede nọ i wo ona gaga ha, ahwo a rẹ jẹ ae rehọ wọhọ emamọ ẹmeọta.
(2) Whaha eme evona nọ whọ rẹ rọ ta oghẹrẹ ẹme kpobi. Wuhrẹ epanọ whọ rẹ rọ t’eme nọ i re dhesẹ oware nọ o rọ owhẹ eva via vevẹ.
(3) Whaha eme nọ e rẹ thọ owhẹ unu ẹkwoma iroro nọ whọ rẹ jọ kiẹ ẹme nọ whọ gwọlọ ta riwi; kẹsena who ve te mu ẹme họ ẹta.
(4) Whaha eme buobu nọ who re ro ruru emamọ ẹme. Ru ei fihọ uruemu re whọ rọ umutho eme ivevẹ rọ t’ẹme nọ whọ gwọlọ nọ ahwo a kareghẹhọ.
(5) T’ẹme evaọ edhere nọ o re dhesẹ adhẹẹ kẹ amọfa.
EPANỌ A RE RO WO OKWAKWA ONANA
Rehọ erorokpahe ahwo nọ a rọ ogbotu ra ro muhọ. Rri rai wọhọ egbẹnyusu, rekọ who ru ei wọhọ aroza ha. Kẹ ae adhẹẹ.
T’ẹme no uzou ze. Whọ nwane wariẹ eme na epanọ e rọ obe na ha. Rọ eme obọ ra wariẹ igogo eme na. Bru eme na kpẹkpẹe, je nwene ẹkpata ẹme na.
Tẹrovi isiuru nọ who re ro lele ohwo na t’ẹme. T’ẹme no udu ze. Oware nọ o r’oja họ ovuẹ na, orọnikọ epanọ whọ rẹ riẹ ẹme ta te he.
Ru ẹnyaharo evaọ ẹmeọta ikẹdẹ kẹdẹ ra. Ruiruo kpahe ohrẹ nọ a jọ ẹwẹ-obe nana kẹ na, unọjọ u tọjọ.
ORIA IRUO: Kiẹ oghẹrẹ ona ẹmeọta ra riwi. Ruiruo fihọ igogo eme isoi nọ ma jọ obehru fodẹ na, tẹrovi ọvuọvo evaọ okpẹdoke soso. Whọ tẹ t’ẹme thọ, wariẹ ẹme na, o tẹ ga gaga evaọ iroro ra ọvo dede, ru ere gbagba.