Uwuhrẹ 15

Emamọ Eriwo Oma

Eme o gwọlọ nọ who re ru?

Jọ kpatiẹ, fuafo, jẹ jọ umumuo evaọ ẹgọ ra. Whọ rẹ fẹ eto ra ziezi. Edikihẹ ra o re dhesẹ uruemu osegboja.

FIKIEME U JE WUZOU?

Eriwo oma ra o sai kpomahọ epanọ amọfa a re rri erọwọ Oleleikristi ra gbe edhere uzuazọ nọ who dikihẹ kẹ.

ERIWO oma ra o rẹ ta eme buobu kpahe owhẹ. Nọ Jihova ọ rẹ ruẹ oware nọ o rọ udu na, ahwo-akpọ a rẹ jiroro no “eru oma” na ze. (1 Sam. 16:7) Whọ tẹ rọ kpatiẹ jẹ sẹ emamọ osẹ, amọfa a ti ku ei họ nọ whẹ yọ ohwo ọghọ, yọ oma o te wọ ae re a kezọ k’owhẹ viere. Emamọ ẹgọ ra o rẹ jẹ ta ewoma fihọ ukoko nọ who dikihẹ kẹ gbe oghẹrẹ ẹro nọ enọ e be gaviezọ k’owhẹ na a ti ro rri egagọ Ọghẹnẹ.

Ekpọvio nọ A re Fihọ Iruo. Ebaibol na ọ k’izi buobu kpahe eriwo oma ohwo ho. Rekọ ọ kẹ ehri-izi owowa nọ e rẹ sai fiobọhọ k’omai jẹ emamọ iroro. Ugogo ẹjiroro nọ ọ rrọ emu enana kpobi họ ma re “ru [eware] kpobi rọ kẹ Ọghẹnẹ oruaro.” (1 Kọr. 10:31) Didi ehri-izi i kie kpahe eriwo oma mai?

Orọ ọsosuọ, Ebaibol na ọ tuduhọ omai awọ nọ ma jọ fuafo, evaọ ugboma gbe ẹgọ mai. Evaọ Uzi nọ ọ kẹ Izrẹl anwae, Jihova ọ kẹ ijaje kpahe ẹfuọ. Wọhọ oriruo, okenọ izerẹ na e tẹ rọ iruo, u wo oke nọ a fihọ nọ a rẹ rọ họ jẹ fọrọ iwu rai. (Izerẹ 16:4, 24, 26, 28) Ileleikristi a rọ otọ Uzi Mosis hi, rekọ ehri-izi nọ e rọ eva riẹ i gbe w’iruo ghele. (Jọn 13:10; Evia. 19:8) Maero evaọ okenọ ma te bi kpohọ oria egagọ hayo bi w’obọ evaọ odibọgba na, ugboma mai, eri-okuo mai, gbe ẹgọ mai e rẹ jọ kpatiẹ re ma siọ amọfa oma ba etu. Enọ i re ru ẹme hayo enọ i re w’obọ evaọ idhesẹvia evaọ aro ukoko na a rẹ kẹ emamọ oriruo evaọ abọ nana. Ẹro nọ ma re muhọ eriwo oma mai u re dhesẹ adhẹẹ rọ kẹ Jihova jẹ rọ kẹ ukoko riẹ.

Orọ avivẹ, Ebaibol na ọ tuduhọ omai re ma wuhrẹ ẹkpatiẹ avọ iroro egbagba. Pọl ukọ na ọ tuduhọ eyae Ileleikristi awọ re a “gọ umutho-egọ . . . avọ omaurokpotọ, orọnikọ igbeto i me, hayo idọloro, hayo izuu, hayo ithọfọ eghaghae e farọ họ; rekọ uruemu ezi u ruo, utionọ u fo kẹ eyae nọ e rọ egagọ.” (1 Tim. 2:9, 10) Ẹkpatiẹ gbe iroro egbagba i wuzou re evaọ ẹgọ gbe osẹ ezae.

Ohwo nọ ọ rọ kpatiẹ ọ rẹ gwọlọ mu kpọ amọfa eva ha je mu si iroro bru oma riẹ. Iroro egbagba e rẹ wha orimuo ze, hayo ẹromuhotọ. Ohwo nọ o re dhesẹ ekwakwa nana o wo omakpọmu nọ u re no adhẹẹ rọkẹ itee Ọghẹnẹ ze. Edhesẹ ekwakwa nana orọnikọ u dhesẹ nọ ma rẹ siọ ẹgọ nọ o re fo omai ba ẹwha ha rekọ u re fiobọhọ k’omai dhesẹ areghẹ evaọ ẹgọ mai re ma whaha ẹgọ gbe osẹ nọ o vrẹta. (1 Jọn 2:16) Ma gwọlọ fi ehri-izi nana h’iruo makọ ma rọ oria egagọ, bi w’obọ evaọ iruo odibọgba na, hayo ma rọ iruẹru efa. Makọ ẹgọ ẹkeriotọ mai o re dhesẹ ẹkpatiẹ gbe iroro egbagba. Eva obọ isukulu hayo evaọ oria iruo okọ mai, uvẹ o rẹ jariẹ nọ ma re ro se isẹri ọnyakuo. Dede nọ ma rẹ nwane g’ẹgọ wọhọ epaọ okenọ ma bi kpohọ iwuhrẹ hayo ikokohọ họ na, ẹgọ mai ọ rẹ jọ kpatiẹ, fuafo, gbe owowa ghele.

Uzẹme, mai kpobi ma rẹ g’ẹgọ oghẹrẹ ovo na ha. A gwọlọ ere mi omai hi. Onọ o rẹ were ọjọ o rẹ were ọdekọ họ, yọ onana o thọ họ. Rekọ u fo re a fi ekpọvio Ebaibol h’iruo ẹsikpobi.

Pita ukọ na o dhesẹ nọ oware nọ o mai wuzou vi igbeto gbe ẹgọ okafe họ ẹgọ nọ o w’obọ kpahe “ohwo odidi obọ eva.” (1 Pita 3:3, 4) Idu mai e tẹ vọ avọ uyoyou, oghọghọ, udhedhẹ, ẹwo, gbe ẹrọwọ nọ ọ dọmu ziezi, enana i ti zihe ruọ ẹgọ abọ-ẹzi k’omai enọ e rẹ ghinẹ kẹ Ọghẹnẹ orro.

Orọ avesa, Ebaibol na ọ tuduhọ omai awọ re ma kiẹ sọ ẹgọ mai ọ rọ kpatiẹ. Eva 1 Timoti 2:9, a fodẹ “umutho-egọ.” Dede nọ Pọl ukọ na ọ jẹ ta kpahe ẹgọ eyae na, ehri-uzi ovona u kie kpahe ezae re. Oware nọ o rọ umutho o rẹ jọ kpatiẹ jẹ jọ owowa. Makọ ma fe hayo ma fe he, ma rẹ sae jọ kpatiẹ.

Abọ ọsosuọ jọ ọrọ eriwo oma nọ amọfa a rẹ kaki muẹrohọ họ eto mai. U fo re e jọ kpatiẹ, hayo koko oma họ ziezi. Uruemu ẹwho hayo ekwakwa-oma nọ a reuku rai i re kpomahọ epanọ eto ahwo e rẹ jọ. Eva 1 Ahwo Kọrint 11:14, 15, ma ruẹ ohrẹ nọ Pọl ukọ na ọ kẹ kpahe eto, onọ u duobọte ekwakwa nana kpobi. Dede na, nọ ona eto ohwo u te dhesẹ nọ ọ be gwọlọ tho ohwo ẹba sa, onana o wọso ehri-izi Ebaibol na.—Izie. 22:5.

Rọkẹ ezae, eriwo oma nọ o rrọ kpatiẹ o sae kẹre te etuagba nọ a rẹ nware ziezi. Evaọ eria nọ a re jo rri eto-enu fihọ oware ọghọ, ohwo nọ o wo rai kpobi o re bru rai kpotọ kpatiẹ.

Orọ avene, eriwo oma mai o re dhesẹ uyoyou kẹ akpọ na gbe idhere riẹ hẹ. Jọn ukọ na ọ vẹvẹ unu nọ: “Wha you akpọ na hayo eware nọ e rọ eva akpọ na ha.” (1 Jọn 2:15-17) Isiuru imuomu buobu e vọ akpọ na. Evaọ usu enana Jọn ọ fodẹ isiuru uwo uzioraha na gbe oma-udhesẹ eyero ohwo. Ikereakere na i te je si iroro kpohọ ẹzi ọkparesuọ, hayo aghẹmeeyo kẹ udu-esuo. (Itẹ 17:11; Ẹf. 2:2) Isiuru gbe iruemu nana i re dhesẹ oma via evaọ edhere nọ ahwo a rẹ g’ẹgọ jẹ s’osẹ. Fikiere, eriwo oma rai o sae jọ thọthọ, ọrọ ọfariẹ, vrẹta, jẹvujẹvu, hayo whọhọwhọhọ. Wọhọ idibo Jihova, ma rẹ whaha osẹ nọ u dhesẹ idhere eyena nọ e wọso erọ Ileleikristi na.

Ukpenọ whọ rẹ raro kele akpọ na, ẹvẹ u re woma te re whọ kuvẹ re emamọ oriruo ezae gbe eyae nọ e jọ abọ-ẹzi kpako evaọ ukoko Ileleikristi na o kpomahọ ẹgọ gbe osẹ ra! Emoha nọ i rẹro nọ ẹdẹjọ a te jọ iruẹme ẹgbede a rẹ sai muẹrohọ ẹgọ enọ i te nọ i bi ru eme evaọ ogbotu enẹna. Mai kpobi ma rẹ sai wuhrẹ no oriruo enọ e rọ omarokpotọ w’obọ ikpe buobu no evaọ odibọgba na.—1 Tim. 4:12; 1 Pita 5:2, 3.

Orọ avisoi, evaọ iroro ejẹ oware nọ u fo, u re fo re ma kareghẹhọ nọ makọ “Kristi ọ rọ awere kẹ omaobọ riẹ hẹ.” (Rom 15:3) Oware nọ o mae jọ Jesu oja họ oreva Ọghẹnẹ uruo. Jesu o fi obufihọ rọkẹ amọfa h’aro ewoma omobọ riẹ. Rọ Kpahe oghẹrẹ ẹgọ gbe osẹ jọ, otẹrọnọ oware jọ u ti fi ẹbẹbẹ jọ họ udevie mai gbe ahwo evaọ oria nọ ma be rria enẹna, eme ma re ru? Aruorokele ẹzi omarokpotọ nọ Kristi o dhesẹ o sai fiobọhọ k’omai jiroro avọ areghẹ. Pọl ukọ na ọ k’omai ehri-uzi na: “Ma ru ohwo ọvo zoruẹ eva oware ovo ho.” (2 Kọr. 6:3) Fiki oyena ma rẹ sae kpairoro vrẹ ona eto jọ hayo oghẹrẹ ẹgọ jọ nọ ọ rẹ sae lẹliẹ enọ ma gwọlọ se isẹri kẹ nọ a gbẹ k’omai ovao ho.

Oghẹrẹ Edikihẹ gbe Ẹkeria. Emamọ eriwo oma o kẹre te emamọ edikihẹ gbe ẹkeria re. Dede na, orọnikọ epọvo na ma re dikihẹ hayo keria ha, yọ u wo oghẹrẹ ovo jọ nọ ma gwọlọ nwene kpohọ họ. Ghele na, o rọ oware nọ a re muẹrohọ inọ wọhọ epanọ Ebaibol na ọ ta riẹ, edikihẹ kpomavi u re dhesẹ ọghọ gbe iroro ewoma. (Izerẹ 26:13; Luk 21:28) Ghele na, ẹsejọhọ fikinọ o ruiruo eruwẹ ikpe buobu no hayo fiki owho hayo ẹyao, o sae jọnọ oniọvo jọ ọ sai dikihẹ kpomavi hi hayo ọ rẹ gwọlọ oware jọ roma rẹrẹ. Rekọ rọkẹ enọ e rẹ sai ru ere, edikihẹ kpomavi evaọ okenọ a tẹ be t’ẹme kẹ amọfa u re woma re ma siọ uruemu ababọ-isiuru hayo orọ ohrọ ba ẹkẹ ahwo na. Epọvo na re, dede nọ o thọ họ re oruẹme ọ rọ obọ kpahe agbada ẹmeọta na otiẹse na, o rẹ mai kiehọ ogbotu na oma otẹrọnọ ọ roma rẹrẹ agbada na ha.

Ekwakwa Ekpakpatiẹ. Orọnikọ eriwo oma mai ọvo ọ rẹ jọ kpatiẹ hẹ rekọ ekwakwa nọ ma bi ro ruiruo evaọ odibọgba na e rẹ jọ kpatiẹ re.

Roro kpahe Ebaibol ra. O lọhọ k’omai kpobi hi re ma wo Ebaibol ọkpokpọ okenọ ọmai ọ tẹ who no. Ghele na, makọ epanọ Ebaibol mai o kri te no, u fo re o kẹ imuẹro inọ ma be rẹrote ei.

Dede na, idhere buobu e riẹ nọ a rẹ rọ kwa eware fihọ ẹkpa usiuwoma, rekọ o rẹ jọ kpatiẹ. Kọ whọ ruẹ ebe nọ i kie no Ebaibol ze no evaọ okenọ owhowho-uvie ọ be gwọlọ se ikereakere kẹ ọnọ o wo uwou hayo okenọ oniọvo jọ o je ru ẹme evaọ ukoko? O dina reghe iroro ra, ogbẹrọ ere? Otẹrọnọ ebe nọ a fihọ Ebaibol e be rehọ iroro, o sae jọnọ re who fi ai họ oria ofa họ oware nọ u ti fiobọhọ k’owhẹ ruẹrẹ ekwakwa ra họ kpatiẹ. Je muẹrohọ nọ Ebaibol hayo ebe egagọ efa nọ a re fihọ otọ a re rri rai wọhọ orivo gaga evaọ eria jọ.

Emamọ eriwo oma o rẹ j’omai oja. U re je kpomahọ epanọ amọfa a re rri omai. Rekọ maero, ma re muẹrohọ iẹe ziezi keme ma gwọlọ “jọ eva oware kpobi rehọ eru kẹ uwuhrẹ Ọghẹnẹ Osiwi mai.”—Tait. 2:10.

KIẸ OMA RA RIWI

Kọ eware kpobi e rọ kpatiẹ?

Kọ oma ra u dhesẹ ẹkpatiẹ gbe iroro egbagba?

Kọ eware kpobi e ruẹrẹ họ ziezi?

Kọ eto ra e rọ kpatiẹ?

Kọ oware jọ o rọ owhẹ oma nọ u re dhesẹ uyoyou akpọ na?

Kọ uvi ẹjiroro jọ o riẹ nọ who re ro roro nọ eriwo oma ra o ti zoruẹ ohwo jọ?

ORIA IRUO: Ẹsiẹvo okpẹdẹ evaọ oka soso, makọ oghẹrẹ iruẹru nọ whọ jiroro riẹ kpobi, rehọ eme nọ e rọ otọ uzoẹme na “Kiẹ Oma Ra Riwi” evaọ ẹwẹ-obe avọ 132 na rọ kiẹ eriwo oma ra riwi.