Ẹgọ nọ A Ruẹrẹhọ Ziezi O Re Dhesẹ Adhẹẹ kẹ Ọghẹnẹ
1 Kẹle na ma ti wo uvẹ-ọghọ nọ ma te rọ jọ erara Jihova eva Okokohọ Ubrotọ “Rehọ Oruaro kẹ Ọghẹnẹ” ọrọ 2003 na. Ẹvẹ ma rẹ kẹ Jihova uyere te nọ o ro zizie omai kpohọ ehaa ilogbo abọ-ẹzi itieye! Ma rẹ sai dhesẹ adhẹẹ kẹe gbe ovuhumuo rọkẹ ọruẹrẹfihotọ abọ-ẹzi riẹ ẹkwoma oghẹrẹ nọ ma rẹ gọ ẹgọ jẹ sẹ osẹ mai.—Ol. 116:12, 17.
2 Fuafo jẹ Rrọ Kpatiẹ: Ẹgọ mai o re dhesẹ itee Ọghẹnẹ mai via, ọnọ ọ rẹ fuafo jẹ rrọ kpatiẹ na. (1 Kọr. 14:33; 2 Kọr. 7:1) Ugboma, eto, gbe ikpe-ituawọ gbe ituabọ mai e rẹ jọ fuafo, osẹ mai o vẹ jẹ jọ kpatiẹ. Osẹ ọwhọwhọhọ ọ rrọ oria kpobi nẹnẹ. Dede na, fikinọ ohwo ifimu jọ hayo ọgba aruọza jọ ọ gọ ẹgọ nọ ọ rrọ whọhọwhọhọ, o rẹ kẹ Oleleikristi uvumọ owọ nọ o re ro ru ere he. Ma te bi lele ẹgọ gbe osẹ nọ u kieze, o rẹ jọ bẹbẹ kẹ ahwo re a vuhu ohẹriẹ nọ o rrọ ahwo nọ a be gọ Ọghẹnẹ uzẹme na gbe enọ e be gọe he.—Mal. 3:18.
3 Ẹgọ nọ O Fo Egbodibo Oleleikristi: Okenọ Pọl uko na o kere se ọsẹro Oleleikristi na Timoti, ọ ta udu họ ‘eyae na awọ re a gọ umutho-egọ nọ o re fo, avọ omaurokpotọ, . . . gbe uruemu ezi u ruo, utionọ u fo kẹ eyae nọ e rrọ egagọ.’ (1 Tim. 2:9, 10) Re ma ruẹ nọ ẹgọ mai o rrọ kpatiẹ o gwọlọ ẹromuhotọ. Ẹgọ mai ọ rẹ jọ tẹtẹtẹ, fuafo, jẹ jọ owowa—orọnikọ ọrọ oma-udhesẹ gbe onọ o rẹ kpare isiuru amọfa ha.—1 Pita 3:3.
4 Pọl ọ tẹ jẹ vẹvẹ unu kpahe osẹ nọ o rẹ vrẹta avọ “igbeto i me, hayo idọloro, hayo izuu, hayo ithọfọ eghaghae e farọ.” (1 Tim. 2:9) Re a jọ owowa evaọ ifiare ewha, ekwakwa osẹ, gbe abọfa ẹgọ yọ owojẹ areghẹ nọ eyae Ileleikristi i re lele.—Itẹ 11:2.
5 Nọ a te rri ohrẹ nọ Pọl ọ kẹ eyae Ileleikristi na ziezi, u kie kpahe ezae Ileleikristi re. Inievo emezae a rẹ whaha oghẹrẹ osẹ nọ u re dhesẹ oghẹrẹ iroro akpọ na. (1 Jọn 2:16) Wọhọ oriruo, evaọ ekwotọ jọ etrọza iwhẹwhẹru, gbe iwu nọ e rro vioma e rrọ oware odode, rekọ oghẹrẹ osẹ nana u kiehọ kẹ ọgbodibo Ọghẹnẹ hẹ.
6 Etoke Iruẹru Eriosehọ: Okenọ okokohọ o te muhọ no, inievo emezae gbe emetẹ buobu a re fi obọdẹ oriruo h’otọ evaọ abọ ẹgọ gbe osẹ. Dede na, iyẹrẹ i dhesẹ nọ ahwo jọ a rẹ daezọ osẹ rai hi evaọ okenọ a be nya je no okokohọ na kpozi, hayo evaọ etoke eriosehọ ọfa nọ abọ okokohọ na o te kuhọ no. Uzẹme, ẹgọ gbe osẹ mai—makọ evaọ etoke okokohọ na hayo oke ofa—u re kpomahọ oghẹrẹ nọ amọfa a re rri ahwo Ọghẹnẹ. Nọ ma sa ebaje okokohọ mai mu na, u fo re ma gọ ẹgọ nọ o fo egbodibo Oleleikristi ẹsikpobi. (Ebaje okokohọ nọ ukoko na u ru na ọvo a rẹ sa mu. Evaọ oke nọ u kpemu, ahwo jọ a wha ebaje nọ ae omarai ọvo a ru, enọ i wo oghẹrẹ ona gbe ekọlọ sa. A rẹ sa oghẹrẹ ebaje itieye na mu hu. Otẹrọnọ ukoko jọ o gwọlọ ebaje efa gbe oware nọ a re dhe ai họ, a rẹ yare enana mi uwou ogha na, ẹkwoma Literature Request form na S-14.) Onana o rẹ wọ amọfa jiri omai, je rovie uvẹ fihọ nọ ma re ro se isẹri.—1 Kọr. 10:31-33.
7 Wọhọ epanọ ovao osasa u re fi erru họ ovao na, ere emamọ ẹgọ gbe osẹ u re fi adhẹẹ họ ovuẹ nọ ma be wha gbe ukoko nọ ma rrọ na. Ẹsejọhọ oma o te wọ ejọ nọ i ti muẹrohọ omai eva Okokohọ Ubrotọ “Rehọ Oruaro kẹ Ọghẹnẹ” eva ukpe nana re a nọ kpahe oware nọ ma ro wo ohẹriẹ, yọ ẹsejọhọ evaọ ukuhọ riẹ a vẹ te ta nọ: ‘Ma re lele owhai, keme ma yo [jẹ ruẹ] nọ Ọghẹnẹ avọ owhai a gbẹ rrọ.’ (Zek. 8:23) Jọ mai omomọvo ma dhesẹ adhẹẹ mai kẹ Jihova ẹkwoma ẹgọ gbe osẹ mai.
[Study Questions]
1. Ẹvẹ ma sai ro dhesẹ ovuhumuo kẹ okokohọ ubrotọ mai nọ ọ be tha na?
2. Fikieme u je w’uzou re ma sẹ osẹ nọ ọ rrọ fuafo jẹ rrọ kpatiẹ?
3. Ẹvẹ o sai ro mu omai ẹro nnọ ẹgọ mai ọ te rọwo kugbe ohrẹ nọ o rrọ 1 Timoti 2:9, 10 na?
4, 5. Didi unuovẹvẹ ezae gbe eyae Ileleikristi a rẹ kezọ riẹ?
6. (a) Fikieme ma jẹ yọrọ ute ukpehru evaọ ẹgọ gbe osẹ mai eva okenọ ma tẹ be nya je no okokohọ kpozi, eva obọ okokohọ na, gbe okenọ abọ okokohọ kpobi o te kuhọ no kẹdẹ kẹdẹ? (b) Ebaje vẹ ma rẹ sa mu?
7. Oghẹrẹ vẹ emamọ ẹgọ gbe osẹ mai o sai ro kpomahọ amọfa?
[Box on page 5]
Wha Ẹgọ nọ O Re Fi Ọghọ họ Ohwo Oma
▪ Evaọ okenọ whọ be nya hayo no okokohọ ze
▪ Eva okokohọ na
▪ Eva etoke iruẹru eriosehọ