Ẹgọ Omobọ-Ohwo nọ Ọ rẹ Kpatiẹ je Fo Ejiro
1 “Isẹri Jihova e mai woma! Ahwo rai a re wolẹ, yọ a rẹ gẹgọ ziezi, je dhesẹ adhẹwẹ odidi.” Ere ohwo ẹro ehọtẹle jọ ọ ta kpahe inievo na evaọ okokohọ ubrotọ jọ nọ a ru evaọ ukpe nukpo. Eva okokohọ ubrotọ ọfa, ohwo jọ nọ ọ rrọ ehọtẹle ruiruo ọ ta nọ: “U re vevẹ inọ whai kpobi wha rẹ gọ ẹgọ evaọ edhere nọ ọ rẹ were Ọghẹnẹ.” Ẹhẹ, amọfa a re muẹrohọ ahwo nọ a kpohọ ikokohọ mai. Fikiere ma gwọlọ gọ ẹgọ “evaọ edhere nọ o fo emamọ usi na,” yọ ẹsibuobu onana o rẹ wọ amọfa jiri omai je dhesẹ iẹe vẹ inọ mai yọ egbodibo Ọghẹnẹ. (Fil. 1:27, NW ) Nọ ma be ruẹrẹ oma kpahe kẹ okokohọ ubrotọ na, u fo nọ ma re roro kpahe ẹgọ mai evaọ ẹruoke.
2 Jemis olele na o kere nọ: “Areghẹ nọ o nehru ze o re muhọ avọ ẹfuọ.” (Jem. 3:17) Ẹfuọ odhesẹ evaọ ẹgọ mai o rẹ sae jọ use-abọ. Akpọ ogbekuo Setan ọ be lẹliẹ ahwo jẹ oghẹrẹ ẹgọ nọ o fo ho rehọ, onọ o rẹ lẹliẹ amọfa gale aro vi ae gbe onọ o rẹ kpare ekpehre isiuru. (1 Jọn 2:15-17) Fikiere, nọ ma tẹ be jiroro kpahe ẹgọ gbe osẹ, u fo nọ ma rẹ jẹ ohrẹ Ebaibol na rehọ inọ ma “se edhọ-egọ avọ urusio akpọ na ba, re ma yeri uzuazọ uwowolẹ . . . eva akpọ nana.” (Tait. 2:12) Ma rẹ rehọ ẹgọ mai kpokpo amọfa vievie he, te a rrọ inievo mai, enọ e rrọ ehọtẹle ruiruo, hayo amọfa nọ a bi riwi omai.—1 Kọr. 10:32, 33.
3 Ẹgọ nọ A Ruẹrẹhọ Kpatiẹ: Okenọ whọ tẹ be ruẹrẹ oma kpahe kẹ okokohọ na, nọ oma ra nọ: ‘Kọ ẹgọ mẹ ọ rrọ kpatiẹ, hayo kọ ọ rẹ lẹliẹ amọfa gale aro vi omẹ? Kọ u dhesẹ adhẹẹ kẹ iroro amọfa? Kọ iwu mẹ i kpotọ no uriohọ hrọ hayo e kpẹre hrọ? Kọ a be ruẹ no iwu na ruọ oma mẹ, hayo kọ e keke hrọ? Kọ iwu mẹ e fo jẹ kare ekpehre ore? Okenọ mẹ tẹ be re emu nọ a k’omai ọvọvẹ evaọ ehọtẹle hayo oria nọ a je serihọ nọ ọruẹrẹfihotọ na o te kuhọ no, kọ ẹgọ mẹ ọ te jọ fuafo, nọ o dhesẹ ọgbodibo ọfuafo, hayo kọ ẹgọ mẹ ọ rrọ jẹvu jẹvu, onọ u kieze kpobi, rrọ whọhọ whọhọ, jẹ rrọ onọ u fo ho kẹ ohwo okokohọ nọ ọ wha ebaje? Kọ iwu nọ me fihọ evaọ etoke eriosehọ i ti ru oma vuomẹ nọ mẹ gbẹ sai se isẹri oke-gheghe he?’—Rom 15:2, 3; 1 Tim. 2:9.
4 Ma rẹ sai wo erere no eware nọ Ileleikristi nọ e kpako no a muẹrohọ nọ a ta kẹ omai ze. Eyae na e rẹ nọ ezae rai oghẹrẹ nọ amọfa a rẹ sai riwi iwu rai. Esẹgbini nọ e rrọ Ileleikristi a rẹ sai fi obọ họ kẹ emọ rai nọ e rrọ ikpe-ikpegbọ evaọ abọ nana. Ofariẹ, inievo-emetẹ nọ e kpako no nọ e rrọ emamọ oriruo a rẹ sai ‘wuhrẹ uvovoeyae na, . . . re a wo areghẹ, jọ fuafo’ evaọ ẹgọ rai ‘re a siọ ẹme Ọghẹnẹ ba ẹfuọ.’ (Tait. 2:3-5) Emamọ iwoho nọ i dhesẹ ẹgọ nọ ọ rrọ kpatiẹ, nọ a ruẹrẹhọ ziezi e rrọ ebe mai.
5 Wha Ujiro Se Jihova: Ikokohọ ubrotọ e rẹ rehọ obọdẹ uvẹ nọ ma re ro jiri Jihova kẹ omai kpobi nọ ma kpohọ okokohọ na, orọnikọ ahwo nọ a jọ ọruẹrẹfihotọ na ru ẹme ọvo ho. Uzẹme, uruemu Oleleikristi mai gbe ẹmeunu mai e te wha ọghọ sei. Rekọ ẹgọ gbe osẹ mai họ oware ọsosuọ nọ amọfa a re muẹrohọ. Jọ mai kpobi ma wha ujiro se Jihova ẹkwoma ẹgọ mai nọ ọ rẹ jọ kpatiẹ je fo ujiro.—Ol. 148:12, 13.
[Study Questions]
1. Evaọ omaruẹrẹhọ kẹ okokohọ ubrotọ na, fikieme ma je roro kpahe ẹgọ mai?
2. Fikieme o jẹ rrọ use-abọ re ohwo ọ gọ ẹgọ jẹ sẹ osẹ evaọ edhere ọkpakpatiẹ?
3. Enọ vẹ i re fi obọ họ kẹ omai kiẹ ẹgọ mai riwi?
4. Ẹvẹ amọfa a sai ro fi obọ họ kẹ omai wha ẹgọ nọ ọ rrọ kpatiẹ?
5. Ẹvẹ mai kpobi ma sae rọ wha ujiro se Jihova evaọ etoke okokohọ na?
[Box on page 6]
Eware nọ I re Fi Obọ họ Komai Gọ Ẹgọ nọ O Fo Ujiro
◼ Ẹme Ọghẹnẹ
◼ Oma-okiẹriwo
◼ Eriwo amọfa nọ ma rẹ gaviezọ kẹ
◼ Ebe Ileleikristi