Jọ Fuafo Evaọ Uruemu Ra Kpobi
1 Wọhọ idibo Ọghẹnẹ nọ ọ rẹ fuafo na, Jihova, ma rẹ daoma jọ fuafo evaọ uruemu mai kpobi. (1 Pita 1:15, 16) Onana u dhesẹ nọ ma rẹ daoma ru lele itee Jihova evaọ kabọ kabọ uzuazọ mai. Okokohọ ubrotọ ukpe nana ọ te kẹ omai obọdẹ uvẹ nọ ma re ro dhesẹ uruemu ofuafo.
2 Eva Eria Nọ Ma Wohọ gbe Ehọtẹle: Ohwo jọ nọ o wuzou ehọtẹle nọ ahwo nọ a kpohọ okokohọ evaọ ukpe nukpo a wohọ ọ ta nọ: “Eva usu ahwo nọ ma jọ etenẹ wo kpobi no, Isẹri Jihova e mai woma. . . . Whai họ oghẹrẹ ahwo nọ ma gwọlọ.” Ekareghẹhọ obotọ na nọ ma re muẹrohọ u ti fi obọ họ kẹ omai yọrọ odẹ uwoma nọ ma wo: (1) Nọ whọ tẹ be rria ehọtẹle, whọ rawo ibrikpẹ vi unu nọ whọ ghinẹ gwọlọ họ, yọ who fi ahwo họ ukpẹ na bu vi unuahwo nọ a kuvẹ riẹ hẹ. (2) Otẹrọnọ whọ gbẹ gwọlọ rehọ ikpẹ na ha, jọ ahwo nọ a wuzou ehọtẹle na riẹ vẹrẹ vẹrẹ. (3) Whọ jọ ibrikpẹ nọ a rẹ jọ there ẹbẹ hẹ there emu hu. (4) Dhesẹ ubi ẹzi na evaọ okenọ who te bi yeri kugbe ahwo nọ a rrọ ehọtẹle na ruiruo, maero evaọ okenọ ahwo a te bi zurie-ruọ-eva jẹ ruọ otafe.—Gal. 5:22, 23.
3 Emamọ uruemu mai o rẹ sai se obọdẹ isẹri kpahe omai. Eva ukpe nukpo, Osẹri ọmaha jọ ọ rehọ unu uwowolẹ yare ubiro gbe obe mi okere-obe ehọtẹle jọ, nọ okere-obe na ọ kẹe eware na no, osẹri ọmaha na o te yere okere-obe na. Onana u duobọte okere-obe na, ọ tẹ ta nọ: “O gbẹ lọhọ re whọ ruẹ emaha nọ i wo uruemu uwoma utiona vievie he.” Dede na, evaọ iyero jọ, a ruẹ emọ jọ nọ esẹgbini i mu ẹro họ họ nọ e jẹ ya-ame, zaharo evaọ oria nọ a rẹ rọ gadiẹ kpohọ uwou-ehru, ru edo, jẹ dhẹ-ohrẹ evaọ ekọridọ uwou na. Esẹgbini e rẹ kẹ emọ rai uvẹ re a dhẹ whọhọ whọhọ họ, rekọ a re mu ẹro họ ae re a ruẹ nọ uruemu rai o wha ujiro se Jihova.—Itẹ 29:15.
4 Eva eria ikokohọ buobu, a rẹ jọ ogege okokohọ na kẹ ahwo iwou nọ a re wohọ, o sae jọ iwou nọ a bọ fihọ nnọ ahwo a wohọ evaọ ubroke hayo enọ a bọ avọ ẹjiroro ahwo nọ a re wohọ ai. Iviena woi họ iroro inọ ukoko na o te sae bọ iwou nọ a re wohọ kẹ ahwo kpobi nọ a bi kpohọ okokohọ họ. Ahwo nọ Ẹko-Iruo Uwou na u kuenu kẹ ọvo a rẹ wezẹ ogege okokohọ na hẹrioke. Otẹrọnọ a kẹ owhẹ uwou evaọ oria ofa, whọ rẹ rọ oma kpotọ kẹ Ẹko-Iruo Uwou na re whọ rria oria nọ a kẹ owhẹ nọ who wohọ na.
5 Eva Oria Emuọriọ: Ohwo jọ nọ ọ rẹ kẹ ahwo emu evaọ oria emuọriọ jọ nọ o kẹle ogege okokohọ ọ ta nọ: “Isẹri Jihova a wo ohẹriẹ. A re dhesẹ adhẹẹ kẹ amọfa.” Emamọ uruemu o kẹre te ẹwhaha eme nọ ma rẹ ta do gbe ehwẹ nọ e rẹ sai kpokpo amọfa nọ a be re emu. Makọ ma be re hayo ma be da, ma gwọlọ ru eware kpobi rọ kẹ Ọghẹnẹ oruaro.—1 Kọr. 10:31.
6 Eva Okokohọ Na: U fo re uruemu uwoma mai o mai dhesẹ oma via eva ogege okokohọ na. Iviena rọwo kugbe ọkpọvio eruẹrẹahwohọ na, te evaọ oria nọ a rẹ dhẹ imoto fihọ gbe evaọ ọgwa nọ ahwo a kokohọ be gaviezọ na. (Hib. 13:17) Ahwo uviuwou a rẹ keria kugbe viukpenọ a rẹ kẹ emọ eboba rai gbe emọ ikpe-ikpegbọ rai uvẹ re a keria kugbe itu izoge efa. A re dhe uvumọ oghẹrẹ oware erekọdo fihọ ekwakwa ẹlẹtriki hayo erọ ẹmeọta nọ e rrọ ogege na vievie he, yọ a rẹ sae rehọ ekwakwa yena ruiruo evaọ oghẹrẹ nọ i gbe kpokpo amọfa ha. Otẹrọnọ whọ gwọlọ rehọ iwoho, whọ rehọ eflashe na ruiruo eva okenọ abọ okokohọ na ọ be nyaharo na ha. Whọ rẹ rehọ iwoho no oria nọ whọ keria ze eva okenọ a be ta ẹme re whọ siọ amọfa ba ekpokpo evaọ ogbotu na. Who zizie ahwo nọ a be kokọ iwoho erehọ ziọ evaọ ogege okokohọ na re a nyaze te rehọ iwoho vievie he. Who re ru ipeja gbe ifonu nọ i wo ufi hi (GSM) fihọ oghẹrẹ nọ i gbe ro kpokpo amọfa ha. Who te muẹrohọ ohwo jọ nọ ọ nwa oma idudhe evaọ ogege okokohọ na, iviena jẹ eruẹrẹahwohọ na riẹ hayo Ẹko-Iruo Obufihọ Ọsosuọ na. Obọdẹ usiwo-imu nọ a rẹ sae kẹ o rrọ ogege okokohọ na.
7 Evaọ oke nọ u kpemu, ahwo jọ a je hrowo-oma re ebe ekpokpọ e ruẹsi te ai obọ. Oma-uhrowo, gbe ahwo-ogele e rẹ jariẹ vievie he re a ruẹsi wo ebe ekpokpọ tobọ. Rọ oma kpotọ dikihẹ uhie nọ a dhe họ na. Ma bi ru ọruẹrẹfihotọ re ma ruẹ nọ ebe ekpokpọ i te ahwo nọ a ziọ okokohọ na obọ.—1 Kọr. 14:40.
8 Uruemu mai o hẹriẹ omai no amọfa jẹ be wha ujiro se Ọghẹnẹ. (1 Pita 2:12) Evaọ okokohọ na, ahwo kpobi a ti muẹrohọ uruemu Isẹri Jihova. Fikiere, gbaemu re whọ jọ fuafo evaọ uruemu ra kpobi.
[Study Questions]
1. Fikieme o jẹ roja re ma jọ fuafo evaọ uruemu mai kpobi?
2. Ẹvẹ ma sai ro dhesẹ emamọ uruemu eva eria nọ ma wohọ gbe ehọtẹle?
3. Ẹvẹ uruemu Isẹri emaha na o sae rọ were amọfa?
4. Amono a rẹ rria iwou nọ a bọ fihọ ogege okokohọ na?
5. Ẹvẹ ma sai ro dhesẹ ororokẹ rọkẹ amọfa nọ ma tẹ be re emu eva oria emuọriọ?
6, 7. Eme emamọ uruemu o kẹre te evaọ ogege okokohọ na?
8. Ẹvẹ uruemu nọ ma rẹ jọ okokohọ dhesẹ o rẹ rọ wha ujiro se Ọghẹnẹ?
[Box on page 5]
Dhesẹ Uruemu Ofuafo
◼ Ru lele izi ehọtẹle na kpobi
◼ Muẹrohọ emọ ra kiọkiọkiọ
◼ Dhesẹ ororokẹ rọkẹ amọfa
◼ Whọ rria iwou nọ a bọ fihọ ogege okokohọ na ha otẹrọnọ a fi owhẹ họ oria ofa
◼ Who dhuoma ha evaọ okenọ who bi mi ebe ekpokpọ