Emu Abọ-Ẹzi Ẹruoke
1 “Me re ti . . . ru eka re emọ buobu, ohọo u gbe ti mu eva ẹwho rai hi,” ere Olori Osu na Jihova ọ ta. (Izik. 36:29) Eme eruẹaruẹ yena i kie kpahe ahwo Ọghẹnẹ nẹnẹ. Evaọ edhere ẹwoho, Jihova o ru eka nọ e rẹ sẹro uzuazọ re e dhẹ ze buobu kẹ ahwo riẹ no. Emu abọ-ẹzi ẹruoke nọ a be kẹ ẹkwoma ikokohọ ubrotọ mai na u dhesẹ onana via vevẹ.
2 Evaọ okokohọ nọ a ru evaọ Columbus, Ohio, evaọ 1931, Jihova ọ kpọ ahwo riẹ re a rehọ odẹ okpokpọ—Isẹri Jihova. (Aiz. 43:10-12) Evaọ 1935 a vuhu ogbotu obuobu ọrọ Eviavia 7:9-17 na mu. Evaọ 1942, Brọda Knorr ọ kẹ ovuẹ ogbotu na “Udhedhẹ—Kọ O Sai Kri?” Ovuẹ ogbotu yena o kẹ iruo usiuwoma ota akpọ-soso na ọwhọ je su kpohọ ẹtohọ Isukulu Ebaibol ọ Giliad ọrọ Watchtower. Dede nọ ikokohọ jọ e riẹ nọ e rẹ sae thọrọ ẹro ho, ikokohọ na kpobi e ghinẹ rrọ emẹjẹ ọrọ obọdẹ emu abọ-ẹzi nọ a kẹ evaọ ẹruoke.—Ol. 23:5; Mat. 24:45.
3 Ẹvẹ Whọ Be Re Eva Vọ Te? O lọhọ re emu ọ wariẹ ohwo họ rekọ ghele na ohwo ọ rẹ jọ buẹlẹ buẹlẹ otẹrọnọ ọ gbẹ daoma gaga re ọ re iẹe doma ha. (Itẹ 26:15) Ere ọvona o rrọ evaọ abọ-ẹzi. Eva ikokohọ buobu, a muẹrohọ no inọ ahwo jọ a be nya no oria nọ a keria re a nyae rehọ iwoho eva okenọ a muọ ẹme họ ẹta no. Amọfa a tubẹ nya thabọ te epanọ a nyai ro se ahwo nọ a be kọ okọ iwoho erehọ no obọ otafe ze ogege okokohọ na. Ma kuvẹ onana vievie he.—Jọn 2:16.
4 Ofa riẹ re, a muẹrohọ no inọ ahwo buobu a be nya no enẹ kpenẹ hayo lele amọfa gbiku evaọ etoke ọruẹrẹfihotọ na. Dede nọ omakugbe ọbọga o rrọ abọjọ nọ o wuzou evaọ okokohọ mai na, oke nọ onana o mai ro woma họ taure a te ti muhọ gbe okenọ a te ku abọ ọvuọvo họ no. (Ọtausi. 3:1, 7) Otẹrọnọ ma gbẹ keria oria mai be gaviezọ ziezi hi, igogo eme jọ e rẹ sai vo omai. Ẹsejọ, esẹro ẹko-iruo okokohọ ubrotọ gbe inievo nọ a kẹ ẹme evaọ okokohọ na a rẹ ruẹ nọ u fo re a jiroro kpahe oware jọ nọ o roja nọ abọ okokohọ na ọ be nyaharo na. Rekọ otẹrọnọ eware nọ e gwọlọ ẹromuhọ ọkpakpata e gbẹ riẹ hẹ, a re fi emamọ oriruo h’otọ ẹkwoma ezọ nọ a rẹ gaviẹ ziezi kẹ ọruẹrẹfihotọ na. Jọ mai ọvuọvo o ru re emu abọ-ẹzi nọ a be kẹ na o vo omai vievie he.—1 Kọr. 10:12; Fil. 2:12.
5 Ẹvẹ eva e be were omai te fiki obọdẹ emu abọ-ẹzi nọ Jihova ọ be kẹ na, nọ u wo ohẹriẹ no iwuhrẹ erue Kristẹndọm nọ e rẹ kẹ erere he! (Aiz. 65:13, 14) Edhere ọvo jọ nọ ‘ma rẹ rọ kẹ uyere’ họ ẹkwoma okokohọ ubrotọ na nọ ma re rri wọhọ uvẹ nọ Jihova o bi ro wuhrẹ omai. (Kọl. 3:15) Fi iroro ra kpobi họ ẹme nọ a be ta na orọnikọ ohwo na ha, je riwi ovuẹ na wọhọ nọ u bi no obọ ‘Owuhrẹ Ologbo’ na ze. (Aiz. 30:20, 21; 54:13) Gaviezọ ziezi. Nọ who bi kpohọ Okokohọ Ubrotọ “Nya Kugbe Ọghẹnẹ” na, fi epanọ eme nọ a re kere fihotọ i wuzou te họ iroro, onọ u ti fi obọ họ kẹ owhẹ w’obọ evaọ ọkiẹkpemu ọkpahefihọ unu nọ a te ma omaa riẹ fihọ Ewuhrẹ Odibọgba evaọ emuhọ ukpe notha na. Kiẹ igogo-eme okpẹdẹ na riwi evaọ owọwọ kpobi. Fi eware nọ who wuhrẹ họ iruo.
6 Okokohọ kpobi nọ a bi ru taure Amagẹdọn ọ tẹ ze, makọ a ru rie evaọ evuẹ enọ e dhẹ no ẹwho, orẹwho nọ a je bi fi ẹmo, hayo oria nọ udhedhẹ u je bi titi, o rrọ obọ nọ ma kpare vi Setan! Wọhọ okugbe-inievo, ma bi rri uvẹ nọ ma re ro kuomagbe evaọ ikokohọ ubrotọ ghaghae. (Izik. 36:38) Ma wo imuẹro na inọ Jihova ọ te wariẹ rọ edhere oyoyou k’omai ‘emu eva ẹruoke.’—Luk 12:42.
[Study Questions]
1. Ẹvẹ Izikiẹl 36:29 o bi ro rugba nẹnẹ?
2. Ẹvẹ Jihova ọ rọ rehọ ikokohọ ubrotọ kẹ emu abọ-ẹzi no evaọ ẹruoke?
3, 4. Eme ma re ru hrọ re ma wo erere no emu abọ-ẹzi nọ a be te kẹ evaọ okokohọ ubrotọ na ze?
5. Ẹvẹ ma sai ro dhesẹ uyere kẹ emu abọ-ẹzi buobu nọ Jihova ọ be kẹ?
6. Ẹjiroro oghọghọ vẹ ikokohọ ubrotọ e be kẹ omai?
[Box on page 4]
Dhesẹ Ovuhumuo kẹ Emẹjẹ Jihova
◼ Gaviezọ ziezi
◼ Kere igogo-eme fihọ otọ
◼ Kiẹ igogo-eme okpẹdẹ na riwi evaọ owọwọ kpobi
◼ Fi eware nọ who wuhrẹ họ iruo