Jọ Oriruo Evaọ Uruemu Ezi
1 Okenọ ma te kuomagbe buobu eva ikokohọ ubrotọ, iriughe i re muẹrohọ oghẹrẹ nọ ma re ru je yeri kugbe amọfa. Fikiere, u fo nọ mai omomọvo ọ k’ezọ ziezi rọkẹ ohrẹ Ebaibol na: ‘Jọ sasasa evaọ iroro, hẹ jọ evaọ koware koware dhesẹ oma ra fihọ oriruo uruemu ezi.’ (Tait. 2:6, 7) Re ‘omomọvo ọ gwọlọ ifowe amọfa orọnọ erọ omobọ riẹ ọvo ho’ o sae gwọlọ omodawọ ulogbo. (Fil. 2:4) Joma roro kpahe abọ jọ nọ ma jẹ sai fi uduotahawọ nana h’iruo eva Okokohọ Ubrotọ “Rehọ Oruaro kẹ Ọghẹnẹ” nọ ọ be tha na.
2 Ọruẹrẹfihotọ Iwou: U wuzou gaga re mai kpobi ma nya lele eruẹrẹfihotọ okokohọ na. Onana o mae r’oja evaọ okenọ ma te bi ru ọruẹrẹfihotọ iwou nọ ma re wohọ. Wọhọ epanọ o rẹ jọ, o gwọlọ iwou buobu rọkẹ okokohọ kpobi. Inievo mai buobu a wo obọ tere he fikiere o gwọlọ nọ a rẹ rẹro so iwou nọ ugho rai u kpotọ. Ma ru omodawọ gaga no re ma nekpẹ iwou nọ unuigho rai o mai kiehọ. Ma rẹ rọ uyoyou roro kpahe ẹgwọlọ amọfa hrọ, jẹ ‘guọlọ ifowe amọfa orọnikọ erọ omobọ mai ọvo ho.’—Fil. 2:4.
3 Otẹrọnọ ma wohọ ehọtẹle, isiuru nọ ma wo kpahe amọfa i re dhesẹ oma via evaọ oghẹrẹ nọ ma re ru ekwakwa ehọtẹle na. U re woma gaga nọ ma te dhesẹ ororokẹ rọkẹ amọfa ẹkwoma oma nọ ma re ro totọ nya lele izi ehọtẹle na. Evaọ idhere nana yọ ma bi “ru iruo ezi kẹ ahwo kpobi” jẹ rọ ere se emamọ isẹri kẹ amọfa.—Gal. 6:10.
4 Esẹgbini avọ Emọ: Evaọ akpọ nọ izoge buobu a be jọ thuethu, emọ mai i wo ohẹriẹ, yọ onana o rẹ wha ajiri se Jihova gbe ukoko riẹ. Dede na, evaọ ẹsejọ, ebẹbẹ e roma via no fikinọ a rọ ẹro te emọ ziezi hi. (Itẹ 29:15) Esẹgbini e rẹ nya siọ emọ rai ba re a dhẹ epanọ u je rai hi eva ehọtẹle na, je kugbe oria nọ a jẹ ya-ame, hayo eva ogege okokohọ na.
5 Taure okokohọ na o te ti te, esẹgbini jọ e ruẹ no inọ u re fi obọ họ re a ta ẹme kugbe emọ rai kpahe uruemu nọ a gwọlọ mi ai. (Ẹf. 6:4) A re fi obọ họ kẹ emọ na vuhumu inọ uvi uyoyou Oleleikristi ‘u re ru eware etọtọ họ’ hayo ‘gwọlọ ewoma obọ riẹ hẹ.’ (1 Kọr. 13:5) Okokohọ ubrotọ na yọ oke nọ a ruẹrẹ họ nọ Jihova o re ro wuhrẹ omai, yọ te emaha te ekpako a rẹ sai dhesẹ adhẹẹ kẹ ọruẹrẹfihọ nana ẹkwoma ọ uruemu rai eva ogege okokohọ na gbe eria efa.—Aiz. 54:13.
6 Uruemu uwoma mai o rẹ sae whaha eme iyoma nọ a rẹ ta kpahe omai je si ahwo ziọ egagọ uzẹme. (Mat. 5:16; 1 Pita 2:12) Jọ ahwo kpobi nọ ma nya ku eva okokohọ ubrotọ mai na a wo isẹi iwoma ẹkwoma uruemu mai gbe oghẹrẹ nọ ma yeri kugbe ai. Evaọ edhere ọnana, ma ti ‘dhesẹ oma mai fihọ oriruo uruemu ezi’ jẹ rọ orro kẹ Jihova.—Tait. 2:7.
[Study Questions]
1. Fikieme o jẹ mae gwọlọ nọ ma rẹ yọrọ oma kpahe uruemu mai eva obọ okokohọ ubrotọ na?
2. Eme ma re wo họ iroro kpahe ọruẹrẹfihotọ iwou?
3. Ẹvẹ ma sai ro “ru iruo ezi kẹ ahwo kpobi” eva ehọtẹle nọ ma wohọ?
4, 5. Ẹvẹ emọ e sae rọ wha ujiro se Jihova, kọ didi owha-iruo esẹgbini i wo?
6. Okpomahọ vẹ uruemu uwoma mai o rẹ sai wo kpahe amọfa?
[Box on page 4]
Roro kẹ Amọfa
▪ Rawo uwou nọ whọ m’omaa nọ whọ te rehọ na ọvo
▪ Wo odiri evaọ okenọ ahwo nọ a wohọ iwou a te bi no iwou na gbe okenọ amọfa a tẹ be rueva
▪ Whọ rehọ ekwakwa ehọtẹle hayo oria nọ who wohọ na ro ruiruo epanọ u j’owhẹ hẹ
▪ Romatotọ nya lele izi ehọtẹle na
▪ R’oma totọ sẹro emọ ra