Ẹkpẹti Onọ
◼ Didi oghẹrẹ ẹgọ u fo nọ ma rẹ wha nọ ma te bi kpohọ Ọgwa Uvie, Ọgwa Okokohọ, gbe Iwou Ogha?
Wariẹ akpọ na họ, Egwa Uvie, Egwa Okokohọ, gbe iwou ogha yọ eria nọ a ro mudhe kẹ egagọ Jihova. Fikinọ eria enana e rrọ kpatiẹ, fuafo, yọ a be rẹrote ai ziezi, e rẹ were ohwo oma. I wo ohẹriẹ gaga no oware nọ ma be jọ akpọ Setan ruẹ ẹsibuobu. U fo nọ ahwo nọ a bi kpohọ eria nọ a ro mudhe kẹ egagọ Jihova a re dhesẹ via re inọ a rrọ kẹ Jihova, je bi ru oreva riẹ.
Mai nọ ma rrọ Ileleikristi uzẹme, ma rẹ jọ eva eware kpobi “dhesẹ oma mai, wọhọ iruiruo Ọghẹnẹ,” te evaọ ẹgọ gbe osẹ mai nọ o rẹ jọ kpatiẹ wowoma. (2 Kọr. 6:3, 4) O tẹ jẹ gwọlọ mi omai nọ ma dhesẹ emamọ uruemu. U fo nọ ẹgọ gbe osẹ mai u re dhesẹ oghẹrẹ ọghọ nọ u fo nọ idibo Jihova Ọghẹnẹ a re wo ẹsikpobi. Onana o mae roja nọ ma te bi kpohọ uwou ogha nọ o rrọ Igieduma, jegbe oria nọ u wuzou iruo Isẹri Jihova evaọ New York gbe iwou-ogha efa wariẹ akpọ na họ.
Bi dhesẹ epanọ emamọ ẹgọ gbe osẹ u wuzou te, obe na A Koko Omai Họ re Ma Ru Oreva Jihova o ta nọ ẹfuọ ugboma, ẹgọ ọkpakpatiẹ, gbe osẹ uwowoma o roja nọ ma te bi kpohọ usiuwoma ota gbe iwuhrẹ. Kẹsena, evaọ ẹwẹ-obe avọ 138, edhe-ẹme avọ 3, o tẹ ta nọ: “Kareghẹhọ, otofa Ebẹtẹle họ ‘Uwou Ọghẹnẹ.’ Fikiere, ẹgọ mai, osẹ, gbe uruemu mai o rẹ jọ wọhọ ẹsenọ ma bi kpohọ iwuhrẹ eva Ọgwa Uvie.” Iwhowho-uvie kpobi makọ enọ e rrọ ekẹloma gbe enọ i bi no ugbothabọ ze ziọ Ebẹtẹle a re lele utee ukpehru nana. Enẹ oruo, enọ i weze ziọ Ebẹtẹle a re ro dhesẹ nọ a wo ovuhumuo gbe adhẹẹ kẹ oria na.—Ol. 29:2.
U fo re ẹgọ mai o dhesẹ omai wọhọ enọ e be gọ Ọghẹnẹ. (1 Tim. 2:10) Emamọ ẹgọ gbe osẹ o rẹ lẹliẹ amọfa rọ emamọ ubiẹro rri egagọ Jihova. Rekọ, ma muẹrohọ no inọ, inievo-emezae gbe erọ emetẹ jọ a te bi kpohọ eria nọ e rrọ kẹ egagọ Jihova, a be hae wha ẹgọ nọ ọ rẹ whọhọwhọhọ hayo nọ o re dhesẹ oma rai via. Oghẹrẹ ẹgọ otiọye o fo kẹ Ileleikristi oke ovo ho. Evaọ ẹme nana, wọhọ epanọ o rrọ evaọ kabọ kabọ uzuazọ Oleleikristi, ma gwọlọ nọ ma rẹ yọrọ utee ukpehru nọ u ru ahwo Ọghẹnẹ wo ohẹriẹ no akpọ na, je ru eware kpobi rọ kẹ Ọghẹnẹ oruaro.—Rom 12:2; 1 Kọr. 10:31.
Fikiere, okekpobi nọ who te bi kpohọ uwou-ogha jọ kpobi evaọ akpọ na, nọ omara nọ: ‘Kọ ẹgọ gbe osẹ mẹ na o rrọ kpatiẹ, fuafo, je wo ọghọ wọhọ epanọ oria nọ me bi kpohọ na o rrọ? Kọ o be wha ujiro se Ọghẹnẹ nọ mẹ be gọ? Kọ ẹgọ mẹ na o ti ru amọfa zoruẹ hayo kẹ ae uye?’ Joma rọ ẹkwoma ẹgọ gbe osẹ mai rọ wha ‘eru họ uwuhrẹ Ọghẹnẹ Osiwi mai’ ẹsikpobi!—Tait. 2:10.