Ẹkpẹti Onọ

◼ Fikieme ma jẹ yọrọ oma gaga kẹ ẹgọ gbe osẹ mai okenọ ma te bi weze kpohọ iwou Society evaọ Brooklyn, Patterson, gbe Wallkill, New York, gbe iwou-ogha nọ e rọ akpọ na soso?

U fo re Ileleikristi a gọ emamọ ẹgọ. Eva oke kpobi ẹgọ gbe osẹ mai u re dhesẹ ẹkpatiẹ gbe orro nọ u fo idibo Jihova Ọghẹnẹ. Onana o mae rọ ere okenọ ma te bi weze kpohọ iwou Society evaọ New York gbe eva iwou-ogha nọ e rọ akpọ na kpobi.

Evaọ 1998, a ti ru ikokohọ ubrotọ gbe erọ akpọ-soso. Idu inievo mai buobu no ekwotọ buobu ze a ti weze kpohọ oria nọ u w’uzou ọrọ Society na evaọ New York jegbe iwou-ogha evaọ erẹwho efa. Orọnikọ okenọ ma te bi weze kpohọ iwou enana ọvo ho rekọ evaọ oke ọfa kpobi, u fo re ma ‘dhesẹ oma mai wọhọ egbodibo Ọghẹnẹ evaọ edhere kpobi,’ te ẹgọ gbe osẹ uwoma mai.—2 Kọr. 6:3, 4.

Nọ o jẹ t’ẹme kpahe emamọ ẹgọ gbe osẹ, Organized to Accomplish Our Ministry o t’ẹme kpahe ẹgwọlọ ẹfuọ ugboma, ẹgọ ọkpakpatiẹ, gbe osẹ uwoma evaọ okenọ ma tẹ rọ usiuwoma gbe okenọ ma te bi kpohọ iwuhrẹ Ileleikristi. Evaọ ẹwẹ-obe avọ 131, edhe-ẹme avọ 2, o ta nọ: “Epọvo na o rẹ jọ nọ who te bi weze kpohọ uwou Ebẹtẹle evaọ Brooklyn hayo uwou-ogha Society na jọ. Kareghẹhọ, otofa Ebẹtẹle họ ‘Uwou Ọghẹnẹ,’ fikiere ẹgọ, osẹ gbe uruemu mai o rẹ jọ oghẹrẹ onọ a gwọlọ mi omai nọ ma te bi kpohọ iwuhrẹ kẹ egagọ eva Ọgwa Uvie na.” Iwhowho Uvie nọ i bi no ekẹloma na ze gbe enọ i bi no ugbothabọ ze te kpahe ahwo uviuwou Ebẹtẹle na gbe enọ i bi weze kpohọ iwou-ogha na a re koko ute ukpehru ovo onana.

U fo re ẹgọ mai o kpomahọ amọfa wowoma kpahe oghẹrẹ nọ a re rri egagọ Jihova. Ghele na, ma muẹrohọ no nnọ okenọ a te bi weze kpohọ iwou Society na, inievo jọ a be g’ẹgọ whọhọ gaga. Ẹgọ otiọye na o kiehọ họ evaọ okenọ a te bi weze kpohọ iwou Ebẹtẹle kpobi. Evaọ ẹme ọnana, wọhọ epanọ o rọ kpahe abọ uzuazọ Ileleikristi mai efa, ma gwọlọ yọrọ ute ukpehru ovo na nọ o hẹriẹ ahwo Ọghẹnẹ no akpọ na ẹkwoma eware kpobi nọ ma re ru kẹ oruaro Ọghẹnẹ. (Rom 12:2; 1 Kọr. 10:31) U kiehọ re re ma ta eme enana kẹ emọ-uwuhrẹ Ebaibol mai gbe amọfa nọ i bi weze kpohọ Ebẹtẹle evaọ oke ọsosuọ jẹ kareghẹhọ ai epanọ u wuzou te re a rẹro te emamọ ẹgọ gbe osẹ.

Nọ who te bi weze kpohọ iwou Society, nọ oma ra nọ: ‘Kọ ẹgọ gbe osẹ mẹ na u kiehọ?’ (Wawo Maeka 6:8.) ‘Kọ o sae wha orro se Ọghẹnẹ nọ mẹ be gọ na? Kọ ẹgọ na ọ te lẹliẹ amọfa galova vi omẹ hayo dhae eva? Kọ me bi fi emamọ oriruo họ kẹ amọfa nọ i bi weze nya evaọ orọ ọsosuọ rai?’ Ẹsikpobi, joma rehọ ẹgọ gbe osẹ mai “rehọ eru kẹ uwuhrẹ Ọghẹnẹ Osiwi mai.”—Taitọs 2:10.