Owowa Evaọ Ẹgọ gbe Osẹ
1 “Ezae na kpobi, makọ emaha na dede, a gba ota. Eyae gbe emetẹ na kpobi, te emọ ikpe ikpegbọ gbe emaha, a wha egane hayo eskẹte. A rẹ ruẹ ijinsi hayo ohwo nọ o kpe udu fihọ họ. Ohwo kpobi evaọ etenẹ o bi lo.” Ere usi iyẹrẹ jọ o ta. Didi oghẹrẹ ahwo u je dhesẹ na? Ahwo nọ a bi luje ivotu? Oria oma-ukokohọ arozaha? Arozaha ile-igbe? Vievie! U je dhesẹ utu inievo jọ evaọ okokohọ ubrotọ ologbo jọ evaọ ukpe n’ukpo.
2 Evaọ okpẹwho okokohọ ọfa, ọniyẹrẹ ọ obe-awhusi jọ o dhesẹ ogbotu ọ Isẹri na enẹ: “Ezae na kpobi a jọ tẹtẹtẹ a tẹ jẹ wha ikotu gbe ota. Eyae na a sẹ owowa rekọ avọ erru.” Oriughe avivẹ jọ, ọnọ ọ rrọ oroiro, ọ ta nnọ: “Whai yọ ahwo emamọ uruemu, avọ adhẹẹ, fuafo, jẹ rrọ kpatiẹ. Oware nọ mẹ ruẹ u siuru. Evaọ akpọ ogbegbe ọnana, wha dao oma si uluhu no oma!” Isẹri nọ a kẹ kpahe omai na i woma kẹhẹ! Kọ ma gbẹ be kẹ uyere inọ a ta eme ezi itieye kpahe ogba inievo mai na? Uzẹme, ahwo kpobi nọ a jọ ogbotu na a zọhọ fihọ iyẹrẹ iwoma na ẹkwoma ẹgọ gbe osẹ oriruo rai.
3 A riẹ omai no evaọ akpọ na soso fikinọ ma wo ohẹriẹ uvevẹ evaọ ẹgọ gbe osẹ. (Mal. 3:18) Fikieme? Keme ma bi lele uduotahawọ Ikereakere na re “[ma] gọ umutho-ẹgọ nọ [o] re fo, avọ omaurokpotọ, . . . utionọ u fo kẹ [enọ] e rọ egagọ.”—1 Tim. 2:9, 10.
4 Eme Whọ be Rehọ Ẹgọ gbe Osẹ Ra Dhesẹ Via? Ewu nọ ma kuhọ gbe oghẹrẹ nọ ma ku rie họ o rẹ t’ẹme jọ kpahe omai—ẹrọwọ mai, uruemu mai, gbe ẹjiroro mai. Oghẹrẹ ikako nọ ma salọ u re dhesẹ oghẹrẹ ohwo nọ ma rrọ gbe oware nọ ma dikihẹ kẹ. Ma rẹ kpare iroro gbe uruemu ogbekuo nọ akpọ na o bi jiri na kpehru vievie he. Ọdawẹ mai orọnikọ sọ oghẹrẹ osẹ jọ u bu ona hrọ họ rekọ sọ u fo kẹ ohwo nọ o se oma riẹ ọgbodibo Ọghẹnẹ. (Rom 12:2) Ukpenọ ma rẹ salọ ona nọ u re dhesẹ ẹzi ọ mẹrẹjomẹsa hayo onọ u dhesẹ uzuazọ ọfariẹ-ogbe, ma gwọlọ dhesẹ nnọ ma be ghinẹ kẹ “Ọghẹnẹ orro.”—1 Pita 2:12.
5 Ẹsejọ, ohwo ọkpokpọ, ohwo nọ o ti wo eriariẹ tere he, hayo ọnọ o whrehe evaọ abọ-ẹzi ọ rẹ sae jẹ oware kpobi nọ akpọ na ọ be wha haro evaọ ẹgọ gbe osẹ rehọ ababọ ẹkaki roro kpahe epanọ u re kpe oma họ Jihova gbe ukoko riẹ. Mai kpobi ma rẹ sae kiẹ omobọ mai riwi re ma ruẹ sọ iroro akpọ na i kpe oma họ omai no. Ma rẹ sae t’ẹme kugbe oniọvo nọ o wo adhẹẹ, nọ ọ kpako evaọ abọ-ẹzi ma vẹ ta kẹe re ọ rehọ oruọzewọ muẹrohọ oghẹrẹ ona ọ ewu gbe osẹ mai ma ve roro kpahe iroro-ejẹ nọ a k’omai na gaga.
6 Ahwo jọ a rẹ rọwo vẹrẹvẹrẹ nnọ u fo re a yọrọ oma kpahe oghẹrẹ nọ a rẹ gọ ẹgọ evaọ okenọ a tẹ rrọ evaọ okokohọ na. Rekọ a ve go ute rai kpotọ evaọ etoke iruẹru eriosehọ nọ okokohọ ọ tẹ fa no. Yọrọ ute ukpehru nọ u fo kẹ egbodibo Ileleikristi. (2 Kọr. 6:3, 4) Oria kpobi nọ ma nya evaọ ẹgbede, ekade okokohọ mai kugbe emamọ ẹgọ gbe osẹ mai u re dhesẹ omai wọhọ Isẹri Jihova. Fikiere, u fo re ewu mai ọ jọ kpatiẹ avọ owowa, dhesẹ nnọ ma “rọ erọ akpọ na ha.”—Jọn 15:19.
7 Joma dawo oma mai kpobi evaọ Okokohọ Ubrotọ “Iwhowho Uvie Ajọwha” ọrọ enukpe nana re ma dhesẹ nnọ mai yọ “ahwo aghọ kẹ ỌNOWO na Ọghẹnẹ [mai].” Emamọ odẹ nọ u re noi ze u re fiba ‘ajiri gbe usi gbe adhẹẹ’ Jihova.—Izie. 26:19.
[Box on page 6]
Oghẹrẹ nọ A rẹ rọ Kẹ Jihova Orro:
■ Gọ ẹgọ evaọ edhere nọ o fo ọgbodibo Ọghẹnẹ.
■ Whaha oghẹrẹ ikako nọ i re dhesẹ ẹzi akpọ na.
■ Dhesẹ owowa, onọ u re dhesẹ iroro-egbagba.