Ru Ẹgwọlọ Abọ-Ẹzi Ra Gba
1 Okokohọ Ubrotọ “Iwhowho Uvie Ajọwha” mai nọ ọ be tha na ọ k’omai obọdẹ uvẹ nọ ma re ro ru ẹgwọlọ abọ-ẹzi mai gba. Wọhọ emamọ emu iwo, ọruẹrẹfihotọ na ọ te “rehọ eme orọwọ na” ru omai oma kpokpọ. (1 Tim. 4:6) O te lẹliẹ omai si kẹle Jihova viere. Yọ ma rẹ sai rẹro nọ ma ti wo uthubro gbe uduotahawọ nọ i ti fi obọ họ k’omai thihakọ edawọ evaọ izuazọ mai. Jihova ọ k’omai imuẹro inọ: “Me re ti wuhrẹ owhẹ dhesẹ kẹ owhẹ edhere nọ whọ rẹ te nya; ẹro mẹ me re ti ro su owhẹ.” (Ol. 32:8) Ẹvẹ oghale riẹ o rro te nọ ma bi ro wo ọkpọvio oyoyou riẹ evaọ izuazọ mai! Roro kpahe emamọ eware jọ nọ ma re ru ro wo erere nọ ọ mae rro no ọruẹrẹfihotọ okokohọ na ze.
2 O Gwọlọ re Ma Ruẹrẹ Udu Mai Kpahe: Omomọvo mai o wo owha-iruo nọ ọ rẹ rọ sẹro udu ẹwoho riẹ. (Itẹ 4:23) Onana o gwọlọ nnọ ma re dhesẹ uruemu oma-use-bruthe gbe oma oruọzewọ. Okokohọ na yọ etoke nọ ma re ro roro kpahe usu mai kugbe Jihova, oke nọ ma re ro ‘riwi ruọ eva uzi ufuoma nọ o gba kiete na.’ Re ma ruẹrẹ udu mai họ kẹ ‘ẹjẹrehọ ekakọ ẹme na,’ u fo re ma lẹ Jihova re ọ kiẹ omai riwi, re ọ riẹ obọ họ “edhere umuomu” kpobi nọ o rrọ eva mai nọ o gwọlọ ẹkpọvi, re o su omai nya “edhere ebẹdẹ bẹdẹ.”—Jem. 1:21, 25; Ol. 139:23, 24.
3 Gaviezọ je Roro: Jesu o jiri Meri fikinọ ọ gaviezọ gaga kẹ ẹme riẹ, ọ ta nnọ: “Meri ọ ha abọ owoma no, nọ a rẹ sai mi ei hi.” (Luk 10:39, 42) Ma te wo oghẹrẹ iroro evona, ma rẹ kuvẹ re eware esese i mi omai ezọgaviẹ mai hi. Ma rẹ ruẹ nnọ ma keria jẹ be gaviezọ evaọ etoke ọruẹrẹfihotọ na kpobi. Ma rẹ whaha ẹmeọta hayo omunya ma vẹ jẹ yọrọ oma re ma siọ amọfa ba ekpokpo ẹkwoma ifonu, pager, ekamẹra, gbe ividio-ifoto.
4 Okenọ ma be gaviezọ kẹ eme na, u re woma re ma kere umutho eme jọ fihọ otọ re u fi obọ họ k’omai mu ẹro họ oghẹrẹ nọ ẹme na ọ be nya riwi. U fo re ma zuẹ oware nọ ma bi yo na kugbe onọ ma riẹ no vẹre. Onana u ti fi obọ họ k’omai w’otoriẹ ẹme na je ru ei daji iroro mai. Okenọ ma tẹ be kiẹ eme nọ ma kere riwi, o gwọlọ re ma ru ere avọ iroro efihiruo ẹme na. Mai omomọvo ọ rẹ sae nọ inọ: ‘Ẹvẹ onana u ro kpe oma họ usu mẹ kugbe Jihova? Inwene vẹ o gwọlọ nọ me re ru evaọ uzuazọ mẹ? Ẹvẹ mẹ sai ro fi ovuẹ nana họ iruo evaọ eyerikugbe amọfa? Ẹvẹ mẹ sae rọ rehọ iẹe ru iruo evaọ odibọgba mẹ?’ Lele amọfa t’ẹme kpahe igogo eme nọ e were omai gaga. Eruo eware nana u ti fi obọ họ k’omai sẹro eme Jihova ‘evaọ eva mai.’—Itẹ 4:20, 21.
5 J’Oma Fi Eware nọ Ma Bi Wuhrẹ Họ Iruo: Nọ o kpohọ okokohọ ubrotọ jọ no, oniọvo jọ ọ tẹ ta nnọ: “Ọruẹrẹfihotọ na o duobọte omomọvo gaga, o rẹ wọ ohwo kiẹ uyero udu riẹ gbe orọ uviuwou riẹ riwi, jẹ kẹ obufihọ Ikereakere uyoyou nọ u fo. U ru omẹ riẹ kpahe owha-iruo mẹ re mẹ rehọ uketha kẹ ukoko na viere.” Ẹsejọhọ ibuobu mai a roro epọvo na no re. Rekọ u te he re ma kpo avọ iroro ọbọga gbe oma-osasa ọvo. Jesu ọ ta nnọ: ‘Wha tẹ riẹ eware nana wha je ru ai wha re wo oghale.’ (Jọn 13:17) Ma re fi eme nọ i kie kpahe omai dẹẹ họ iruo avọ osegboja hrọ. (Fil. 4:9) Onana họ usiavẹ ọ erugba ẹgwọlọ abọ-ẹzi mai.
[Box on page 5]
Roro Didi Kpahe Eware nọ Who Yo Na:
■ Ẹvẹ u ro kpe oma họ usu mẹ kugbe Jihova?
■ Ẹvẹ u ro kpe oma họ oghẹrẹ nọ me re yeri kugbe amọfa?
■ Ẹvẹ mẹ sae rọ rehọ iẹe ru iruo evaọ odibọgba mẹ?