Gaviezọ re Who Wuhrẹ
1. Eware vẹ i re ru ei jọ bẹbẹ kẹ omai re ma gaviezọ je wuhrẹ evaọ okokohọ ubrotọ na?
1 Ikokohọ ẹgbukpe 2013 na i ti muhọ kẹle. A ruẹrẹ eware buobu kpahe no ma te reawere rai evaọ okokohọ ubrotọ na nọ i ti fi obọ họ kẹ idibo Jihova nọ e rrọ akpọ na soso. Kọ whọ ruẹrẹ oma kpahe no re whọ jariẹ evaọ edẹ esa nọ a ti ru okokohọ na? Eware buobu e riẹ nọ e rẹ sai si iroro mai no eware nọ ma ti wuhrẹ na, fikiere ma rẹ daoma gaga re ma gaviezọ ziezi. Oke nọ ma rẹ rọ keria gaviezọ evaọ okokohọ u re theri vi oke nọ ma re ro ru iwuhrẹ evaọ obọ Ọgwa Uvie. U te no ere no, ugbo nọ ma te dhẹ re ma te te Ọgwa Okokohọ na gbe eware efa e rẹ sai ru oma rrọ omai. Eme o re fi obọ họ kẹ mai gaviezọ je wuhrẹ evaọ okokohọ na?—Izie. 31:12.
2. Ẹvẹ ma sae rọ ruẹrẹ udu mai kpahe kẹ okokohọ na?
2 Taure Okokohọ na O te ti Muhọ: Iprogramo okokohọ na o rrọ Oria Evuẹ mai, www.jw.org/iso, yọ uzoẹme kpobi nọ a te jọ okokohọ na ta kpahe e riẹe eva, avọ oria Ebaibol ọvo hayo ivẹ jọ nọ a rehọ ẹme na no ze. Otẹrọnọ ma sai kpohọ Itanẹte, u ti woma re ma rri izoẹme na je se eria Ebaibol na re e ruẹrẹ udu mai kpahe kẹ eme nọ ma ti yo. (Ẹzra 7:10) Evaọ Egagọ Uviuwou rai, u fo re wha ta kpahe eware nana taure oke okokohọ na u te ti te.
3. Eme o ti fi obọ họ kẹ omai gaviezọ ziezi?
3 Evaọ Etoke Okokohọ Na: O tẹ lọhọ, daoma kpohọ oria ame-okuo na taure a te ti mu ole họ ẹso. U ti woma re who furie ifonu ra. Onana u ti ru nọ ahwo a gbe ro se owhẹ hayo vi uwou se owhẹ hẹ, yọ u ti ru nọ who gbe ro vi uwou se amọfa ha. Otẹrọnọ o gbahọ nọ who re furie ifonu ra ha, si edo noi no re ọ siọ amọfa ba ekpokpo nọ ohwo jọ o te se owhẹ. Otẹrọnọ ekọmputa ọsese nọ a rẹ wha lele oma o rrọ owhẹ obọ, rehọ iẹe ruiruo evaọ edhere nọ o gbe ro kpokpo amọfa ha. Daoma whaha emu nọ whọ rẹ re hayo oware nọ whọ rẹ da nọ a te mu ẹme họ no. (Ọtausi. 3:1) Tẹrovi oniọvo nọ o bi ru ẹme na. Nọ a te bi se oria Ebaibol jọ, rovie Ebaibol ra je rri lele iei. Kere umutho eware jọ fihọ otọ.
4. Ẹvẹ esẹgbini a sai ro fi obọ họ kẹ emọ rai re a gaviezọ je wuhrẹ?
4 Ma gwọlọ nọ emọ mai a rẹ gaviezọ je wuhrẹ re. Itẹ 29:15 o ta nọ: “Ọmọ nọ a vuwa ọ rẹ rehọ omovuọ se oni riẹ.” Fikiere, u fo nọ ahwo uviuwou a rẹ keria oria ovo re esẹgbini a ruẹ nọ emọ rai a be gaviezọ kẹ ẹme nọ a be ta viukpenọ a re ru edo, rọ ifonu vi uwou se ahwo, hayo nya ogbẹnya. O tẹ make rọnọ emọ na a re kpako te ahwo nọ a re wo otoriẹ eme nọ a be ta na ha, esẹgbini a rẹ sai wuhrẹ emọ na re a fọ tou jẹ seba ẹwezẹ.
5. Fikieme u ro fo nọ ma rẹ kiẹ eware nọ ma wuhrẹ evaọ okokohọ na riwi, kọ ẹvẹ ma sai ro ru ere?
5 Nọ Ọruẹrẹfihọ Okpẹdoke U te Kuhọ No: Who lehie otafe kri ga hrọ họ. Daoma kaki kiẹzẹ. Nọ whọ tẹ kiẹ eware nọ who wuhrẹ evaọ ẹdẹ yena riwi, u re fi obọ họ kẹ owhẹ kareghẹhọ ae oke krẹkri. Fikiere, u ti woma re ahwo uviuwou na a rọ omoke jọ ta kpahe eware nọ a wuhrẹ evaọ ẹdẹ yena. Otẹrọnọ whẹ avọ egbẹnyusu ra wha bi kpohọ oria nọ a rẹ jọ zẹ emu, daoma wha omobe nọ who kere eware fihọ na lele oma, re wha ta kpahe eware jọ nọ e were owhẹ evaọ ẹdẹ yena. Nọ wha te no okokohọ na te uwou no, wha ta kpahe eware nọ wha wuhrẹ na gbe epanọ wha ti ro fi ai họ iruo evaọ Egagọ Uviuwou rai. Wha sai je fi oke họ nọ wha re ro se ebe nọ a siobọno.
6. Kọ okokohọ na nọ ma rẹ nya ọvo u te? Ru ei vẹ.
6 Nọ ohwo o te there emu kẹ owhẹ, whọ gbẹ re emu na ha, emu na ọ rẹ sae jọ oma ra ruiruo ho. Ere eware nọ a ruẹrẹhọ kẹ omai evaọ okokohọ ubrotọ na e rrọ re. Fikiere, joma daoma jọ okokohọ na evaọ edẹ esa na, gaviezọ ziezi, je fi eware nọ ma ti wuhrẹ họ iruo.