“Koko Ahwo na Họ”
1. Ẹvẹ ma sae rọ ta nọ ikokohọ ubrotọ gbe erọ akpọ-soso mai e wọhọ onọ emọ Izrẹl a ru nọ a nwani no Ijipti no?
1 Nọ emọ Izrẹl a nwani no Ijipti no, Jihova ọ tẹ ta kẹ Mosis nọ o “koko ahwo na họ” Ugbehru Saena re a gaviezọ kẹ ẹme riẹ, a vẹ sae dhozọ riẹ jẹ rọ ẹme riẹ wuhrẹ emọ rai. (Izie. 4:10-13) Omakugbe yena o rẹ thọrọ ae ẹro vievie he, yọ o bọ ẹrọwọ rai ga ziezi. Evaọ emerae nọ e be tha na, idibo Jihova a ti ru ikokohọ ubrotọ gbe erọ akpọ-soso, enọ Jihova ọ te jọ wuhrẹ ai. Eme ma re ru re ma sai wo erere vọvọ?
2. Eme ma re ru re ma sae “ruẹrẹ oma kpahe” kẹ okokohọ nọ o be tha na?
2 “Ruẹrẹ Oma Kpahe”: Jihova o juzi kẹ emọ Izrẹl nọ a “ruẹrẹ oma kpahe” kẹ omakugbe obọ Ugbehru Saena nọ o rẹ thọrọ ẹro ho na. (Ọny. 19:10, 11) Epọvo na re, o gwọlọ nọ mai kpobi nọ i ti kpohọ okokohọ na ma rẹ ruẹrẹ oma kpahe, orọnikọ enọ i ti ru ẹme ọvo ho. Wọhọ oriruo, o gwọlọ nọ inievo jọ a re mi uvẹ evaọ oria iruo rai. Ẹsejọhọ uyero ra o wọhọ orọ Nehemaya nọ ọ jọ ọwọ-egho Atagzazis ovie na. Okenọ ọ gwọlọ nyae bọ igbẹhẹ Jerusalẹm, ọ riẹ nọ ẹsejọhọ ovie na ọ te rọwo kẹe he. Nehemaya ọ tẹ lẹ se Jihova, kẹsena o te fi ẹme na họ ziezi rọkẹ ovie na. Ọ kẹ riẹ uvẹ nya jẹ tubẹ kẹe eware nọ ọ rẹ rọ bọ igbẹhẹ na. (Neh. 2:1-9) U te no uvẹ nọ who re mi ọga iruo ra no, kọ who ru ọruẹrẹfihotọ epanọ who ti ro te obei gbe oria nọ who ti wohọ no? Ekpako ukoko a ti fiobọhọ kẹ ohwo nọ ọ gwọlọ obufihọ. Daoma hae kaki te obei re a jọ iraro ra muhọ, oware kpobi nọ who yo, whọ vẹ jẹ “yọriẹe whawha.”—Hib. 2:1.
3. Eme o ti fiobọhọ kẹ omai ruẹrẹ udu mai kpahe kẹ okokohọ na?
3 Obọdẹ edhere ọfa nọ ma rẹ rọ ruẹrẹ oma kpahe họ, ma rẹ ruẹrẹ udu mai kpahe re ma gaviezọ re ma sai wuhrẹ oware jọ kpo. (Ẹzra 7:10) Ma fi iprogramo okokohọ na họ Oria Evuẹ jw.org no, yọ whọ te jọ eva riẹ ruẹ uzoẹme kpobi nọ a te jọ okokohọ na ta kpahe, avọ oria Ebaibol ọvo hayo ivẹ jọ nọ a rehọ ẹme na no ze. U ti woma re wha rehọ ae ru Egagọ Uviuwou umutho eka jọ taure wha te ti kpohọ okokohọ na. Inievo jọ a re printi iprogramo na re a kere eware fihọ iẹe evaọ obọ okokohọ na.
4. Ẹvẹ esẹgbini a sai ro wuhrẹ emọ rai evaọ etoke okokohọ na gbe okenọ a te te uwou?
4 ‘Wuhrẹ Emọ Ra’: Ẹjiroro jọ nọ Jihova ọ rọ ta nọ emọ Izrẹl a kokohọ Ugbehru Saena họ, re esẹgbini a “wuhrẹ emọ rai.” (Izie. 4:10) Okokohọ nọ ma be te nya na yọ obọdẹ uvẹ jọ nọ esẹgbini a re ro wuhrẹ emọ rai re. Jọ esẹgbini a ruẹ nọ emọ rai a keria kugbe ai re a fiobọhọ kẹ ae gaviezọ. Nọ okokohọ okpẹdẹ na o te kuhọ no, wha ta kpahe eware nọ wha wuhrẹ, wha vẹ jẹ kiẹ ae riwi evaọ etoke egagọ uviuwou rai.
5. Irere vẹ i ti te omai nọ ma te kpohọ okokohọ nọ o be tha na?
5 Okokohọ nọ emọ Izrẹl a ru evaọ Ugbehru Saena na u fiobọhọ kẹ ae vuhumu epanọ uvẹ-ọghọ nọ a wo o rro te nọ a rọ rrọ idibo Ọghẹnẹ. (Izie. 4:7, 8) Okokohọ nọ ma be te nya na o ti fiobọhọ kẹ omai ru epọvo na re. Evaọ edẹ esa nana, ma te kpairoro vrẹ akpọ Setan nọ o duwu ku na, ma vẹ reawere ẹme Ọghẹnẹ gbe omakugbe inievo mai. (Aiz. 35:7-9) Jọ mai kpobi ma daoma rọ uvẹ nana kuomagbe bọ ohwohwo ga, nọ ẹdẹ Jihova o bi si kẹle na.—Hib. 10:24, 25.