‘Gaviezọ Re Whọ Rehọ Ithubro Efa’
1 Obe Itẹ u dhesẹ areghẹ wọhọ ẹsenọ o bi woro nọ: “Wha yo, keme mẹ bete ta uvi ẹme kẹ owhai, [eme nọ] ikiehọ i reti no unu mẹ tha; me wo unuovẹvẹ gbe uvi areghẹ, . . . gaviezọ mẹ; eva ewerọ i te otu nọ o bi lele idhere mẹ. Keme ọnọ ọ gwọlọ omẹ ruẹ ọ gwọlọ uzuazọ ruẹ o re wo ohrọoriọ no obọ ỌNOWO na tha.” (Itẹ 8:6, 14, 32, 35) Eme eyena e nwani dhesẹ uthubro nọ o be hẹrẹ omai evaọ Okokohọ Ubrotọ “Otu-Iwuhrẹ Ẹme Ọghẹnẹ” na ziezi.
2 A kiẹ ẹgwọlọ okugbe-inievo akpọ-soso na riwi no, yọ a ru ọruẹrẹfihotọ okokohọ na re o duobọte ẹgwọlọ eyena. Emamọ uthubro abọ-ẹzi gbe iroro-ejẹ nọ a te kẹ na, otẹrọnọ a fi rai h’iruo, e rẹ sai fiobọhọ k’omai wereva, yọrọ emamọ usu kugbe Jihova, jẹ daji edhere nọ o re su kpohọ uzuazọ ebẹdẹ bẹdẹ. Ababọ avro, ma wo emamọ ẹjiroro nọ ma rẹ rọ ‘gaviezọ jẹ rehọ ithubro efa.’—Itẹ 1:5.
3 Taure Ọruẹrẹfihotọ na O te ti Muhọ: Re ma wo erere vọvọ no eware nọ a te ta ze, u fo re ma jọ oria ẹkeria mai jẹ ruẹrẹ iroro mai họ evaọ okenọ ọruẹrẹfihotọ na o bi muhọ na. Onana o gwọlọ emamọ omaruẹrẹhọ. Ugogo obufihọ jọ họ kaki muhọ. Kaki kiẹzẹ evaọ aso taure abọ okokohọ na o te te. Kake kparoma re ekru ra kpobi a ruẹ oke rọ ruẹrẹ oma kpahe je there emu nọ a rẹ ria. Kaki te oria okokohọ na re whọ sae gwọlọ oria ẹkeria jẹ rẹrote eware nọ i fo taure ọruẹrẹfihotọ na o te ti muhọ. Ọruẹrẹfihotọ na o ti muhọ evaọ 9:20 a.m. evaọ Edisoi-Oka, ọ vẹ rehọ 9:00 a.m. muhọ evaọ Ẹdẹ-Ọmaha gbe Ẹdoka.
4 Nọ orọnọ ugogo ẹjiroro omakugbe mai họ re ma jiri Jihova “eva udevie ogbotu na,” abọ ọvuọvo o re rovie evaọ edhere nọ ọ rẹ kẹ Ọghẹnẹ orro. (Ol. 26:12) Fikiere, ma tuduhọ ahwo kpobi awọ re a keria taure a tẹ fodẹ ole emuhọ na. Onana o rọwo kugbe ohrẹ Ikereakere na: “U fore a ru eware kpobi ziezi gba kiete.” (1 Kọr. 14:40) Eme oyena u dhesẹ kẹ omomọvo mai? Nọ whọ tẹ ruẹ ohwo-agbara na nọ ọ keria eplatfọmo na evaọ etoke ikporakporo na, nwane nya kpohọ oria ẹkeria ra. Onana o te k’owhẹ uvẹ w’obọ evaọ ole nọ a bi ro rovie abọ ọvuọvo na n’udu ze, be kpare ujiro se Jihova.—Ol. 149:1.
5 Evaọ Etoke Ọruẹrẹfihotọ Na: Ẹzra “ọ [ruẹrẹ] udu riẹ kpobi rọ kẹ ewuhrẹ uzi ỌNOWO na, re o je koko iei.” (Ẹzra 7:10) Ẹvẹ ma sae rọ ruẹrẹ udu mai kpahe kẹ ẹrehọ uthubro nọ Jihova ọ be kẹ na? Nọ whọ be kiẹ izoẹme abọ sa-sa nọ e rọ iprogramo nọ a kporo via na riwi na, nọ omara inọ, ‘Eme Jihova ọ be ta k’omẹ ẹkwoma ọruẹrẹfihotọ ọnana? Ẹvẹ mẹ sae rọ rehọ ovuẹ na ro ruiruo rọkẹ erere omobọ mẹ gbe uviuwou mẹ?’ (Aiz. 30:21; Ẹf. 5:17) Hae nọ enọ eyena evaọ etoke okokohọ na kpobi. Kere igogo-eme nọ whọ jiroro nọ who ti fihọ iruo h’otọ. Rehọ oke rọ t’ẹme kpahe ae evaọ ekuhọ ẹdẹ kpobi. Onana u ti fiobọhọ k’owhẹ kareghẹhọ je fi evuẹ na h’iruo.
6 Ezọgaviẹ evaọ euwa buobu eva ẹkeriotọ ọvo o sae jọ use-abọ. Eme ọ rẹ sai fiobọhọ k’omai whaha ẹbẹbẹ ereghe iroro? Rehọ ẹgba ibiaro na ruiruo ziezi. Evaọ abọ ologbo, oware nọ ma tẹro mai vi oye u re si iroro mai rehọ. (Mat. 6:22) Fikiere, whaha okpakpa nọ whọ rẹ rọ jẹlẹ ẹro rri edo gbe onya kpobi. Tẹro ra vi oruẹme na. Rovie Ebaibol ra lele iei nọ o te bi se ikereakere, gbe rovie Ebaibol ra fihọ nọ ọ be t’ẹme kpahe ikere na.
7 Uyoyou Oleleikristi o te wọ omai re ma siọ amọfa ba ekpokpo nọ ọruẹrẹfihotọ na ọ be nyaharo na. (1 Kọr. 13:5) Onana yọ oke “nọ a rẹ rọ fọ tou” jẹ gaviezọ. (Ọtausi. 3:7) Fikiere, whaha ẹmeọta gbe onya nọ u fo ho. Ru ekpohọ oria ame-okuo kao ẹkwoma omaa-oma haro. Whọ riemu hayo d’udi hi bẹsenọ oke nọ a fihọ u re te, ajokpanọ ẹyao ọgaga jọ ọ gwọlọ e riẹ. Ahwo nọ a wha ifonu nọ i wo ufi hi, ekamẹra-ividio, gbe ekamẹra-ifoto ze a rẹ rehọ ae ruiruo evaọ edhere nọ o re kpokpo amọfa ha. Esẹ gbe ini i re ru ọruẹrẹfihọ kẹ ahwo uviuwou rai kpobi—kugbe izoge na—re a keria kugbe re a sae rẹrote emọ rai ziezi.—Itẹ 29:15.
8 Evaọ ukpe n’ukpo ọkpako jọ nọ o kpohọ ikokohọ evaọ ikpe buobu no o muẹrohọ nọ: “Me roro nọ okokohọ nana yọ ọrọ obọdẹ fiki ẹjiroro ọfa jọ. Enwenọ ahwo kpobi evaọ ogbotu na a je kere eme fihọ otọ, te emaha na. O were omẹ nọ mẹ rue riẹ. A jẹ rehọ Ebaibol ro ruiruo ziezi evaọ okenọ oruẹme ọ tẹ ta nọ a rovie kpohọ oria jọ.” Oghẹrẹ ezọgaviẹ utioye na u ghine fo ejiro. Orọnikọ o rẹ wha irere se omai gbe ibe enọ ma gbẹ ziọ okokohọ na ọvo ho rekọ maero o rẹ wha orro se Owuhrẹ Ologbo mai, Jihova Ọghẹnẹ.—Aiz. 30:20.