Omakugbe re Ma Jiri Jihova
1 Jihova o wo ogaga nọ o mai kpehru, areghẹ nọ a sae kiẹ otọ riẹ hẹ, uvi-ẹdhoguo ọgbagba, ọ tẹ jẹ rrọ ehri uyoyou. Wọhọ Ọnọma, Ọnọkẹ-Uzuazọ, gbe Osu Ehrugbakpọ, ọye ọvo o te ọnọ ma rẹ gọ. (Ol. 36:9; Evia. 4:11; 15:3, 4) Okokohọ Ubrotọ “Rehọ Oruaro kẹ Ọghẹnẹ” ọrọ enukpe nana ọ te bọ ọtamuo mai ga re ma jiri ei wọhọ Ọghẹnẹ uzẹme ọvo na.—Ol. 86:8-10.
2 O Gwọlọ Emamọ Omaa: Re ma sai wo erere vọvọ no ehaa abọ-ẹzi nọ Jihova ọ ruẹrẹ họ na ze, o gwọlọ emamọ omaa. (Ẹf. 5:15, 16) Kọ who ru ọruẹrẹfihotọ kẹ oria nọ who ti wohọ no, ofa, gbe uvẹ nọ who re mi evaọ oria iruo ra hayo obọ isukulu? Who vu eware nana nọ i w’uzou na wa bẹsenọ oke o rẹ nwẹnwẹ no ho. U te lehie owhẹ obọ hrọ re who te mi uvẹ, ẹsejọhọ abọjọ ehaa oghọghọ nana o ve ti vru mi owhẹ. U fo nọ mai kpobi ma rẹ jariẹ evaọ abọ okokohọ na kpobi.
3 Ru ei fihọ ute ra re whọ kaki te oria okokohọ na kẹdẹ kẹdẹ. Oyena o te lẹliẹ owhẹ dhoma mu evaọ oria ẹkeria ra taure a tẹ te so ole emuhọ, jẹ lẹliẹ iroro ra dọmu nọ who je yo eme nọ a be te ta na ziezi. Whọ rẹ sae se eria-ẹkeria ba kẹ ahwo uviuwou ra ọvo gbe ahwo nọ a lele owhẹ nyaze evaọ omoto ra.
4 Ma yare nọ ohwo kpobi ọ wha emu uvo riẹ lele oma viukpenọ whọ rẹ nya kpohọ otafe nyae dẹ emu nọ a te ku abọ ohiohiẹ okokohọ na họ no. Ọruẹrẹfihotọ nana nọ whọ rẹ nya lele o te zọhọ fihọ udhedhẹ okegbe na, je ru uvẹ fihọ ziezi nọ a re ro kuomagbe ibe enọ e rọwo. (Ol. 133:1-3) Iviena woi họ iroro nnọ a k’uvẹ hẹ re a wha ilolo, eglase, gbe imidhe nọ i re whu avọ idi nọ i re muẹ ziọ ogege okokohọ na.
5 Gaviezọ je Wuhrẹ: Ẹzra ọ rehọ osegboja ruẹrẹ udu riẹ họ re ọ jẹ ẹme Ọghẹnẹ rehọ. (Ẹzra 7:10) O rovie udu riẹ fihọ kẹ iwuhrẹ Jihova. (Itẹ 2:2) Ma sai muọ udu mai họ ẹruẹrẹhọ kẹ okokohọ ubrotọ na taure ma te ti no uwou ẹkwoma eroro kpahe uzoẹme okokohọ na gbe ẹme nọ ma rẹ rehọ iẹe ta kugbe ahwo uviuwou mai.
6 Evaọ ọgwa ologbo, eware buobu nọ ma rẹ ruẹ gbe edo sa-sa nọ ma re yo e sai si iroro mai rehọ. Eware itieye nọ e rẹ whaha ezọgaviẹ na e rẹ sae kpọ iroro mai no ọnọ ọ be ta ẹme na. Nọ oyena o tẹ via, ovuẹ oghaghae u re vru mi omai. Iroro-ejẹ nọ e rrọ ẹkpẹti na e sai fi obọ họ k’omai ru ẹnyaharo evaọ ezọgaviẹ mai.
7 Roro kẹ Amọfa: A rẹ sae rehọ ekamẹra gbe ekamẹra-ividio rehọ iwoho eva etoke ọ ọruẹrẹfihotọ na, rekọ re o siọ ezọgaviẹ amọfa ba ẹwhaha, oria nọ whọ keria na ọvo whọ jẹ rehọ ae rehọ iwoho. A re ru re ifonu nọ i wo ufi hi [G.S.M] e siọ amọfa ba ekpokpo. Ahwo nọ a re yo ẹme te he a sae keria kẹle oria nọ ọgba ọ rrọ re a sai wo erere no ọruẹrẹfihotọ na ze vọvọ. A re dhe oware erekọdo fihọ ekwakwa ẹlẹtriki hayo erọ ẹmeọta na ha.
8 Ma bi ghine rẹro omakugbe mai nọ ma te jọ jiri Jihova! J’oma gbae mu re ma kẹe orro ẹkwoma abọ okokohọ na kpobi nọ ma rẹ jọ, ẹkwoma ezọ nọ ma rẹ gaviẹ ziezi, gbe ẹkwoma efihiruo eware nọ ma wuhrẹ.—Izie. 31:12.
[Study Questions]
1. Eme họ uzoẹme okokohọ ubrotọ na, kọ fikieme Jihova o ro te kẹ ujiro mai?
2, 3. Ẹvẹ emamọ omaa u re ro fi obọ họ kẹ omai wo erere vọvọ?
4. Fikieme a rọ gwọlọ nọ mai kpobi ma wha emu uvo ze okokohọ na?
5. Ẹvẹ ma sai ro muọ udu mai họ ẹruẹrẹhọ kẹ okokohọ ubrotọ na?
6. Eme ọ rẹ sai fi obọ họ k’omai yọrọ ezọgaviẹ mai nọ a tẹ be t’ẹme? (Rri ẹkpẹti.)
7, 8. Ẹvẹ ma sai ro roro kẹ amọfa, kọ eme ahwo nọ a re yo ẹme te he a re ru re a sai wo erere vọvọ no ọruẹrẹfihotọ na ze?
[Box on page 3]
Ezọgaviẹ eva Ikokohọ
▪ Roro kpahe izoẹme okokohọ na
▪ Rri ikere nọ a bi se
▪ Kere eme fihọ otọ kpẹkpẹe
▪ Muẹrohọ eme nọ who re fihọ iruo
▪ Kiẹ eware nọ who wuhrẹ riwi