‘Joma Kuomagbe Kpare Odẹ Riẹ Kpehru’
1 Ọso-ilezi na ọ so nọ: “O wha lele omẹ jiri Ọnowo na, jo ma kuomagbe . . . kpare odẹ riẹ kpehru!” (Ol. 34:3) Okokohọ Ubrotọ “Nya Kugbe Ọghẹnẹ” mai nọ ọ be tha na ọ te kẹ omai uvẹ nọ ma re ro kuomagbe inievo mai nọ i no ikoko buobu ze kpare odẹ Jihova kpehru. Ko who ru ọruẹrẹfihotọ kẹ oria nọ who re wohọ, ofa, gbe uvẹ nọ who re mi evaọ oria iruo ra no? O rrọ oware areghẹ re ma ru eware nana evaọ ẹruoke.—Itẹ 21:5.
2 Ete Oria Okokohọ Na: Eware buobu e riẹ nọ a rẹ rọ ẹro te nọ ma te kpohọ okokohọ. Uwou nọ ma re no evaọ ẹruoke u re fi obọ họ kẹ omai rọ ẹro te eware idudhe nọ e rẹ raha oke jẹ lẹliẹ omai keria oria mai evaọ ẹruoke re ma rọ udu kpobi wobọ evaọ ole emuhọ gbe olẹ na. (Ol. 69:30) Iminiti jọ kakao re a te ti muhọ, ohwo-agbara na ọ te keria eplatfọmo na nọ a bi kporo ikporakporo na. Mai kpobi ma rẹ keria evaọ oke yena re ọruẹrẹfihotọ na ọ ruẹsi muhọ evaọ edhere ọkpakpatiẹ.—1 Kọr. 14:33, 40.
3 Ẹme Ọghẹnẹ ọ hrẹ omai nọ ma “ru eware kpobi evaọ uyoyou.” (1 Kọr. 16:14) Ahwo nọ wha gbẹ ruọ omoto ọvona ze hayo enọ wha gbẹ rrọ uwou ovona ọvo whọ rẹ sae rawo ekpala kẹ.—1 Kọr. 13:5; Fil. 2:4.
4 Whọ rẹ sae jọ ọgwa okokohọ na re emu uvo ra. Ivie, who ru oria na fihọ tọtọtọ họ, hayo whọ nya siọ ebe ba otọ ọgwa na ha. Emu nọ a rẹ jọ ọgwa okokohọ na re u ti fi obọ họ kẹ ahwo kpobi nọ a jẹ reawere omakugbe ọbọga, jẹ jariẹ evaọ okenọ a bi mu abọ uvo họ na. O tẹ lọhọ, whọ rẹ sai fi orawo-emu osese họ otọ akpala ra. A kuvẹ orawo-emu nọ u re logbo, eglase, ilolo, gbe imidhe nọ i re whu evaọ ọgwa nọ ahwo a be keria jọ gaviezọ na ha. Ofariẹ re, a kuvẹ idi nọ i re muẹ evaọ ogege okokohọ na ha. Evaọ oke nọ u kpemu, a ruẹ ahwo jọ nọ a jẹ jọ ofẹ nọ ahwo a re wohọ na there emu nọ abọ okokohọ o muhọ no. Onana u dhesẹ ovuhumuo kẹ eware abọ-ẹzi vievie he.—Luk 10:38-42
5 Emu Abọ-Ẹzi Buobu Ọ be Hẹrẹ Omai: Jehoshafat ovie na yọ ohwo jọ nọ o “fi udu [riẹ] họ Ọghẹnẹ.” (2 Irv. 19:3) Ẹvẹ ma sae rọ ruẹrẹ udu mai họ taure okokohọ na o te ti te? Izoẹme nọ e rrọ uke Awake! ọ May 22 gbe June 8 na i dhesẹ oghẹrẹ emu abọ-ẹzi nọ a te kẹ. Kọ whọ gbẹ rehọ oke jọ roro kpahe izoẹme yena, rọ ere rẹro oware nọ Jihova o wo fihọ obaro kẹ omai? Udu mai nọ ma rẹ ruẹrẹ họ o kẹre te olẹ nọ ma rẹ lẹ se Jihova re o fi obọ họ kẹ omai wo otoriẹ uthubro nọ ma bi ti yo na je fi ei họ iruo.—Ol. 25:4, 5.
6 Mai kpobi ma bi rẹro eware efa nọ ma bi ti wuhrẹ no Ẹme Ọghẹnẹ ze, vuhumu inọ ẹkwoma ere oruo ma sae rọ rro kpohọ usiwo. (1 Pita 2:2) Fikiere, joma jariẹ eva Okokohọ Ubrotọ “Nya Kugbe Ọghẹnẹ” mai na re ma ‘kuomagbe kpare odẹ Jihova kpehru.’—Ol. 34:3.
[Study Questions]
1. Uvẹ vẹ ma ti wo nọ ma re ro kuomagbe kpare odẹ Jihova kpehru, kọ eme ma rẹ sai ru enẹna rọ ruẹrẹ oma kpahe?
2. Fikieme o jẹ rrọ oware erere re a ma omaa nọ a re ro te oria okokohọ na ẹruoke?
3. Amono ma rẹ sae rawo ekpala kẹ evaọ obọ okokohọ na?
4. Ọruẹrẹfihotọ vẹ ọ riẹ kẹ emu uvo, kọ ẹvẹ onana o rọ rrọ oware erere?
5. Ẹvẹ ma sae rọ ruẹrẹ idu mai họ kẹ uthubro nọ ma bi ti yo?
6. Eme ọ rrọ isiuru mai, kọ fikieme?
[Box on page 3]
Idhere nọ A rẹ rọ Kpare Odẹ Ọghẹnẹ Kpehru
◼ Omaa ẹruoke
◼ Dhesẹ uyoyou kẹ amọfa
◼ Ruẹrẹ udu ra họ