Gaviezọ kẹ Eme Efuafo
1 Orọnikọ ẹme kpobi nọ ohwo ọ ta a rẹ gaviezọ kẹ ziezi hi. Rekọ nọ Ọghẹnẹ ọ tẹ be t’ẹme, ẹjiroro obọdẹ ọ riẹ nọ ma rẹ rọ gaviezọ. (Izie. 28:1, 2) Ma rẹ kẹ uyere inọ ahwo nọ ẹzi ọ kẹ ẹgba a kere ‘eme efuafo Ọghẹnẹ’ fih’otọ rọkẹ erere mai. (Rom 3:2) Okokohọ ubrotọ n’ọtha na ọ te k’omai uvẹ obọdẹ re ma gaviezọ kẹ eme enana nọ a ti se jẹ t’ẹme kpahe ae na. Ẹvẹ whọ sae rọ gaviezọ ziezi?
2 Kaki Te Etẹe k’Ohiohiẹ k’Ohiohiẹ: Dai roro oghọghọ emọ Izrẹl na evaọ okenọ a ta kẹ ae nọ a nya bru Jihova eva Ugbehru Saena re a gaviezọ kẹ Uzi riẹ! (Ọny. 19:10, 11, 16-19) Who te wo uruemu ovo na kpahe ẹjẹrehọ uthubro Jihova eva okokohọ ubrotọ na, who ti ru eruẹrẹfihotọ re whọ kaki te etẹe kẹdẹ kẹdẹ. Ma rẹ sae gaviezọ kẹ eme ọruẹrẹfihotọ na kpobi hi otẹrọnọ ma gbẹ kaki t’obei hi je bi kpokpo amọfa fiki eria ẹkeria nọ ma be gwọlọ. Ọruẹrẹfihotọ na o ti muhọ 9:20 a.m. evaọ Edisoi-Oka, 9:00 a.m. evaọ Ẹdẹ-Ọmaha gbe Ẹdoka.
3 Makọ ejọ nọ e kaki te etẹe a rẹ jọ eria-ẹkeria rai hi eva etoke emuhọ na. Fikieme? A rẹ hẹrẹ bẹsenọ ohwo-agbara na o re zizie ogbotu na re a so ole emuhọ na taure a te ti ku ẹmeọta kugbe egbẹnyusu rai họ je muhọ ẹnya kpohọ eria-ẹkeria rai. Ma re muẹrohọ nọ iminiti jọ taure a tẹ te so ole emuhọ abọ kpobi, ohwo-agbara na ọ rẹ keria eplatfọmo na yọ a bi kporo ikporakporo Uvie na. Onana yọ oka k’omai nnọ oke nọ ma rẹ rọ keria u te no! Kẹsena, nọ a je zizie ogbotu na kẹ ole emuhọ na, yọ ma ruẹrẹ oma họ no re ma kuomagbe suile ujiro kẹ Jihova.
4 Gaviezọ Wọhọ Uviuwou Okugbe: Okenọ a te bi se eme efuafo na kẹ emọ Izrẹl nọ i kokohọ, iviuwou, kugbe “emaha na,” a rẹ gaviezọ je wuhrẹ. (Izie. 31:12) Eva ikokohọ mai, a re ‘vu emọ wa’ ha. (Itẹ 29:15) Eyewọ, wha ru re ahwo uviuwou rai kpobi a keria oria ovo—kugbe emaha na re. Eyewọ jọ e rẹ hẹrẹ te oke ole emuhọ na taure a tẹ te rehọ emọ rai kpohọ oria ame-okuo. Rekọ, onana o rẹ sai wuhrẹ emọ na epanọ ile gbe elẹ i wuzou te evaọ egagọ mai hi. Otẹrọnọ o lọhọ, ẹvẹ u re woma te re a rẹrote ẹgwọlọ ame-okuo taure a te ti muọ abọ kpobi họ!
5 U ti fiobọhọ k’omai re ma gaviezọ otẹrọnọ ma serihọ ziezi k’aso k’aso jẹ whaha ẹriọ emu ọgbẹgbẹdẹ evaọ uvo. Fiẹrohotọ kẹ oware nọ oruẹme na ọ be ta na. Ru re iroro ra e seba eghoro. Rovie Ebaibol ra evaọ okenọ a te bi se ikereakere. Kere eme jọ fih’otọ. Nọ a tẹ be t’ẹme ọvuọvo, jọ iroro ra kiẹ oware nọ oruẹme na ọ ta riwi, je roro kpahe epanọ who ti ro fi ai họ iruo. Nọ ẹdẹ na o te kuhọ no, lele uviuwou ra t’ẹme kpahe eme ọruẹrẹfihotọ na. Igogo-eme vẹ omomọvo rai ọ reawere rai? Ẹvẹ uviuwou ra o sai ro fi ovuẹ nana họ iruo ziezi?
6 Dhesẹ Adhẹẹ kẹ Ẹme Ọghẹnẹ: Ikokohọ e rẹ k’omai uvẹ obọdẹ re ma lele egbẹnyusu t’ẹme jẹ reawere omakugbe ọbọga. Nọ ma tẹ kaki te etẹe, ma ti wo uvẹ nọ ma rẹ rọ t’ẹme kugbe taure ọruẹrẹfihotọ na o te ti muhọ. Dede na, ahwo jọ a re gbiku nọ ọruẹrẹfihotọ na o te muhọ no, bi roro thọthọ nnọ onana u re kpomahọ ezọgaviẹ evaọ oria ẹkeria ologbo ho. Makọ okenọ a te bi ru iwuhrẹ evaọ oria ẹkeria ologbo, oyena yọ oke nọ a rẹ rọ gaviezọ, wọhọ epanọ o rẹ jọ nọ a te bi ru ewuhrẹ evaọ Ọgwa Uvie na. A rẹ rehọ eware wọhọ ifonu nọ i wo ufi hi, ekwakwa nọ a re ro se ohwo, ekwakwa-ividio, gbe ekamẹra ro kpokpo ezọgaviẹ evaọ etoke ọruẹrẹfihotọ na ha.
7 Nọ Mosis ọ jẹ rehọ Uzi na mi Jihova, “ọ re ebrẹdi hi, ọ da ame gbehe.” (Ọny. 34:28) Epọvo na re, u fo ho re a re emu hayo da udi nọ eme okokohọ na e tẹ be nyaharo. Ajokpanọ whọ be mọ ẹyao jọ, hẹrẹ te ‘oke nọ a ruẹrẹhọ’ kẹ onana.—Ọtausi. 3:1.
8 Eva ikokohọ jọ, ẹbẹbẹ ọ gbẹ riẹ kpahe inievo buobu kugbe emaha jọ dede nọ e rẹ nya kpenẹ kpenẹ evaọ edhere eva etoke ẹmeọta na. A te ta kẹ eruẹrẹahwohọ re a vuẹ ahwo otiọye na re a zihe kpohọ oria ẹkeria rai. Ahwo unevaze nọ a bi ruiruo evaọ ẹko-iruo sa-sa a rẹ keria oria rai nọ a tẹ nwani ru iruo rai no. Ahwo unevaze a rẹ keria, jẹ gaviezọ kẹ eme ọruẹrẹfihotọ na, ajokpanọ a rehọ e rai mu re a ru iruo nọ i wuzou eva etoke eme ọruẹrẹfihotọ na. A rẹ nya kpenẹ kpenẹ evaọ eria ẹko-iruo na ha, yọ a re gbiku kugbe ohwohwo ho evaọ okenọ a te mu ẹme ọruẹrẹfihotọ na họ no.
9 Ma gwọlọ jọ ‘kuako evaọ iyayo mai’ vievie he evaọ okenọ ma tẹ be gaviezọ kẹ Ẹme Ọghẹnẹ. (Hib. 5:11) Fikiere, joma ru ọtamuo re ma dhesẹ adhẹẹ mai ẹkwoma ezọgaviẹ ziezi nọ a te t’eme efuafo nọ i no obọ Jihova ze eva okokohọ ubrotọ mai nọ ọ be tha na.