‘Hai Le Oware Ezi Ẹsikpobi’
1 Edhere uzuazọ Oleleikristi o gwọlọ ‘ewoma oruo kẹ ahwo kpobi kẹse kẹse.’ (1 Tẹs. 5:15) Okenọ ma te bi kpohọ ikokohọ ubrotọ mai, ma wo uvẹ buobu nọ ma re ro ru oware uwoma kẹ amọfa. Evaọ etoke yena, ahwo ẹgbede na a bi muẹrohọ omai, yọ ahwo kpobi nọ ma nya ku a bi wo iroro jọ kpahe omai ro no edhere nọ ma ro yeri kugbe ai ze. Re ma sẹro odẹ ezi wọhọ Isẹri Jihova, o gwọlọ re ma rehọ uruemu mai dhesẹ nnọ ma be “rọ adhẹẹ kẹ ahwo kpobi.” (1 Pita 2:17) Oyena o kẹre te “[ẹgwọlọ] ifowe oma obọ [mai] ọvo ho, rekọ ifowe amọfa re.” (Fil. 2:4) Roro kpahe epanọ onana u ro kie kpahe ọruẹrẹfihotọ okokohọ na kẹ iwou nọ a re wohọ.
2 Kọ who vi efọmo Room Request ra no? (1) Nọ Ẹko-Iruo Uwou na a gwọlọ nọ iwou na kpobi e rẹ vọ na, whọ yare vrẹ unu iwou nọ whọ gwọlọ họ. (2) Who rẹro nọ Ẹko-Iruo Uwou na o te ruẹrẹ uwou họ kẹ owhẹ hẹ otẹrọnọ who gbe vi efọmo room request ra se ai no taure who te t’obei hi. (3) Nọ who te t’obọ okokohọ na no, dhesẹ odiri gbe adhẹẹ kẹ inievo ọ Ẹko-Iruo Uwou na nọ a be dao oma re a fi owhẹ họ uwou na. (4) Koko izi ọnọ o wo ighẹ na (hayo izi ehọtẹle na otẹrọnọ ehọtẹle who wohọ) rọ kpahe oghẹrẹ nọ a re ru ighẹ na.
3 Wuhrẹ Emọ Ra Epanọ A re Ru Ewoma: Ẹsejọ, emọ nọ a nya seba ababọ ẹruorote ọkpako evaọ eria nọ a wohọ o wha ẹbẹbẹ ze no. (Ite 29:15) Evaọ ẹsejọ, esẹgbini i duomahọ iruo efa a tẹ nyasiọ emọ rai ba ababọ ẹruorote evaọ uwou na, eva oria ame-ọya, hayo evaọ eria efa. Emọ jọ i ru ozighi te epanọ enọ i wo iwou a rọ dhugbẹ whaha ae nọ a gbẹ kaobọ te ekwakwa jọ vievie evaọ iwou na ha. Onana o wha ọyawọ se amọfa nọ a rrọ iwou na no, te Isẹri gbe enọ e rrọ Isẹri hi.
4 Esẹgbini, taure oke okokohọ na o te ti te, u ti fi obọ họ re wha raha oke jọ kugbe emọ rai rọ kiẹ oghẹrẹ uruemu Oleleikristi nọ a rẹro riẹ mi ai evaọ oke kpobi gbe evaọ eria kpobi. (Ẹf. 6:4) Wọhọ oriruo, ta kẹ ae nnọ uvi uyoyou Oleleikristi ‘u re ru eware etọtọ họ, o rẹ guọlọ orọ obọ riẹ hẹ; o rẹ kpare ẹme ọgaga avọ ofu hu.’ (1 Kọr. 13:5) Enọ e kpako no a rẹ sai fi ẹgba họ eme enana ẹkwoma uvi oriruo nọ a re fihotọ re ahwo kpobi a ruẹ. Emọ, wha rẹ sai le oware ezi ẹkwoma esẹgbini rai nọ wha re yo ẹme kẹ, dhesẹ adhẹẹ kẹ ekwakwa nọ e rrọ eria nọ wha wohọ, je dhesẹ ororokẹ rọkẹ ahwo nọ a wariẹ owhai họ. (Kọl. 3:20) Nọ ma be dao oma ru ewoma kẹ ahwo kpobi na, yọ ma be “jọ eva oware kpobi rehọ eru kẹ uwuhrẹ Ọghẹnẹ Osiwi mai.”—Tait. 2:10.
5 Orọnikọ iriughe ọvo uruemu ezi mai u re kpomahọ evaọ edhere owoma ha, u re je kpomahọ enọ e be fo omai fiki ẹjiroro sa-sa re. Evaọ oware kpobi nọ ma bi ru evaọ okokohọ na jegbe evaọ ẹwho okokohọ na—makọ onya evaọ iyẹrẹ, emuọriọ evaọ ehọtẹle, eriosehọ evaọ ehọtẹle, hayo be rehọ uvẹ nọ u rovie fihọ ro se-isẹri—u fo re ẹmeọta gbe uruemu Oleleikristi mai u dhesẹ nnọ ma gwọlọ le oware ezi.
[Box on page 4]
Iviena Kareghẹhọ:
■ Wo odiri gbe adhẹẹ kẹ inievo nọ i bi ruiruo evaọ Ẹko-Iruo Uwou na.
■ Koko izi ọnọ o wo uwou hayo ehọtẹle na, re o wha ewoma se ahwo na kpobi.
■ Muẹrohọ uruemu emọ ra ziezi.