Uwuhrẹ 16

Omakpọmu

Eme o gwọlọ nọ who re ru?

Dikihẹ, nya, jẹ t’ẹme evaọ edhere nọ ọ dọmu, ọrọ ọghọ nọ o rẹ kẹ imuẹro omakpọmu.

FIKIEME U JE WUZOU?

Otẹrọnọ whọ rẹ kpomamu, ogbotu ra a te gaviezọ ziezi kẹ oware nọ whọ be ta vi owhẹ nọ a rẹ tẹrovi.

O RỌ oware aghẹruẹ hẹ re udu o nawo oruẹme evaọ okenọ ọ tẹ kparoma re ọ nyae t’ẹme, maero otẹrọnọ o re ru ẹme ẹsikpobi hi. Udu o rẹ dina nawo owhowho-uvie evaọ okenọ ọ tẹ ruọ iwou ọsosuọ evaọ iruo odibọgba na. Okenọ a vi ei uwou re ọ jọ ọruẹaro, Jerimaya ọ kuyo nọ: “Mẹ riẹ ẹme ẹta ha, keme mẹ ọmaha.” (Jeri. 1:5, 6) Jihova o fiobọhọ kẹ Jerimaya, yọ o ti fiobọhọ k’owhẹ re. Nọ oke o be nyaharo na, whọ te kpomamu.

Oruẹme nọ ọ kpomamu họ ọnọ o re koko oma họ. Omakpọmu nana u re dhesẹ oma via evaọ edikihẹ riẹ. Oghẹrẹ edikihẹ riẹ ọ rẹ jọ orọ ẹkoma riẹ gheghe je fo kẹ etoke na. Ọ rẹ riẹ abọ go rọ t’ẹme. Uvo riẹ u re vevẹ.

Whọ tẹ maki roro nọ who fo edhesẹ ọrọ omakpọmu nana ha, whọ sai ru ẹnyaharo. Evaọ oghẹrẹ vẹ? Joma roro kpahe oware nọ o rẹ lẹliẹ oruẹme bru udu jẹ kare omakpọmu. Ẹbẹbẹ na ọ sae jọ ọrọ ugboma.

Whọ tẹ rẹriẹ ovao ku use-abọ yọ whọ gwọlọ kparobọ rekọ u mu owhẹ ẹro nọ whọ te kparobọ họ, whọ rẹ ruawa. Fikiere, ẹvori na o ve vi uwou se ugboma na re u ru ame nọ a re se adrenaline buobu. Ebuo riẹ o vẹ lẹliẹ udu na kie kitikiti, ẹwẹ-okuo o ve nwene, ẹroyẹ ọ vẹ nyaze, hayo enuhu abọ gbe awọ jegbe enuhu uvo. Ugboma ra o be daoma fiobọhọ k’owhẹ nyate uyero ra ẹkwoma ẹgba ọfa nọ o be k’owhẹ na. Use-abọ na họ ẹriẹ epanọ whọ rẹ rọ kpọ ẹgba nọ o k’owhẹ na kpohọ iroro nọ e liọ gbe ẹmeọta ajọwha.

Epanọ Who re Ro Bru Awaọruọ Kpotọ. Kareghẹhọ nọ o thọ họ re ohwo ọ dina ruawa. Rekọ re whọ kpomamu, u re woma re who ru awaọruọ kpotọ omojọ re whọ jẹ rọ ẹwolẹ gbe uruemu ọghọ yerikugbe uyero ra na. Ẹvẹ whọ sai ro le onana t’obọ?

Ruẹrẹ oma kpahe ziezi. Fi oke buobu họ evaọ omaruẹrẹhọ kẹ ẹme ra. Jọ u mu owhẹ ẹro nọ who wo otoriẹ uzoẹme ra vevẹ. Ẹme ra ọ tẹ rọ ọnọ whẹ ọvo whọ rẹ jọ salọ eme nọ whọ rẹ ta, fi oware nọ ogbotu ra ọ riẹ kpahe uzoẹme na no vẹre gbe oware nọ whọ gwọlọ wo t’obọ h’iroro. Onana u ti fiobọhọ k’owhẹ salọ eme nọ i fo. O tẹ rọ bẹbẹ k’owhẹ evaọ oke ọsosuọ, rehọ ẹbẹbẹ na nyabru ohwo jọ nọ o wo ona ẹmeọta. Ọ sai fiobọhọ k’owhẹ kiẹ ẹme gbe ogbotu na riwi. U te mu owhẹ ẹro nnọ who wo eme nọ e te kẹ ogbotu ra erere no yọ o rọ vevẹ evaọ iroro ra, isiuru ra re whọ tae kẹ amọfa u ti ruru awaọruọ nọ who wo kpahe eruo ẹme na.

Muẹrohọ eme-emuhọ ra ziezi. Riẹ epanọ who ti ro mu ẹme na họ. Ẹme ra o te muhọ no, udubro ra u ti kpotọ.

Eware evo nana a re lele nọ a tẹ be ruẹrẹ oma kpahe kẹ iruo odibọgba na. Roro kpahe orọnikọ uzoẹme nọ whọ be te ta kpahe na ọvo ho rekọ te oghẹrẹ ahwo nọ who bi ti se isẹri kẹ na. Ruẹrẹ oma kpahe kẹ ẹme-emuhọ ra ziezi. Wo erere no ona iwhowho-uvie nọ e kpako no ze.

Whọ sai roro nọ whọ te kpomamu viere otẹrọnọ who kere eme kpobi nọ whọ gwọlọ ta kẹ ogbotu na fihọ obe. Uzẹme riẹ họ, onana o te lẹliẹ owhẹ wo awaọruọ viere oke kpobi nọ who bi ti ru ẹme. Uzẹme o rọ inọ iruẹme jọ a re kere eme buobu fihọ otọ, ejọ umutho eme. Rekọ oware nọ u re nwene ofẹ iroro ra je ru awaọruọ kpotọ họ, orọnikọ eme nọ e rọ obe na ha, rekọ evaifihọ inọ ẹme nọ whọ ruẹrẹ kẹ ogbotu ra na o ghine fo eyo.

Wuhrẹ ẹme ra do via. Ewuhrẹ otiọye na ọ te k’owhẹ udu inọ whọ sae ta iroro ra via. Nọ who bi wuhrẹ na, yọ whọ be bọ ẹvori ra re eme na e la ze evaọ okenọ whọ be te ta ẹme ra. Wuhrẹ iẹe epaọ ẹsenọ whọ be ghinẹ kẹ ovuẹ na. Jọ udu ra ruẹ ogbotu ra. Keria kẹle emẹjẹ hayo dikihẹ wọhọ epanọ who ti ru evaọ okenọ whọ te kẹ ovuẹ na.

Lẹ se Jihova kẹ obufihọ. Kọ ọ te k’uyo olẹ utioye na? “Onana họ eva-ifihọ nọ oma wo kpahọ iẹ, nnọ, re ma tẹ yare oware jọ wọhọ [epaọ] oreva riẹ, o re yo kẹ omai.” (1 Jọn 5:14) Whọ tẹ gwọlọ kẹ Ọghẹnẹ orro je fiobọhọ kẹ ahwo wo erere no Ẹme riẹ ze, ọ rẹ k’uyo olẹ ra hrọ. Imuẹro yena e te k’owhẹ udu nọ who re ro ru iruo ra gba. Ofariẹ, nọ whọ be bọ ibi ẹzi na—uyoyou, oghọghọ, udhedhẹ, omarokpotọ, gbe oma-oriẹsuo na—who ti wo oghẹrẹ uruemu nọ u fo nọ who re ro yerikugbe iyero avọ omakpọmu.—Gal. 5:22, 23.

Wo eriariẹ. Epanọ who w’obọ te evaọ usiuwoma ota na, ere udubro ra u re kpotọ te. Epanọ whọ rẹ jọ iwuhrẹ ukoko kpahe fihọ enọ te, ere o rẹ lọhọ owhẹ obọ te re whọ jọ iraro amọfa t’ẹme. Nọ unu eme nọ whọ be jọ ukoko ru i bi vihọ na, awaọruọ ra evaọ ẹme ọvuọvo o re kpotọ. Kọ whọ gwọlọ wo uvẹ nọ whọ rẹ rọ t’ẹme viere? Koyehọ whọ rẹ fialoma via evaọ isukulu na otẹrọnọ ohwo jọ nọ o wo ẹme ọ nyaze he.

Whọ tẹ j’owọ eware nọ ma jọ obehru fodẹ na no, whọ te ruẹ nọ erere ọ riẹ re whọ kiẹ eware nọ i re dhesẹ nọ ohwo o bi nuhu riwi. Evuhumu eware na gbe ewuhrẹ re whọ nyate ai u ti fiobọhọ k’owhẹ t’ẹme avọ omakpọmu. Eware na e sae jọ erọ ugboma hayo edo-uvo.

Eka ọ Ugboma. Omakpọmu ra, hayo ababọ riẹ, o rẹ jọ edikihẹ ra gbe oghẹrẹ nọ who bi ru abọ ra dhesẹ oma via. Kaki roro kpahe abọ na. Abọ nọ a whẹ họ emu, nọ a kru kekeke fihọ abefẹ, hayo abọ nọ a tatamu agbada ẹmeọta na kekeke; abọ nọ a re dhehọ ẹkpa je sino ẹkpa, epoto ewu nọ a rẹ sahọ jẹ sano, abọ nọ a re mu kpare kpohọ agba, unwe, gbe ẹno; obọ nọ a be rọ rara ughọjọ, opẹsoro, hayo obe; abọ nọ a be rọ t’ẹme yọ o bi nuhu hayo nọ a rẹ rọ t’ẹme yagha—enana kpobi i re dhesẹ ababọ omakpọmu.

Ababọ omakpọmu u re je dhesẹ oma via evaọ awọ nọ a re go kpenẹ avọ enẹ, oma nọ a re nuhu no ofẹ ruọ ofẹ, edikihẹ ghọghọ, uke nọ a vre h’emu, igbenu nọ a re dhe ẹlẹlalọ, eya nọ a re silọ ẹsikpobi, gbe ẹwẹ nọ o re t’otọ t’ehru hu.

Avọ omodawọ a sae kpọ eka ọ udubro enana. Kake rọ ọvo muhọ. Salọ ẹbẹbẹ na jọ, je roro kparo kpahe oware nọ u fo nọ who re ru rọ whaha iẹe. Who te ru omodawọ oyena, whọ te kẹ imuẹro omakpọmu evaọ edikihẹ ra.

Eka ọ Edhe-Urru. Eka edhesẹ ọ enuhu urru e sai kugbe ẹva hayo urru nọ u bi nuhu. Ẹsejọhọ whọ be ka urru ẹsikpobi hayo whọ be t’ẹme kpata ga hrọ. A rẹ sae rehọ omodawọ fi ebẹbẹ nana kparobọ re whọ kpọ urru na.

Udu o tẹ be nawo owhẹ, dhizu re who kuẹwẹ didi unuẹse jọ re whọ tẹ te ruọ eplatfọmo na. Daoma kpoma họ ziezi. Ukpenọ who roro kpahe udu nọ o be nawo owhẹ, roro kpahe oware nọ whọ rọ gwọlọ ghale eme nọ whọ ruẹrẹhọ no na kugbe ogbotu ra. Re who te ti mu ẹme họ ẹta, rehọ omoke jọ rri ogbotu ra, gwọlọ ovao owhẹwhẹtiẹ jọ, re who ru ovao ohwohwẹ. T’ẹme ẹrera evaọ emuhọ na, kẹsena whọ vẹ ruọ ẹme na oma ziezi.

Oware nọ Who re Rẹro Riẹ. Who rẹro nọ iroro udubro kpobi e te rayẹ no ho. Udu o rẹ nawo iruẹme buobu nọ i wo ona eplatfọmo ikpe buobu no taure a tẹ te kpare oma ruọ aro ogbotu na. Ghele na, a wuhrẹ epanọ a rẹ rọ kpọ udubro rai no. Oruẹme otiọye na jọ ọ ta nọ: “Udu o gbẹ be nawo omẹ ghele, rekọ enẹna mẹ rẹ kpọe.”

Whọ tẹ daoma gaga re who si eka ọ udubro nọ a rẹ ruẹ no, ogbotu ra o ti riwi owhẹ wọhọ oruẹme nọ ọ kpomamu. Udu o rẹ gbẹ nawo owhẹ ghele, rekọ a ti gbe muẹrohọ iẹe vievie he.

Kareghẹhọ inọ, ehwẹze ame ọ adrenaline nọ ọ rẹ wha eka ọ enuhu ze na o rẹ wha ẹgba ze re. Rehọ iẹe t’ẹme sasasa.

U du fo re whọ ruọ eplatfọmo taure who te fi eware enana kpobi h’iruo ho. Wuhrẹ omakpọmu jẹ t’ẹme avọ oma-sasa nọ o fo evaọ uzuazọ ekẹdẹ kẹdẹ. Ere oruo ra u ti fiobọhọ k’owhẹ udu ziezi evaọ eplatfọmo na gbe evaọ iruo odibọgba na, oria nọ o jọ mai wuzou.

EPANỌ A RE RO WO OMAKPỌMU

Ruẹrẹ oma kpahe ziezi.

Wuhrẹ ẹme ra do via.

“Gbolo owha ra kẹ ỌNOWO na” evaọ olẹ.—Ol. 55:22.

W’obọ evaọ usiuwoma ota ẹsikpobi, kpahe fihọ enọ viere eva iwuhrẹ, jẹ fialoma kẹ eme efa evaọ isukulu na.

Riẹ eware nọ e rẹ wha ababọ omakpọmu ze, je wuhrẹ epanọ whọ rẹ rọ whaha hayo kpọ ae.

ORIA IRUO: K’oka k’oka evaọ amara, daoma kpahe fihọ enọ vi ẹsiẹvo evaọ Uwuhrẹ Uwou-Eroro na gbe eva Uwuhrẹ Obe Ukoko. Muẹrohọ nọ awaọruọ o re mu otọ họ ẹnya evaọ okenọ whọ tẹ kpahe fihọ enọ isiava hayo isiasa no eva ewuhrẹ ọvona.