Uwuhrẹ 25

Eroruiruo Omaa-Ẹmeọta

Eme o gwọlọ nọ who re ru?

T’ẹme no omaa-ẹmeọta ze, onọ who wo fihọ uzou hayo onọ who kere, viukpenọ who re kere eme ra re who se ai kpobi n’ẹme t’ẹme no obe ze.

FIKIEME U JE WUZOU?

Omaa-ẹmeọta u re fiobọhọ k’owhẹ koko ẹme ra họ. Whọ tẹ be rehọ iẹe ru ẹme u re fiobọhọ k’owhẹ rọ ovao dhe ahwo na t’ẹme no udu ze.

IRẸRO ọ ẹme nọ a rẹ ta no omaa-ẹmeọta ze o rẹ lẹliẹ udu no ahwo buobu awọ. Udu o rẹ mai kie ai vi otẹrọnọ a kere eme kpobi nọ a be te ta fihọ obe hayo a fi rai họ uzou.

Ghele na, uzẹme riẹ họ kẹdẹ kẹdẹ mai kpobi ma rẹ t’ẹme ababọ obe nọ ma re se eme no ze. Ma re ru ere evaọ okenọ ma te bi lele uviuwou gbe egbẹnyusu mai t’ẹme. Ma re ru ere evaọ okenọ ma tẹ rọ iruo odibọgba na. Yọ ma re ru ere evaọ okenọ ma tẹ be lẹ elẹ nọ i n’udu ze, makọ evaọ obọ uwou hayo evaọ ogbotu.

Okenọ who te bi ru ẹme, kọ ohẹriẹ jọ o riẹ sọ who kere eme na kpobi fihọ obe hayo omaa-ẹmeọta who wo? Dede nọ ẹme ose no obe nọ who kere ze u re fiobọhọ evaọ ẹgbagba ẹme jẹ lẹliẹe wo awere, u wo umuo evaọ ẹnyate idu ahwo. Who te bi se eme ra kpobi no obe ze, ovẹrẹ gbe edo uvo ra u re wo ohẹriẹ no ẹkoma ẹmeọta ra. Otẹrọnọ whọ bọwo ovao sa obe ra viukpọ ogbotu ra nọ who re rri, ibuobu e te gaviezọ te epanọ a hae gaviezọ te nọ a tẹ riẹ nọ who bi roro kpahe ae je bi nwene ẹme na kiehọ uyero rai hi. Re ẹme o ghine wo ẹgba ziezi, whọ rẹ tae no uzou ze.

A ruẹrẹ Isukulu Odibọgba Ọghẹnẹ na họ re u fiobọhọ k’omai evaọ uzuazọ ekẹdẹ kẹdẹ. Ma tẹ nyaku egbẹnyusu, ma rẹ tọlọ ẹwẹ-obe re ma se iroro mai noi ze kẹ ae re eme mai e ruẹse liọ họ. Evaọ usiuwoma ota, ma re kere eme nọ ma te ta fihọ obe se he, fikinọ eme jọ nọ ma gwọlọ ta kẹ ahwo na e te thọrọ omai ẹro. Ma tẹ be jọ isukulu na ru odhesẹvia epanọ ma rẹ ta usiuwoma evaọ otọ iyero itieye na, wuhrẹ epanọ who re ro ru ei evaọ edhere ẹkoma ẹmeọta ra. Avọ emamọ omaruẹrẹhọ, whọ te ruẹ nọ omaa-ẹmeọta, te onọ o rọ owhẹ uzou hayo onọ who kere, u te re o kareghẹhọ owhẹ igogo eme nọ whọ gwọlọ rọ t’ẹme na. Rekọ ẹvẹ who re ro wo udu nọ whọ rẹ rọ t’ẹme no omaa-ẹmeọta ze?

Koko Eme Ra Họ. Re whọ sae rọ omaa-ẹmeọta ru ẹme, u fo re who koko eme ra họ. Orọnikọ onana u dhesẹ nọ eme nọ who re ro ru ẹme na whọ rẹ salọ họ. U dhesẹ ọvo nọ who re roro re whọ tẹ t’ẹme.

Evaọ uzuazọ ekẹdẹ kẹdẹ, ohwo nọ ọ rẹ kpakpa oma ọ rẹ ruẹ nọ o re zue eme họ nọ o rẹ dae oke ofa nnọ ọ riẹ ọ hae ta ha. Omọfa jọ ọ sae t’ẹme nọ o koko oma họ họ, la no ẹme jọ ruọ ọfa. Ma rẹ sae whaha oghẹrẹ etata eme ivẹ nana otẹrọnọ ma fọ re ma roro re ma te mu ẹme họ ẹta. Kaki wo ẹjiroro ẹme nọ whọ gwọlọ ta fihọ iroro, whọ vẹ salọ othotha nọ whọ gwọlọ rọ t’ẹme na, who ve te ti mu ẹme họ ẹta.

Kọ whọ be ruẹrẹ oma kpahe kẹ usiuwoma ota? Orọnikọ ẹkpa usiuwoma ota ra ọvo whọ rẹ rehọ oke ruẹrẹhọ họ rekọ te eme ra. Whọ tẹ gwọlọ rehọ edhere ẹmeọta jọ no Odibọgba Uvie Mai na ze, sei ẹsibuobu re ẹme na o vẹ owhẹ ẹro ziezi. Rehọ uhie-ẹme ọvo hayo ivẹ fodẹ igogo ẹme na. Rehọ ẹkoma ẹmeọta ra t’ẹme na jẹ tae kiehọ iyero ẹkwotọ ra. Whọ te ruẹ nọ u re fiobọhọ re ẹme na kpobi ọ j’owhẹ uzou. Eme oyena o rẹ sai kugbe? (1) Wọhọ ẹme-emuhọ, whọ rẹ sae fodẹ oware jọ nọ o rọ ọdawẹ kẹ ahwo buobu evaọ ẹwho ra. Zizie ọnọ o wo uwou na re ọ kpahe ẹme. (2) Wo ugogo oware jọ fihọ iroro nọ whọ rẹ sae zọhọ fihọ uzoẹme na, kugbe ikereakere ọvo hayo ivẹ nọ i re dhesẹ oware nọ Ọghẹnẹ ọ yeyaa nọ o ti ru rọ wha ufuoma ze. A tẹ k’owhẹ uvẹ na, fiẹgba họ ẹme na inọ Jihova o ti ru onana ẹkwoma Uvie riẹ, egọmeti obọ odhiwu riẹ. (3) Tuduhọ ohwo na awọ re ọ j’owọ jọ kpahe ẹme nọ whọ ta na. Whọ rẹ sae kẹe obe gbe/hayo uwuhrẹ Ebaibol who ve je fi oke họ nọ wha rẹ rọ t’ẹme na haro.

Omaa-ẹmeọta nọ whọ jọ ẹmeọta otiọye na gwọlọ họ ọrọ uzou. Whọ tẹ gwọlọ nọ who re rri omaa-ẹmeọta nọ who kere taure who te ti te uwou ọsosuọ, eware nọ e rẹ jọ omaa-ẹmeọta na họ umutho ẹme-emuhọ jọ ọvo, ikereakere ọvo hayo ivẹ, gbe umutho eme jọ nọ whọ gwọlọ fi kugbe ekuhọ ra. Omaruẹrẹhọ gbe eroruiruo omaa-ẹmeọta utioye na o rẹ whaha ẹme nọ ọ rẹ nya reghe reghe, fiobọhọ k’omai nya siọ ovuẹ nọ o rọ vevẹ ba kẹ ohwo na, ovuẹ nọ ọ rẹ sae kareghẹhọ lọlọhọ.

Otẹrọnọ onọ hayo avro jọ ọ rẹ roma via ẹsikpobi evaọ ẹkwotọ ra, u re fiobọhọ re who ru ekiakiẹ jọ kpahe ẹme na. Ẹsibuobu, oware nọ whọ gwọlọ kpobi họ igogo eme ivẹ hayo esa avọ ikereakere nọ whọ rẹ rọ thae uke. “Izoẹme Ebaibol rọ kẹ Iroro e Jẹ” hayo izoẹme esese nọ a kere mu gbalọ evaọ Reasoning From the Scriptures na e sae kẹ uzedhe omaa-ẹmeọta nọ whọ gwọlọ. Whọ sae jọ eria efa ruẹ eme nọ i fo nọ who re kugbe ẹme ra. Kere umutho eme jọ fihọ obe, ta eme nọ whọ jọ eria efa ruẹ na mu obe na, je fi ae họ ẹkpa usiuwoma ota ra. Okenọ ohwo nọ o wo uwou ọ tẹ rọ onọ hayo avro na ze, ru ei re ọ riẹ nọ whọ gwọlọ dhesẹ oware nọ o rọ emu orọwọ ra kẹe. (1 Pita 3:15) Rehọ omaa-ẹmeọta na kẹe uyo.

Whọ tẹ be te lẹ kẹ uviuwou ra, utu obe uwuhrẹ, hayo ukoko na, o rẹ jẹ kẹ erere re who koko eme ra họ. Wọhọ epanọ o rọ Luk 11:2-4, Jesu ọ kẹ ilele riẹ omaa-ẹmeọta olọlọhọ orọ emamọ olẹ. Evaọ oke erovie etẹmpol na evaọ Jerusalẹm, Solomọn ọ lẹ thethei. O rọ vevẹ inọ o roro kpahe olẹ na no obọ uwou ze. Ọ kake ta kpahe Jihova gbe eyaa Riẹ kẹ Devidi; ọ tẹ te rẹriẹ ovao ku etẹmpol na; u no ere no, o te mu iyero gbe ẹko ahwo sa-sa họ ekele. (1 Iv. 8:22-53) Ma rẹ sai wo erere no iriruo enana ze.

Ru Oma-Ẹmeọta Ra Lọlọhọ. Kọ ovuẹ whọ gwọlọ rọ omaa-ẹmeọta ra kẹ? Bro eware e rẹ jọ eva riẹ?

Kareghẹhọ nọ ẹjiroro omaa-ẹmeọta họ re u fiobọhọ k’owhẹ kareghẹhọ igogo eme. Whọ sai roro nọ o te kẹ erere re who kere uhie-eme jọ kẹ ẹme-emuhọ ra. Who te ru ere no, whọ vẹ tẹrovi igogo eme na, orọnikọ ibieme na ha. Otẹrọnọ who bi kere igogo eme nana fihọ otọ, jọ uhie-ẹme kpobi o jọ kpẹkpẹe. Umutho igogo eme nọ whọ gwọlọ ro ru ẹme na e rẹ jọ vevẹ evaọ omaa-ẹmeọta ra. Whọ rẹ sae rehọ ibiẹme ikpokpoko ro kere ai, siusi họ ae, hayo kpe ekọlọ họ ae. Kere eme nọ i w’uzou nọ whọ be te rọ t’ẹme na fihọ otọ ugogo ẹme ọvuọvo. Kere ikereakere nọ whọ gwọlọ se. O rẹ mai woma re who se ai no Ebaibol na ze dẹẹ. Kere etadhesẹ nọ whọ gwọlọ fiba ẹme na. Whọ sae jẹ rehọ eme no ebe gheghe nọ i fo ze. Ru eme na dina bu omojọ re whọ sai ru ẹme na vẹ ahwo ẹro. Omaa-ẹmeọta na o tẹ rrọ kpatiẹ, o te lọhọ viere re whọ rehọ iẹ ruiruo.

Igogo eme na ọvo e rẹ jọ omaa-ẹmeọta ahwo jọ. Ẹsejọhọ omaa-ẹmeọta na o sai wo umutho eme jọ, ikereakere nọ oruẹme na ọ rẹ wariẹ no uzou ze, iwoho hayo oka-ukpehọ nọ i re fiobọhọ kẹe kareghẹhọ igogo eme na. Avọ umutho eme nana, oruẹme ọ rẹ sae t’ẹme nọ ọ rọ othotha nọ o rẹ wọhọ ẹsenọ o bi gbiku. Oye họ ẹjiroro uwuhrẹ nana.

Evaọ ẹwẹ-obe avọ 39 rite 42 ọrọ obe nana, whọ te ruẹ uzoẹme na “Ẹruẹrẹhọ Omaa-Ẹmeọta.” U ti fiobọhọ gaga re who se uzoẹme na nọ a te bi rri owhẹ evaọ uwuhrẹ nana, “Eroruiruo Omaa-Ẹmeọta.”

Epanọ A rẹ Rehọ Omaa-Ẹmeọta Ruiruo. Ute ra obọnana họ orọnikọ re whọ ruẹrẹ ẹme ra fihọ omaa-ẹmeọta ọvo ho. Rekọ ute ra họ re whọ rehọ omaa-ẹmeọta na ruiruo ziezi.

Owojẹ ọsosuọ evaọ efihiruo omaa-ẹmeọta ra họ omaruẹrẹhọ kẹ eruo ẹme na. Rri uzoẹme na, se igogo eme na ọvuọvo, re whọ jẹ riẹ abọ nọ igogo eme na ọvuọvo i wo kugbe uzoẹme na. Riẹ oke nọ whọ te raha fihọ ugogo ẹme ọvuọvo. Zihe kpemu re who wuhrẹ ugogo ẹme ọsosuọ na. Kiẹ avro na, ikereakere, etadhesẹ, gbe iriruo nọ whọ gwọlọ rọ t’ẹme na riwi. Se oria na unuẹse buobu bẹsenọ abọ ẹme ra ọyena o re vẹ owhẹ ẹro ziezi no. Ru epọvo na kpahe ugogo ẹme kpobi. U te fo roro ẹme nọ who ti sino re whọ se oke ba ẹre. Kẹsena whọ vẹ kiẹ ẹme na kpobi riwi. Tẹrovi igogo eme na, orọnikọ eme na ọvuọvo ho. Who se ẹme na fihọ uzou hu.

Nọ whọ te kẹ ovuẹ na, whọ rẹ daoma rri ogbotu ra. Who te se ikereakere no, whọ rẹ daoma rehọ eme ikere na jiroro no Ebaibol ra ze ababọ obe ra nọ who re rri. Epọvo na re, nọ whọ tẹ kẹ ọtadhesẹ, tae epanọ whọ rẹ tae kẹ egbẹnyusu ukpenọ who re sei no obe ze. Nọ whọ tẹ be t’ẹme na, who se uhie-ẹme ovuovo no obe ra ze he. T’ẹme no udu ze, whọ vẹ nyate udu enọ e be gaviezọ k’owhẹ.

Ẹme nọ whọ rẹ ta no omaa-ẹmeọta ze o tẹ reria owhẹ obọ no, yọ whọ j’owọ ulogbo no re whọ jọ emamọ oruẹme.

EPANỌ A RE RO RU EI

Wo irere ẹmeọta rono omaa-ẹmeọta ze fihọ iroro.

Evaọ ẹmeọta ekẹdẹ kẹdẹ, koko eme ra họ re whọ tẹ t’ẹme.

Re who wo udu nọ whọ rẹ rọ t’ẹme no omaa-ẹmeọta ze, lẹ se Jihova, je ru ei fihọ uruemu re whọ jọ iwuhrẹ ukoko w’obọ ziezi.

Ru omaa-ẹmeọta ra lọlọhọ, nọ whọ rẹ sae ruẹ vevẹ nọ whọ tẹ jẹlẹ ẹro rri rie.

Ruẹrẹ oma họ kẹ ẹmeọta ẹkwoma ẹkiẹriwo igogo eme, orọnikọ eme na ọvuọvo nọ who re se fihọ uzou hu.

ORIA IRUO: Re who te ti kpohọ usiuwoma evaọ oka nana, wo ẹme nọ whọ gwọlọ ta fihọ uzou. (Rri ẹwẹ-obe avọ 167, edhe-ẹme avọ 3.) Whọ tẹ rọ usiuwoma, muẹrohọ unu eria nọ whọ jọ t’ẹme nọ who wo họ iroro na hayo nọ who jo dhunu te ovuẹ na kpẹkpẹe.