Uwuhrẹ 34

Ọbọga Avọ Irẹro Ewoma

Eme o gwọlọ nọ who re ru?

Ukpenọ whọ rẹ tẹrovi abọ oyoma ọvo, t’ẹme kpahe eware nọ i re ru uyero woma hayo enọ e rẹ kẹ evaifihọ.

FIKIEME U JE WUZOU?

Akpọ nọ ọ kare uyoyou ọ bẹ ahwo t’unu no kokoko. Ibuobu i wo ebẹbẹ omobọ rai buobu. A tẹ kẹ ovuẹ Ebaibol na evaọ emamọ edhere, o rẹ lẹliẹ ahwo udu-oruọzewọ wo irẹro kpahe obaro na.

OVUẸ nọ a vi omai nọ ma whowho na yọ emamọ usi. Jesu ọ ta nọ: “Usiuwoma na a rẹ te kake vuẹ erẹwho kpobi tao.” (Mak 13:10) Jesu omariẹ ọ kẹ oriruo na ẹkwoma “usiuwoma uvie Ọghẹnẹ” nọ o je whowho. (Luk 4:43) A te je dhesẹ ovuẹ nọ ikọ na i whowho wọhọ “usiuwoma Ọghẹnẹ” gbe “usiuwoma Kristi.” (1 Tẹs. 2:2; 2 Kọr. 2:12) Ovuẹ utioye na u wo ọbọga gbe irẹro ewoma.

Rọwo kugbe ewhowho “usiuwoma ebẹdẹ bẹdẹ” orọ ‘ukọ-odhiwu nọ ọ be jọ idedeghe rra na,’ ma be tuduhọ ahwo awọ nọ: “Dhozọ Ọghẹnẹ jẹ rehọ oruaro kẹ e.” (Evia. 14:6, 7) Ma be ta kẹ ahwo evaọ oria kpobi kpahe Ọghẹnẹ uzẹme na, odẹ riẹ, ekwakwa igbunu riẹ, iruo igbunu riẹ, ẹjiroro oyoyou riẹ, ọvuọ-unu nọ ma ti gu kẹe, gbe oware nọ ọ gwọlọ mi omai. Usiuwoma na o kẹre te uzẹme na inọ Jihova Ọghẹnẹ ọ te raha irumuomu na no, enọ i bi rri rie vo jẹ be raha akpọ ku amọfa abọ. Rekọ orọnikọ mai ma re gu ahwo nọ ma be ta usiuwoma kẹ ẹdhọ họ. Isiuru mai họ ibuobu nọ ma be ta usiuwoma kẹ na a te j’owọ kẹ ovuẹ Ebaibol na re o ghinẹ jọ emamọ usi kẹ ae.—Itẹ 2:20-22; Jọn 5:22.

Bru Eme Abọ-Eyoma Kpotọ. Uzẹme, eware iyoma e vọ uzuazọ. Ma rẹ f’aro kẹ enana ha. Re who mu ẹmeọta họ, whọ rẹ sae fodẹ ẹbẹbẹ jọ nọ ọ rọ iroro enọ e rọ ẹkwotọ ra whọ vẹ t’ẹme kpahe iẹe kpẹkpẹe. Rekọ ẹsibuobu o rẹ kẹ erere tere he nọ whọ tẹ t’ẹme kpahe ae theri hrọ. Kẹse kẹse ahwo a bi yo usi uye-oruẹ, fikiere re whọ t’ẹme kpahe eware uyero uyoma o sae lẹliẹ ae kare ẹthẹ rai hayo tehe ezọ di. Evaọ emuhọ ẹmeọta ra, daoma kake kpọ iroro kpohọ uzẹme omosasọ orọ Ẹme Ọghẹnẹ. (Evia. 22:17) O jẹ rọnọ ohwo na ọ gbẹ make gwọlọ t’ẹme na haro ho, yọ whọ nyasiọ oware ọbọga jọ nọ o re roro kpahe ba kẹe no. Onana o sae lẹliẹe gwọlọ gaviezọ evaọ oke ofa.

Epọvo na re, a te zizie owhẹ re whọ kẹ ovuẹ, whọ rehọ evuẹ eware iyoma vọ uzou ogbotu na ha fikinọ evuẹ itieye na e v’otọ. Oruẹme ọ tẹ t’ẹme thethei kpahe ekie isu ahwo-akpọ, iyẹrẹ ethube gbe ozighi, gbe epanọ ọfariẹ-ogbe ọ dafia te, o sai fi ọkora họ ahwo oma. Whọ rẹ t’ẹme kpahe abọ oyoma eware otẹrọnọ i wo obọdẹ ẹjiroro jọ kpahe ẹme na ọvo. Eme itieye na nọ a re dhunu te kakao e sai dhesẹ epanọ ẹme ra ọ rọ ẹruoke te. E sai je dhesẹ eware nọ e rrọ uyero oyena ze whọ vẹ rọ enẹ rehọ iẹe dhesẹ epanọ ifue nọ e rrọ Ebaibol na i ro w’iruo. Oria nọ o jọ lọhọ, nya ruọ uzedhe ẹme na ovavo ababọ oke buobu nọ whọ rẹ raha rọ t’ẹme kpahe ẹbẹbẹ na.

O lọhọ họ yọ u fo ho re whọ se eware iyoma kpobi ba ẹfodẹ evaọ ẹme. Use-abọ na họ epanọ whọ rẹ rọ ta eware iyoma gbe iwoma na evaọ edhere nọ o rẹ rọ kẹ uduotahawọ. Re whọ sai ru onana, who re roro kpahe eme nọ who re kugbe ẹme ra na, eme nọ who re sino, gbe oria nọ who re fiẹgba họ. Evaọ Ovuẹ obọ Ugbehru na, Jesu ọ hrẹ enọ e jẹ gaviezọ kẹe re a whaha idhere oriobọ erọ ikere-ebe gbe otu Farisi na, ọ tẹ jẹ kẹ iriruo jọ ro ru ẹme riẹ na vẹ. (Mat. 6:1, 2, 5, 16) Ghele na, ukpenọ ọ rẹ rọ oke riẹ kpobi ta kpahe oriruo oyoma ọrọ isu egagọ eyena, Jesu o fiẹgba họ ewo otoriẹ kpahe idhere iwoma Ọghẹnẹ gbe epanọ a rẹ rọ rria lele ai. (Mat. 6:3, 4, 6-15, 17-34) Ẹme na ọ tuduhọ ahwo na awọ.

Rọ Uvo Ọbọga t’Ẹme Na. A tẹ jọ ukoko ra k’owhẹ ẹme kpahe abọjọ iruẹru Ileleikristi, daoma bọ ahwo na ga ukpenọ whọ rẹ fo ai. Jọ u mu owhẹ ẹro nọ who bi ru oware nọ whọ be tuduhọ amọfa awọ nọ a ru na. (Rom 2:21, 22; Hib. 13:7) Jọ uyoyou o wọ owhẹ t’ẹme, orọnikọ ofu hu. (2 Kọr. 2:4) U te mu owhẹ ẹro nọ ibe enọ e rọwo na e gwọlọ ru Jihova eva were, eme nọ whọ te ta i re dhesẹ evaifihọ yena via, yọ onana o rẹ wha erere ze. Muẹrohọ epanọ Pọl ukọ na o ro dhesẹ evaifihọ itieye na, wọhọ epanọ a kere fihọ 1 Ahwo Tẹsalonika 4:1-12; 2 Ahwo Tẹsalonika 3:4, 5; gbe Filimọn 4, 8-14, 21.

Ẹsejọ, o rẹ gwọlọ nọ ekpako e vẹvẹ unu kpahe uruemu ugheghẹ. Rekọ omarokpotọ u re fiobọhọ kẹ ae rọ ẹzi ewolẹ yerikugbe inievo rai. (Gal. 6:1) Edhere nọ a rẹ rọ t’ẹme na o re dhesẹ nọ a bi rri ahwo ukoko na avọ adhẹẹ. (1 Pita 5:2, 3) Ebaibol na ọ hrẹ ezae ovrawha re a muẹrohọ onana gaga. (1 Tim. 4:12; 5:1, 2; 1 Pita 5:5) Okenọ u te fo re a whọku, kẹ uthubro, kpọvi, a re ru onana rọwokugbe oware nọ Ebaibol na ọ ta. (2 Tim. 3:16) A rẹ vẹnẹ efihiruo Ikereakere rọ tha iroro jọ nọ oruẹme na o wo uke he. A tẹ be make kẹ ohrẹ ọkpọvio dede, a sai gbe ru uvo ẹme na kiehọ otẹrọnọ a bi fiẹgba họ epanọ a rẹ rọ whaha eyoma-oruo, epanọ a re ro ku ebẹbẹ họ, epanọ a re ro fi idhọvẹ kparobọ, epanọ a rẹ rọ kpọ edhere ọthọthọ jọ vi, gbe epanọ itee Jihova e rẹ rọ thọ omai.—Ol. 119:1, 9-16.

Whọ tẹ be ruẹrẹ ẹme ra họ, roro ziezi kpahe epanọ who ti ro ku ugogo ẹme ọvuọvo gbe oma ẹme na kpobi họ. Ẹme nọ whọ ta whremu a rẹ mae kareghẹhọ. Kọ o te jọ ẹme ọbọga?

Who te Bi Lele Ibe Enọ E Rọwo t’Ẹme. Idibo Jihova a wo ovuhumuo kẹ uvẹ nọ a re ro kuomagbe eva iwuhrẹ Ileleikristi. Enana yọ etoke omosasọ abọ-ẹzi. Ebaibol na ọ tuduhọ omai awọ re ma roro kpahe ‘udu otahọ ohwohwo’ okenọ ma te kokohọ eva eria egagọ mai. (Hib. 10:25) A re ru onana orọnikọ ẹkwoma eme gbe ẹkpahefihọ evaọ etoke iwuhrẹ ọvo ho rekọ te ẹmeọta-kugbe taure iwuhrẹ na i te ti muhọ gbe okenọ i te kuhọ no.

Dedenọ o rọ oware nọ u n’otọ ze re ma t’ẹme kpahe awaọruọ uzuazọ ekẹdẹ kẹdẹ na, uduotahawọ nọ o mae rro u re no ẹta eme abọ-ẹzi ze. Enana i kugbe eware omawere nọ ma rọ ẹro ruẹ evaọ iruẹru egagọ efuafo mai. Edhesẹ emamọ isiuru kẹ ohwohwo o rẹ kẹ ọbọga re.

Fiki okpomahọ akpọ nọ ọ wariẹ omai họ na, o gwọlọ re ma yọroma. Okenọ o je kere se Ileleikristi evaọ Ẹfẹsọs, Pọl ọ ta nọ: “Wha siobọnọ ọrue oguo, jọ kohwo kohwo ọ ta uzẹme kẹ ọrivẹ riẹ.” (Ẹf. 4:25) Ẹta uzẹme na viukpọ ọrue o kẹre te ẹwhaha orro nọ ma rẹ rọ kẹ eware gbe ahwo nọ akpọ na ọ be gọ. Epọvo na re, Jesu ọ vẹvẹ unu kpahe “eviẹhọ efe.” (Mat. 13:22) Fikiere nọ ma tẹ be t’ẹme kugbe ohwohwo, ma rẹ yọroma re ma siọ eviẹhọ itieye na ba ẹwhaharo ẹkwoma ọghọ nọ ma rẹ ta họ ewo ekwakwa efe.—1 Tim. 6:9, 10.

Okenọ ọ jẹ kẹ ohrẹ kpahe epanọ u ro fo re ma jọ ọbọga, Pọl ukọ na ọ tuduhọ omai awọ nọ ma gu hayo rehọ ẹro orivo rri oniọvo ho ọnọ ọ kẹnoma no eware jọ fikinọ “orọwọ riẹ o ga ha,” koyehọ, fikinọ ọ riẹ epanọ ufuoma Oleleikristi o rro te he. Uzẹme, re ẹmeọta mai ọ bọ amọfa ga, ma re roro kpahe oghẹrẹ uyerakpọ rai gbe epanọ a kpako te evaọ abọ-ẹzi. Ẹvẹ u re yoma te re ma “fi ọzadhe hayo ezoruẹ họ edhere omoni”!—Rom 14:1-4, 13, 19.

Ahwo nọ a bi lele ebẹbẹ ilogbo oma rai muabọ—wọhọ ẹyao ọgaga—a gwọlọ ẹmeọta ọbọga. Ohwo otiọye na ọ rẹ gbomahọ gaga re ọ sae ziọ iwuhrẹ na. Enọ e riẹ kpahe uyero riẹ a sae nọe inọ: “Ẹvẹ oma na?” Ababọ avro, ororokẹ rai ọ te were iẹe. Rekọ, o sae jọnọ o rri rie fihọ oware uduotahawọ kẹe he re ọ hae ta kpahe ẹyao riẹ ẹsikpobi. Eme ọ ovuhumuo gbe ujiro e rẹ mai ru udu riẹ sasa. Kọ whọ be jọ oma riẹ ruẹ imuẹro uyoyou ogaga kẹ Jihova gbe ithihakọ evaọ otọ iyero sa-sa? Kọ o rẹ k’owhẹ ọbọga nọ whọ tẹ be gaviezọ kẹ ọkpahefihọ riẹ? Kọ o te kẹe ọbọga viere re whọ tẹrovi ogaga riẹ gbe oware nọ o bi fiba ukoko na viukpọ ọnyaba riẹ?—1 Tẹs. 5:11.

Re ẹmeọta mai ọ jọ ọbọga, o rẹ mai woma re ma kareghẹhọ eriwo Jihova kpahe ẹme nọ ma be ta na. Evaọ Izrẹl anwae, ahwo nọ a t’ẹme mukpahe ahwo ẹro Jihova je gu inoma kpahe mana na a ruẹ evedha Ọghẹnẹ. (Ik. 12:1-16; 21:5, 6) Ma rẹ kẹ imuẹro inọ ma wo erere no iriruo eyena ze evaọ okenọ ma tẹ kẹ ekpako na adhẹẹ je dhesẹ ovuhumuo kẹ emu abọ-ẹzi nọ utu ọrigbo ẹrọwọ avọ areghẹ na ọ be kẹ.—1 Tim. 5:17.

Re a ruẹ eware erere nọ ma rẹ ta kpahe evaọ okenọ ma tẹ rọ kugbe inievo Ileleikristi mai o bẹ hẹ. Rekọ, otẹrọnọ eme ọ ohwo jọ e be nya rri ofẹ ahwo ọfuọ ga hrọ, daoma kpọ ẹme na kpohọ ọrọ ọbọga.

Makọ isẹri ma bi se kẹ amọfa, be t’ẹme no eplatfọmo ze, hayo bi lele ibe enọ e rọwo t’ẹme, joma yọroma re ma jọ efe idu mai rehọ “onọ uwoma nọ o rẹ wha ohwo udu wọhọ epanọ u kiehọ, re o ruẹse rehọ aruoriwo kẹ otu nọ o re yo.”—Ẹf. 4:29.

EPANỌ A RE RO RU EI

Kareghẹhọ nọ iruo mai họ re ma whowho emamọ usi na.

T’ẹme ọbọga ukpenọ whọ rẹ fuọ ahwo.

Rọ emamọ ẹro rri ahwo nọ whọ be t’ẹme kẹ na.

Evaọ ẹmeọta, roro kpahe epanọ ẹme ra ọ sai ti kpomahọ amọfa.

ORIA IRUO: Nyabru ohwo jọ nọ ọ ko hayo ọnọ ọ be mọ evaọ uwou. Mu ẹme ọbọga jọ họ. Wo ororokẹ, rekọ jọ eme ra e jọ erọ ọbọga. Roro kparo re whọ sai le ute nana t’obọ.