Uwuhrẹ 40

Ẹgbagba Ẹme

Eme o gwọlọ nọ who re ru?

Kẹ ovuẹ nọ o rọwo kugbe uzẹme na gbagba.

FIKIEME U JE WUZOU?

Ẹgbagba ẹme nọ whọ ta o rẹ lẹliẹ ahwo rọ emamọ ẹro rri owhẹ, ukoko nọ whọ be jọ gọ, gbe Ọghẹnẹ nọ whọ be gọ.

ẸVẸ o sae rọ via ẹsejọ nọ ẹme nọ Oleleikristi ọ ta o rrọ uzẹme he? O sae jọ nọ ọ be wariẹ ẹme nọ ọ jọ oria jọ yo ọvo ababọ oke nọ ọ raha re ọ kiẹ otọ ẹme na. Hayo ọ sae ta ẹme jọ vrẹta fikinọ o se oria ẹme riẹ jọ thọ ababọ erimuo. Ma te muẹrohọ ẹgbagba ẹme ziezi, makọ evaọ eme nọ i tulo ho, enọ e be gaviezọ k’omai a sae ruẹ nọ a re fievahọ ẹgbagba eme efa mai nọ i tube wuzou gaga.

Evaọ Iruo Odibọgba Na. Nọ a te vuhumu nnọ eware efa buobu e riẹ nọ a re gbe wuhrẹ, ozọ u re mu ibuobu re a muọ iruo odibọgba na họ. Ghele na, ahwo nana a rẹ ruẹ vẹrẹ vẹrẹ inọ a rẹ sai se isẹri ziezi, avọ umutho eriariẹ uzẹme na nọ a wo. Evaọ oghẹrẹ vẹ? Usiavẹ na họ omaruẹrẹhọ.

Taure who te ti muhọ evaọ odibọgba na, riẹ uzoẹme nọ whọ be te rọ t’ẹme ziezi. Daoma rẹro enọ nọ ahwo nọ a te kezọ k’owhẹ a te nọ. Gwọlọ iyo nọ e rẹ veva, enọ i no Ebaibol ze. Onana o te ruẹrẹ owhẹ kpahe re whọ kẹ iyo egbagba avọ udu nọ u re kie owhẹ vi. Kọ who bi ti ru uwuhrẹ Ebaibol? Kiẹ obe uwuhrẹ na riwi ziezi. Jọ u mu owhẹ ẹro nọ who wo otoriẹ eria Ikereakere nọ iyo enọ nọ a kporo fihọ obe na i no ze.

Kọ ẹvẹ otẹrọnọ ọnọ o wo uwou hayo ibe-oruiruo jọ ọ nọ onọ jọ nọ whọ ruẹrẹ oma kpahe kẹ hẹ? Otẹrọnọ uyo na u gbe mu owhẹ ẹro ho, who mu fodẹ hẹ. “Evaọ ohwo nọ o kiẹrẹe o re roro didi epanọ ọ rẹ rọ kẹ uyo.” (Itẹ 15:28) Whọ rẹ sae ruẹ obufihọ nọ whọ gwọlọ evaọ obe na Reasoning From the Scriptures hayo omobe na Izoẹme Ebaibol rọ kẹ Iroro e Jẹ. Uvumọ ebe nana e gbẹ rọ owhẹ obọ họ, ta nọ who ti ru ekiakiẹ jọ re who zihe. Otẹrọnọ ọnọ ọ nọ onọ na ọ ghinẹ gwọlọ riẹ, ọ te daezọ họ re ọ hẹrẹ owhẹ kẹ uyo ogbagba. Omarokpotọ ra dede o te were iẹe.

Iwhowho-uvie nọ i wo eriariẹ nọ who re lele ruiruo evaọ odibọgba na o rẹ sai fiobọhọ k’owhẹ wo ona nọ whọ rẹ rọ rehọ Ẹme Ọghẹnẹ ruiruo gbagba. Muẹrohọ ikereakere nọ a se gbe epanọ a rọ rehọ ai jiroro. Rọ omarokpotọ jẹ iroro hayo ọkpọvio nọ a k’owhẹ kpobi rehọ. Apọlọs olele ọwhọ na o wo erere no obufihọ nọ amọfa a kẹ ze. Luk o dhesẹ Apọlọs wọhọ “ọgba eriariẹ,” “ọ jẹ gaga,” yọ ‘oriori ọ da riẹ eva fia,’ ọzae nọ ọ “jẹ rọ ẹrera ta ẹme je wuhrẹ epaọ Jesu.” Ghele na, ọ riẹ re he. Okenọ Prisila avọ Akwila a muẹrohọ onana, “a tẹ rehiẹe gboma, a je dhesẹ edhere Ọghẹnẹ kẹe vevẹ vi onọ ọ riẹ vẹre.”—Iruẹru 18:24-28.

‘Ẹyọrọ Ẹme Uzẹme na Whawha.’ Ẹme nọ ma bi ru eva iwuhrẹ o re dhesẹ ute ukpehru orọ abọ nọ ukoko na u wo wọhọ “odẹẹ gbe ugbẹhẹ uzẹme na.” (1 Tim. 3:15) Re ma sai kru uzẹme na ga, u fo re ma wo otoriẹ ikereakere nọ ma m’omaa nọ ma te rọ t’ẹme na. Wo eme nọ e wariẹ ikere na họ gbe ẹjiroro riẹ họ iroro.

A rẹ sae wariẹ ẹme nọ whọ jọ ewuhrẹ ukoko ta. Uzẹme, “eva idhere buobu ma bi ro ru thọ.” (Jem. 3:2) Rekọ who ti wo erere ẹkwoma ewo uruemu nọ u re fiba ẹmeọta ọgbagba. Inievo-emezae buobu nọ i kere odẹ fihotọ evaọ Isukulu Odibọgba Ọghẹnẹ na a sai ti zihe ro ekpako ukoko evaọ obaro. A rẹ gwọlọ eware “ibuobu” mi enọ a kẹ owha-iruo utioye na. (Luk 12:48) Otẹrọnọ ọkpako ukoko ọ kẹ ohrẹ ababọ omayọrọ nọ o wha ebẹbẹ ilogbo se ahwo ukoko na, Ọghẹnẹ ọ rẹ sae dheva kẹ ọkpako na. (Mat. 12:36, 37) Fikiere, a rẹ riẹ oniọvo nọ o te ọkpako ziezi inọ ọ rẹ yọrọ “uzẹme eme nọ o wuhrẹ whawha.”—Tait. 1:9.

Yọroma re whọ ruẹ nọ ẹjiroro ẹme ra ọ rọwo kugbe “oghẹrẹ eme oma ojaja” nọ i dhesẹ oma via evaọ oma uzẹme Ikereakere na. (2 Tim. 1:13) Onana u re fi ozọ họ owhẹ ẹro ho. Ẹsejọhọ who ri se oma Ebaibol na soso re he. Gbẹ daoma fihọ iẹe. Rekọ bọo oke oyena, muẹrohọ epanọ iroro-ejẹ nọ e rọ obotọ na e sai ro fiobọhọ k’owhẹ kiẹ eme nọ whọ gwọlọ ro wuhrẹ ahwo riwi.

Orọ ọsosuọ, nọ oma ra nọ: ‘Kọ eme nana e rọwo kugbe eware nọ me wuhrẹ no Ebaibol na ze no? Kọ u ti si enọ e be gaviezọ k’omẹ bru Jihova, manikọ o be kpare areghẹ akpọ na kpehru, be tuduhọ ahwo awọ re a kie lele ereghẹ akpọ na?’ Jesu ọ ta nọ: “Ẹme ra uzẹme.” (Jọn 17:17; Izie. 13:1-5; 1 Kọr. 1:19-21) Ofariẹ, rehọ ekwakwa ewuhrẹ nọ utu ọrigbo ẹrọwọ avọ areghẹ na a kẹ ro ruiruo ziezi. Enana i ti fiobọhọ k’owhẹ orọnikọ re who wo otoriẹ ikereakere gbagba ọvo ho rekọ re who dhesẹ efihiruo rai avọ owowa gbe iroro. Whọ tẹ rọ ẹme ra hwa “eme oma ojaja” na jẹ rẹroso ukoko Jihova evaọ oruvẹ gbe edhesẹ efihiruo ikereakere na, ẹme ra ọ te jọ gbagba.

Ẹkiẹvia Ẹgbagba Ovuẹ. Ẹfodẹ eware nọ e via kẹle, eme nọ ahwo a ta, hayo eware nọ a rọ ẹro ruẹ o rẹ sai fiobọhọ evaọ okenọ who te bi dhesẹ efihiruo hayo kẹ ọtadhesẹ kpahe igogo eme jọ. Ẹvẹ o sai ro mu owhẹ ẹro nnọ e gba? Edhere jọ họ ẹkwoma ẹrehọ ovuẹ utioye na no ehri nọ a rẹ sai fievahọ ze. Kareghẹhọ kiẹ re u mu owhẹ ẹro nnọ ovuẹ na u ri kiekpo ho. Unu eware u re nwene; ọkiẹvia ewuhrẹ otokiẹ-eriariẹ o rẹ vrẹ; yọ nọ ohwo ọ be rro haro evaọ otoriẹ ikuigbe gbe evẹrẹ anwae na, u re fo re a nwene eriariẹ anwae. Yọroma gaga whọ tẹ gwọlọ rehọ evuẹ nọ e rọ obe-usi, evuẹ etẹlivisiọne, evuẹ irediyo, evuẹ kọmputa, hayo evuẹ Itanẹte rọ t’ẹme. Itẹ 14:15 o hrẹ nọ: “Ohwo [ogheghẹ] ọ rẹ rọwo eware kpobi, rekọ ohwo owareghẹ ọ rẹ tẹroviẹ oware nọ o re ruẹ.” Nọ oma ra nọ: ‘Kọ a riẹ ehri ẹme nana nnọ ọ rẹ kẹ evuẹ egbagba? Kọ a sae jọ eria efa ruẹ ovuẹ na?’ Otẹrọnọ who wo avro kpahe ẹgbagba ẹme jọ, se iẹe ba.

Fiba ẹkiẹvia ẹgbagba ọ ehri ovuẹ na, roro ziezi kpahe oghẹrẹ nọ whọ m’omaa nọ whọ te rọ ovuẹ na ro ruiruo. Ruẹ nọ eme nọ whọ be te wariẹ na gbe unu ikelakele nọ whọ be te fodẹ na e rọwo kugbe oria nọ who bi si ai no ze na. Evaọ omodawọ re who fiẹgba họ ugogo ẹme na, yọroma re whọ siọ “ahwo jọ” ba ese “ahwo buobu,” re whọ siọ “ahwo buobu” ba ese “ahwo kpobi,” re whọ siọ “ẹsejọ” ba ese “ẹsikpobi.” Uwhei hayo isugẹ nọ a re fiba iyẹrẹ evaọ abọ unu eware, epanọ oware o rro te, hayo epanọ oware o r’oja te u re fi avro họ ẹgbagba ẹme ra.

Otẹrọnọ ẹme ra ọ rẹ jọ gbagba ẹsikpobi, a rẹ te riẹ owhẹ wọhọ ohwo nọ ọ rẹ rehọ uzẹme zaro ho. O rẹ lẹliẹ ahwo rọ emamọ ẹro rri Isẹri Jihova kpobi. Maero, o rẹ kẹ “ỌNOWO, Ọghẹnẹ ọtẹruo” na ọghọ.—Ol. 31:5.

EPANỌ A RE RO RU EI

Whaha okpakpa nọ whọ rẹ rọ kẹ uyo evaọ okenọ uyo na u gbe mu owhẹ ẹro ho.

Rehọ eme ra no “eme oma ojaja” nọ e rọ Ebaibol na ze.

Ru ekiakiẹ kpahe uzoẹme ra.

Kiẹ ẹgbagba unu eware, eme nọ whọ te wariẹ, gbe eware nọ a rọ ẹro ruẹ riwi, who fi orọ obọ ra họ ae he. Who mu fodẹ eware nọ whọ kareghẹhọ ha ha.

ORIA IRUO: Ta kẹ Osẹri nọ ọ kpako re ọ gaviezọ jẹ kiẹ ẹgbagba ẹme nọ whọ be ta na riwi nọ whọ be te rọ eme obọ ra ru eme obotọ na vẹ na: (1) Didi oghẹrẹ ohwo Jihova ọ rrọ, kọ ẹvẹ whọ rọ riẹ? (2) Fikieme Jesu o je siobọno uzuazọ riẹ evaọ idhe, kọ ẹvẹ ma sai ro wo erere no onana ze? (3) Anwẹnọ a rọ rehọ iẹe mu Ovie, eme Jesu Kristi o bi ru?