Uwuhrẹ 41
Ẹme Nọ O Re Vẹ Amọfa Ẹro
Eme o gwọlọ nọ who re ru?
T’ẹme evaọ edhere nọ amọfa a re ro wo otoriẹ ẹme nọ whọ be ta.
FIKIEME U JE WUZOU?
Epanọ ẹme ra ọ lọhọ te re a wo otoriẹ riẹ, ere ogbotu na o ti wo erere noi ze te re.
WHỌ tẹ be t’ẹme, whọ kẹ ovuẹ gheghe ọvo ho. Daoma ru ẹme nọ whọ be ta vẹ kẹ ahwo nọ whọ be tae kẹe na. Onana o sai fiobọhọ k’owhẹ riẹ ẹme ta, makọ whọ be t’ẹme kẹ ukoko na hayo kẹ ahwo nọ a rọ Isẹri hi.
Abọ buobu e riẹ kpahe ẹme nọ a re wo otoriẹ riẹ. Ma t’ẹme kpahe ejọ rai evaọ Uwuhrẹ avọ 26, “Ẹme nọ Ọ rẹ Nya Othotha avọ Iroro.” Ma t’ẹme kpahe efa evaọ Uwuhrẹ avọ 30, “Isiuru nọ A re Dhesẹ kẹ Ohwo Ọdekọ.” Evaọ uwuhrẹ nana, ma te t’ẹme kpahe igogo eme efa jọ.
Ta Eme Ivevẹ, Ẹmeọta Ọlọlọhọ. Eme ivevẹ gbe ihie-eme ekpẹkpẹe yọ ekwakwa ilogbo erọ ẹmeọta-kugbe. Ovuẹ obọ Ugbehru Jesu na yọ oriruo obọdẹ ọrọ ẹme nọ ahwo a rẹ sai wo otoriẹ riẹ makọ oghẹrẹ ahwo nọ a rrọ hayo oria nọ a be rria kpobi. Ẹme na ọ rẹ sae jọ ọkpokpọ evaọ ezọ rai. Ghele na, a sai wo otoriẹ eme Jesu keme o duobọte eme nọ e rọ ọdawẹ kẹ omai na kpobi: epanọ a rẹ rọ wereva, epanọ a re ro yeri kugbe amọfa ziezi, epanọ a re ro yerikugbe awaọruọ, gbe epanọ a rẹ rọ ruẹ otofa evaọ uzuazọ. Yọ ọ rehọ eme ivevẹ rọ kẹ ovuẹ riẹ. (Mat., izou 5-7) Dede na, Ebaibol na ọ kẹ iriruo buobu erọ uthethei gbe oghẹrẹ ihie-eme sa-sa. Ugogo ute ra họ re whọ t’ẹme ra evaọ edhere ovevẹ, onọ a re wo otoriẹ riẹ.
Whọ tẹ be make t’ẹme nọ o kodo gaga, edhere ọlọlọhọ nọ whọ be rọ tae u re ru ei lọhọ re a wo otoriẹ riẹ. Ẹvẹ whọ sai ro ru ẹme lọhọ? Whọ rehọ eme nọ i fo ho lahiẹ ogbotu ra ha. Ruẹrẹ ẹme ra họ re o jọ uketha kẹ igogo eme ra. Roma totọ salọ igogo ikereakere ra. Ukpenọ whọ rẹ họrọ no ikere jọ kpohọ ọfa, se ai ọvuọvo re whọ t’ẹme kpahe ae. Whọ rọ eme buobu ruru ugogo ẹme jọ họ.
Who te bi ru uwuhrẹ Ebaibol, fi ehrẹ nana h’iruo. Whọ daoma ru eme esese kpobi vẹ hẹ. Fiobọhọ kẹ ọmọ-uwuhrẹ na wo otoriẹ ugogo ẹjiroro ẹme na. Evaọ obaro, evaọ uwuhrẹ omobọ riẹ gbe eva iwuhrẹ ukoko na, eriariẹ riẹ e rẹ te rro.
Re whọ sai ru ẹme evaọ edhere ọlọlọhọ, o gwọlọ emamọ omaruẹrẹhọ. Uzoẹme ra na u re v’owhẹ ẹro ziezi otẹrọnọ whọ gwọlọ ru ei vẹ kẹ amọfa. Oware u te ghine v’owhẹ ẹro ziezi, whọ rẹ sae kẹ ẹjiroro nọ o rọ rrọ ere. Whọ rẹ sae jẹ rọ eme obọ ra rọ tae.
Ru Eme nọ A Riẹ Hẹ Vẹ. Ẹsejọ re who ru eme vẹ o rẹ gwọlọ nọ whọ f’otọ eme jọ nọ ogbotu ra ọ riẹ hẹ. Whọ rri eriariẹ ogbotu ra kpehru hrọ họ, rekọ who rri iroro rai kpokpotọ họ. Fiki ewuhrẹ ra ọrọ Ebaibol na, whọ rẹ sae ta eme jọ nọ amọfa a ri yo ẹdọvo ho. Who gbe ru ẹme na vẹ omojọ họ, ahwo nọ a bi kuomagbe Isẹri Jihova ha a rẹ riẹ hẹ inọ “okiọkotọ,” ‘ọrigbo ẹrọwọ avọ areghẹ,’ “igodẹ efa,” gbe “otu obuobu” i bi dhesẹ ẹko ahwo jọ. (Rom 11:5; Mat. 24:45; Jọn 10:16; Evia. 7:9) Epọvo na re, ajokpanọ ohwo ọ riẹ kpahe ukoko Isẹri Jihova, ẹsejọhọ ọ te riẹ otofa eme nana ha wọhọ “owhowho-uvie,” “ọkobaro,” “ọsẹro okogho,” gbe “Ekareghẹhọ.”
U re fo re a ru eme Ebaibol jọ nọ makọ ahwo nọ e rọ Isẹri hi a rẹ ta odode vẹ. Rọkẹ ahwo buobu, “Amagẹdọn” yọ ọraha ebọmbo okpemuotọ. A rẹ sae rehọ “Uvie Ọghẹnẹ” wọhọ uyero nọ o rọ ohwo eva hayo wọhọ odhiwu rekọ orọnikọ wọhọ egọmeti hi. A sae rọ ẹme nọ a ta kpahe “ẹwẹ” wọhọ abọ ẹzi ohwo jọ nọ ọ rẹ zọ vrẹ uwhu ugboma na. Wọhọ epanọ a wuhrẹ ima ahwo buobu no, “ẹzi ọfuafo” yọ ohwo, abọjọ Esanerọvo na. Fikinọ ahwo buobu a kiemuku ute uruemu Ebaibol na no, ẹsejọ a rẹ tubẹ gwọlọ obufihọ re a wo otoriẹ oware nọ Ebaibol na o bi dhesẹ nọ o ta nọ: ‘Dhẹ no igberedia.’—1 Kọr. 6:18.
A gbẹ rrọ ahwo nọ a bi se Ebaibol na ẹsikpobi hi, ẹme na o re reghe ai ẹro otẹrọnọ whọ ta ọvo nọ, “Pọl o kere nọ . . . ” hayo “Luk ọ ta nọ . . . ” A rẹ sai wo egbẹnyusu hayo erivẹ nọ i wo edẹ eyena. Whọ rẹ sai fi eme jọ bae ro dhesẹ nọ ohwo na yọ ukọ Oleleikristi hayo ọnọ o kere Ebaibol.
Ogbotu ọgbọna a rẹ gwọlọ obufihọ ẹsibuobu re a wo otoriẹ ikereakere nọ e ta kpahe eware nọ a rẹ maa hayo iruemu-ẹwho oke anwae. Wọhọ oriruo, ẹsejọ ẹme na inọ okọ Noa u theri te esabọ 75, o kẹre te esabọ 12 1⁄2, yọ u kpehru te esabọ 7 1⁄2 u re vẹ ai ẹro ho. (Emu. 6:15) Rekọ otẹrọnọ wha jọ oria rai wo edhere nọ a re ro dhesẹ epanọ oware u kpehru jẹ kẹre te, epanọ okọ na o rro te u ti vẹ ogbotu ra ẹro vẹrẹ vẹrẹ.
Kẹ Oruvẹ nọ A Gwọlọ. Re who ru ẹme vẹ kẹ ogbotu ra, o sae gwọlọ vi otofa ẹme jọ ọvo. Evaọ Jerusalẹm evaọ edẹ Ẹzra, nọ a te se Uzi na no a ve ru ei vẹ. Re u fiobọhọ kẹ ahwo na wo otoriẹ riẹ, ahwo Livai na a rẹ f’otọ Uzi na je dhesẹ efihiruo Uzi na kie kpahe iyero nọ ahwo na a jẹ rẹriẹ ovao ku eva oke oyena. (Neh. 8:8, 12) Epọvo na re, rehọ oke ru ikereakere nọ who se gbe efihiruo riẹ vẹ.
Nọ o whu jẹ kparoma no, Jesu o ru rie vẹ kẹ ilele riẹ inọ oware nọ o nwane roma via no na o rọ orugba Ikereakere na. O te je fiẹgba họ owha-iruo rai wọhọ isisẹri eware eyena. (Luk 24:44-48) Who te fiobọhọ kẹ ahwo re a ruẹ epanọ oware nọ a wuhrẹ na u re kpomahọ izuazọ rai, otofa riẹ u re vẹ ai ẹro viere.
Epanọ Udu na U ro w’Obọ Kugbei. Dede na, eme ra e tẹ maki vẹ, eware efa i re dhesẹ sọ ohwo ọdekọ na o wo otoriẹ rai. Udu ohwo u te wo okpa, oyena yọ awhaha rọkẹ ewo otoriẹ ẹme nọ whọ be ta. (Mat. 13:13-15) Rọkẹ ahwo nọ a gba riẹ mu no re a rri eware kpobi kekeke no ofẹ uwo ze, eware abọ-ẹzi yọ ugheghẹ. (1 Kọr. 2:14) Ohwo o te dhesẹ oghẹrẹ ẹzi otiọye na, u re woma re a dhugbe ku ẹme na họ—evaọ oke oyena tao.
Ghele na, evaọ ẹsejọ udu na o sai wo okpa fiki ebẹbẹ uzuazọ. A tẹ kẹe uvẹ evaọ oke thethei re u yo uzẹme Ebaibol na, udu ohwo otiọye na o sae lọhọ. Okenọ Jesu ọ ta kẹ ikọ riẹ inọ a be te fae a ve je kpei, u vẹ rai ẹro ho. Eme jabọ? O rọ oware nọ a rẹro riẹ hẹ yọ o rọ oware nọ a tubẹ gwọlọ họ! (Luk 18:31-34) Ghele na, evaọ ẹruoke, ikọ 11 evaọ usu ikọ na a wo otoriẹ ẹme na, yọ a dhesẹ oyena via ẹkwoma owọ nọ a jẹ lele oware nọ Jesu o wuhrẹ i rai.
Okpomahọ Emamọ Oriruo. Ma re fiobọhọ kẹ ahwo wo otoriẹ orọnikọ ẹkwoma ẹmeunu mai ọvo ho rekọ te ẹkwoma uruemu mai re. Rọ kpahe iweze ọsosuọ rai kpohọ Ọgwa Uvie, ahwo buobu a rẹ ta nọ a kareghẹhọ uyoyou nọ o jariẹ, orọnikọ eme nọ a yo ho. Epọvo na re, evawere nọ ma re dhesẹ u fiobọhọ kẹ ibuobu nọ i wo uwou rovie eva rai kẹ uzẹme Ebaibol no. Ẹruẹ uyoyou ẹwo nọ ahwo Jihova a bi dhesẹ kẹ ohwohwo gbe uvi ororokẹ rọkẹ amọfa evaọ okenọ a tẹ rọ okpẹtu o lẹliẹ ahwo jọ ku ei họ no inọ Isẹri na a wo egagọ uzẹme na. Fikiere nọ whọ be daoma fiobọhọ k’ahwo wo otoriẹ uzẹme Ebaibol na, muẹrohọ oghẹrẹ nọ who re dhesẹ iẹe je muẹrohọ oriruo ra.
EPANỌ A RE RO RU EI
Ta eme ivevẹ; salọ ihie-eme ekpẹkpẹe rọ ta igogo eme na.
Fiẹgba họ igogo eme jọ ọvo.
Ru eme nọ a riẹ hẹ vẹ.
Rehọ oke ru ikereakere vẹ je dhesẹ efihiruo rai.
Roro kpahe epanọ oriruo ra o ti kpomahọ enọ whọ be t’ẹme kẹ.
ORIA IRUO: Daoma ta kẹ omoni ra, ọrivẹ, ibe-oruiruo, hayo ibe-isukulu nọ ọ rọ Osẹri hi kpahe oware jọ nọ whọ jọ ewuhrẹ ukoko reawere riẹ eva oka nana. Ruẹ nọ who dhesẹ otofa eme nọ ohwo na o wo otoriẹ rai hi.