Rehọ Edhere Ọlọlọhọ ro Wuhrẹ
1. Eme họ ugogo oware jọ nọ o rẹ lẹliẹ uwuhrẹ vẹ ahwo ẹro?
1 Edhere ọlọlọhọ nọ a re ro wuhrẹ o rẹ lẹliẹ ahwo wo otoriẹ oware nọ a bi wuhrẹ ai. Eroro kpahe oghẹrẹ nọ Jesu, Owuhrẹ Ologbo na, o ro wuhrẹ ahwo u re fi obọ họ k’omai wo ẹnyaharo evaọ ‘onaa uwuhrẹ’ mai.—2 Tim. 4:2; Jọn 13:13.
2. Eme u dhesẹ re a rehọ edhere ọlọlọhọ ro wuhrẹ, kọ ẹvẹ u re kpomahọ ahwo?
2 Ta Eme nọ A re Wo Otoriẹ Rai: Jesu ọ rehọ eme elọlọhọ wuhrẹ ahwo ikpeware jọ nọ ọ jẹ kẹ ovuẹ obọ ugbehru na. (Mat., uzou 5-7) Oghẹrẹ nọ Jesu o ro wuhrẹ u gbe ogbotu ahwo nọ a jẹ gaviezọ kẹe unu. Eme ọ Jesu i duobọte elakpa nọ a vi nyai mu ei te epanọ a rọ ta nọ: “Ohwo ọvo ọ re ta ẹme wọhọ ohwo ọnana ha!” (Mat. 7:28, 29; Jọn 7:46) U du gwọlọ nọ ma rẹ ta eme egaga, hayo bru ehare ididi taure ma te ti wuhrẹ amọfa uzẹme na ziezi hi. Ma sae rehọ eware nọ ahwo a riẹ ro ru uzẹme na vẹ.
3. Eme ọ rẹ wọ ahwo jọ gwọlọ wuhrẹ amọfa eware bu hrọ ẹsiẹvo, kọ ẹvẹ ma sae rọ whaha onana?
3 Whọ rẹ Ta Eme Bu Hrọ Họ: Jesu o wo ahwo nọ ọ jẹ t’ẹme kẹ họ iroro rọ jiroro epanọ o re wuhrẹ ae eware bu te ẹsiẹvo. (Jọn 16:12) O gwọlọ nọ ma re muẹrohotọ je dhesẹ ororokẹ evaọ abọ nana, maero nọ ma tẹ be ta usiuwoma kẹ imoni, ahwo nọ a bi dhesẹ isiuru obọ, hayo emaha na. Ma rẹ yọroma re ma se ae eware ba ewuhrẹ bu hrọ ẹsiẹvo, o tẹ make rọnọ a be gaviezọ ziezi. Ahwo nọ a wo evezi a te ruabọhọ wuhrẹ re a wo eriariẹ kpahe Jihova Ọghẹnẹ.—Jọn 17:3; 1 Kọr. 3:6.
4. Fikieme u je woma re ma tẹrovi igogo-eme uwuhrẹ viukpọ eware efa nọ ma rẹ ta kpahe?
4 Tẹrovi Igogo-Eme: Nọ Jesu o je wuhrẹ ahwo, ọ ta eme bu hrọ ro reghe ahwo nọ a jẹ gaviezọ kẹe he. Orọnikọ okenọ ọ ta nọ: “Enọ e rọ eva uki kpobi . . . a vẹ te nya via,” ọ rọ ta eme buobu kpahe oghẹrẹ ekparomatha nọ ahwo nọ a te kpare ze a ti wo ho. (Jọn 5:28, 29) Nọ ma te bi ru obe-uwuhrẹ Ebaibol kugbe ohwo, joma tẹrovi igogo-eme na, ma vẹ whaha eware efa nọ i kpomahọ uwuhrẹ na ha nọ ma rẹ ta kpahe.
5. Didi oghale ma re wo nọ ma tẹ rọ edhere ọlọlọhọ ro wuhrẹ ahwo?
5 Eva e be were omai gaga inọ Jihova ọ rehọ edhere ọlọlọhọ ro wuhrẹ eware nọ i fo nọ ma riẹ! (Mat. 11:25) Joma daoma rehọ edhere ọlọlọhọ wuhrẹ ahwo re ma wo oghọghọ nọ u re no odibọgba nọ o bi wo ẹvi ze.