Eware Esa nọ I re Ru Onaa Ewuhrẹ Ra Woma Ziezi
1. Fikieme ma jẹ daoma ru onaa ewuhrẹ mai woma ziezi?
1 Owhowho-uvie kpobi yọ owuhrẹ. Makọ ma be ta usiuwoma n’uwou ruọ uwou, ru ozihebro, hayo obe-uwuhrẹ Ebaibol, ma rẹ kareghẹhọ inọ ẹme Ọghẹnẹ ma bi wuhrẹ ahwo. Orọnikọ eriariẹ jọ gheghe ma bi wuhrẹ ahwo ho. Ma bi fi obọ họ kẹ ai re a wo otoriẹ “ikere ẹri na” nọ e rẹ sai ru ai wo “usiwo.” (2 Tim. 3:15) Uvẹ-ọghọ riẹ o rro kẹhẹ! Ma gwọlọ ta ẹme kpahe eware esa nọ i re ru onaa ewuhrẹ mai woma ziezi.
2. Ẹvẹ ma sae rọ rehọ edhere ọlọlọhọ wuhrẹ ohwo?
2 Ru Ei Lọhọ: Ma tẹ riẹ kpahe oware jọ gaga, ma rẹ sai roro inọ o te jọ lọlọhọ kẹ ohwo nọ ma bi wuhrẹ re ọ riẹ oware na. Fikiere, who te bi wuhrẹ ohwo oware jọ evaọ Ebaibol, who ru ẹme na kẹre vrẹta ha. Eme nọ e mai wuzou na ọvo who re ru vẹ. Orọnikọ ọtabuo o rẹ mai ru ohwo wo otoriẹ oware he. (Itẹ10:19) O rẹ mai woma re who se ikereakere nọ e mai duobọte ẹme na ọvo. Who te se oria Ebaibol no, ẹme nọ ọ jariẹ kiekpahe uwuhrẹ na ọvo whọ rẹ ta ẹme kpahe. Evaọ Ovuẹ obọ Ugbehru na, Jesu o wuhrẹ ahwo eware ididi, rekọ evaọ edhere ọlọlọhọ gbe umutho eme.
3. Fikieme ma jẹ kẹ etadhesẹ, kọ evẹ e rẹ mai woma?
3 Iriruo Hayo Etadhesẹ: Iriruo gbe etadhesẹ e rẹ lẹliẹ ohwo roro didi jẹ kareghẹhọ oware. Riẹ nọ whọ gbẹ make riẹ iku ithethei e gbe he whọ sae kẹ etadhesẹ. Jesu ọ kẹ etadhesẹ ekpẹkpẹe nọ e rrọ lọlọhọ. (Mat. 7:3-5; 18:2-4) Iwoho nọ whọ rẹ drọ fihọ ẹmẹwẹ obe e rẹ sai fi obọ họ gaga. Whọ tẹ ruẹrẹ oma kpahe, who ti wo emamọ etadhesẹ.
4. Ẹvẹ ma sae rọ rehọ enọ fi obọ họ kẹ ọmọ-uwuhrẹ?
4 Nọ Enọ: Re ohwo ọ tẹ te kpahe fihọ onọ o re roro. Fikiere, whọ tẹ nọ ọmọ-uwuhrẹ ra onọ, kẹe uvẹ re o roro. Whọ tẹ varioma kẹe uyo na, whọ sae riẹ sọ o gine wo otoriẹ ẹme na ha. Ọ gbẹ kẹ uyo na gba ha, ukpenọ whọ kẹe uyo na, o rẹ mai woma re whọ nọe enọ efa nọ i re fi obọ họ kẹe kuyo ogbagba na. (Mat. 17:24-27) Ohwo ọvo nọ ọ rrọ owuhrẹ ọgbagba ọ rrọ họ. Fikiere, Ebaibol ọ tuduhọ omai awọ re ma hai wo ẹnyaharo evaọ onaa uwuhrẹ mai. Ere oruo o te wha esiwo se omai gbe enọ e gaviezọ kẹ omai.—1 Tim. 4:16.