Emamọ Eroruiruo Eware Nọ Ẹro Ọ Rẹ Ruẹ — UWOU-EBE ITANẸTE ọrọ Uwou-Eroro

Uwuhrẹ 47

Emamọ Eroruiruo Eware Nọ Ẹro Ọ Rẹ Ruẹ

Eme o gwọlọ nọ who re ru?

Rehọ ifoto, udhesẹ-oria, omaa-iruo, hayo eware efa ro ru ẹme uthubro nọ o wuzou vẹ viere.

FIKIEME U JE WUZOU?

Oware nọ a rẹ ruẹ u re ru ẹme vẹ hayo daji iroro vi ẹme unu gheghe.

FIKIEME who je fi eware nọ a rẹ ruẹ ba ewuhrẹ ra? Keme ere oruo o sai ru ewuhrẹ ra w’ẹgba viere. Jihova Ọghẹnẹ gbe Jesu Kristi a rehọ eware nọ a rẹ ruẹ wuhrẹ, yọ ma rẹ sai wuhrẹ mi ai. A te fi eware nọ a rẹ ruẹ kugbe ẹmeunu, ovuẹ na o rẹ rọ idhere ivẹ ruọ ohwo uzou. Onana o sai fiobọhọ si iroro ogbotu ra rehọ jẹ lẹliẹ ẹme na daruọ ae oma. Ẹvẹ whọ sai ro fi eware nọ a rẹ ruẹ ba ẹta emamọ usi na? Ẹvẹ o sai ro mu owhẹ ẹro nọ whọ be rehọ ai ruiruo ziezi?

Epanọ Iwuhrẹ Ilogbo na A Rehọ Eware nọ A Rẹ Ruẹ Ruiruo. Jihova ọ rehọ eware nọ a rẹ ruẹ nọ a rẹ kareghẹhọ ro ru iwuhrẹ obọdẹ. Evaọ aso jọ ọ rehọ Abraham ruọ otafe ọ tẹ ta nọ: “Ri obọ ehru, re who kele isi na, sọ whọ sai kele ai muẹ. . . . Ere emọ ra i re ti bu te.” (Emu. 15:5) Dede nọ o wọhọ nọ oware nọ ọ yeyaa riẹ na o lọhọ họ evaọ eriwo ohwo-akpọ, eyaa na i duobọte Abraham gaga o te fi ẹrọwọ họ Jihova. Evaọ oke ofa, Jihova o vi Jerimaya kpohọ uwou ọmebẹ ọ tẹ ta kẹe re ọ ruọ uwou ọmebẹ na re ọ ruẹ epanọ ọ be ma ebẹ. Ẹvẹ o kẹ uwuhrẹ te kpahe udu nọ Ọnọma na o wo kpahe ahwo-akpọ! (Jeri. 18:1-6) Kọ uwuhrẹ ohrọ nọ Jihova ọ rọ urre wuhrẹ o rẹ thọrọ Jona ẹro? (Jona 4:6-11) Jihova ọ tubẹ ta kẹ eruẹaro riẹ re a rọ ovuẹ eruẹaruẹ jọ ru edrama avọ ekwakwa nọ i fo edrama na. (1 Iv. 11:29-32; Jeri. 27:1-8; Izik. 4:1-17) Eware nọ e rọ uwou-udhu gbe etẹmpol na yọ ithatho eware nọ i re fiobọhọ k’omai wo otoriẹ eware obọ odhiwu. (Hib. 9:9, 23, 24) Ọghẹnẹ ọ tẹ jẹ rehọ aruọruẹ ro ruiruo rọ kẹ ovuẹ nọ u wuzou.—Izik. 1:4-28; 8:2-18; Iruẹru 10:9-16; 16:9, 10; Evia. 1:1.

Ẹvẹ Jesu ọ rọ rehọ eware nọ a rẹ ruẹ ro wuhrẹ? Okenọ otu Farisi gbe otu ilele Herọd a daoma re a rọ ẹmeunu riẹ gele iei fihọ ẹta, Jesu ọ tẹ ta nọ a rehọ ubi-ugho ze je si iroro kpohọ uwoho Siza nọ o rọ ubi-ugho na. O te ru ei vẹ nọ a rẹ rehọ eware Siza kẹ Siza a vẹ hwa eware Ọghẹnẹ kẹ Ọghẹnẹ. (Mat. 22:19-21) Re ọ kẹ uwuhrẹ kpahe Ọghẹnẹ nọ ma rẹ rọ eware nọ ma wo kpobi kẹ orro, Jesu ọ riobọhọ aye-uku oyegbere jọ evaọ etẹmpol na ọnọ azọhọ riẹ—ibi-ugho esese ivẹ—e rrọ eyero uzuazọ riẹ kpobi. (Luk 21:1-4) Evaọ oke ofa, ọ rehọ ọmaha ọboba kẹ oriruo omarokpotọ, ababọ isiuru-ọkwa-okpehru. (Mat. 18:2-6) Ọye ọvo o tube dhesẹ otofa omarokpotọ ẹkwoma awọ ilele riẹ nọ ọ wozẹ.—Jọn 13:14.

Idhere nọ A rẹ Rọ Rehọ Eware nọ A rẹ Ruẹ ro Ruiruo. Wo ohẹriẹ no Jihova, ma rẹ sae rọ eruẹaruẹ kẹ ahwo evuẹ hẹ. Ghele na, ifoto buobu nọ i re duobọte iroro na e rọ ebe Isẹri Jihova. Rehọ ai fiobọhọ kẹ ahwo nọ a wo isiuru ruẹ Aparadase otọakpọ na, onọ a yeyaa riẹ evaọ Ẹme Ọghẹnẹ na. Evaọ obe uwuhrẹ Ebaibol, whọ rẹ sai si iroro ọmọ-uwuhrẹ kpohọ ifoto jọ nọ i w’obọ kpahe oria nọ wha bi wuhrẹ na whọ vẹ jẹ nọe re ọ ta oware nọ o rọ ifoto na. O rọ oware nọ a re muẹrohọ inọ okenọ a rọ eruẹaruẹ jọ kẹ Emọs ọruẹaro na, Jihova ọ nọ inọ: “Emọs, eme whọ ruẹ?” (Emọs 7:7, 8; 8:1, 2) Whọ sae nọ enọ itieye na nọ whọ be kpọ iroro ahwo kpohọ ifoto nọ a ruẹrẹhọ wọhọ ekwakwa ewuhrẹ nọ a rẹ ruẹ na.

Who te kere ikelakele fihọ obe hayo rehọ omaa ikelakele nọ u dhesẹ othotha nọ eware e rọ via ro ru uwuhrẹ, onana o sai fiobọhọ kẹ ahwo wo otoriẹ viere kpahe eruẹaruẹ wọhọ “asiahrẹ” ọrọ Daniẹl 4:16 na gbe “ekpoka udhosa gbikpe” ọrọ Daniẹl 9:24 na. Ikelakele itieye nọ a rẹ ruẹ e rrọ ebe uwuhrẹ mai buobu.

Evaọ uwuhrẹ Ebaibol uviuwou ra, o rẹ sae lọhọ viere re a wo otoriẹ ẹmeọta kpahe eware wọhọ uwou-udhu, etẹmpol obọ Jerusalẹm, gbe etẹmpol eruẹaruẹ Izikiẹl na otẹrọnọ wha rehọ uwoho dhesẹ eware na. A rẹ sae ruẹ enana evaọ Insight on the Scriptures, emu ọ New World Translation of the Holy Scriptures—With References na, gbe ikere Uwou-Eroro Na buobu.

Who te bi se Ebaibol na kugbe uviuwou ra, rehọ omaa udhesẹ-oria ro ruiruo ziezi. Rri onya Abraham no Ọr kpohọ Heran rite Bẹtẹl. Rri edhere nọ Izrẹl ọ nya okenọ orẹwho na u no Ijipti je kpohọ Ẹkwotọ Eyaa na. Gwọlọ oria nọ a rọ kẹ orua kpobi ọrọ Izrẹl wọhọ ukuoriọ. Muẹrohọ epanọ ẹkwotọ esuo Solomọn ọ rro te. Rri edhere nọ Elaeja ọ nya evaọ okenọ ọ jẹ dhẹ no Jezril kpohọ igbrẹwọ na thethabọ vrẹ Biẹsheba okenọ Jezibẹl ọ gwọlọ iẹe kpe. (1 Iv. 18:46–19:4) Gwọlọ ikpewho gbe ewho nọ Jesu ọ jọ ta usiuwoma. Rri lele erẹ Pọl wọhọ epanọ a dhesẹ evaọ obe Iruẹru na.

Ifoto i re fiobọhọ evaọ okenọ who te bi dhesẹ iruẹru ukoko na kẹ emọ-uwuhrẹ Ebaibol. Whọ rẹ sai dhesẹ iprogramo jọ nọ a kporo kẹ ọmọ-uwuhrẹ ra, who ve dhesẹ oghẹrẹ evuẹ nọ ma rẹ t’ẹme kpahe evaọ ikokohọ mai. U duobọte udu ibuobu no nọ a nya wariẹ Ọgwa Uvie na hayo nya wariẹ uwou ogha ọ Isẹri Jihova jọ. Onana o sae jọ emamọ edhere jọ nọ a re ro si iroro ethọthọ nọ a wo kpahe iruo mai gbe ẹjiroro riẹ no. Whọ tẹ be rehọ ohwo nya wariẹ Ọgwa Uvie na, dhesẹ epanọ o ro wo ohẹriẹ no eria egagọ efa. Dhesẹ epanọ oria na u kiehọ oma kẹ ewuhrẹ te. Dhesẹ eware nọ a ruẹrẹhọ kẹ odibọgba ẹgbede mai—eria nọ a rẹ jọ ghale ebe, omaa ẹkwotọ na, gbe itehe azọhọ unevaze (nọ u wo ohẹriẹ no umudo nọ a re ghoro).

Nọ a te wo ividio nọ a ru evaọ otọ ekpakpọ Ugboma Esuo na, rehọ enana bọ evaifihọ kpahe Ebaibol na, re i ru emọ-uwuhrẹ na riẹ kpahe iruẹru Isẹri Jihova, jẹ tuduhọ enọ i bi rri rai awọ re a rria lele ehri-izi Ebaibol na.

Eroruiruo Eware nọ A rẹ Ruẹ kẹ Ogbotu Ologbo. A tẹ ruẹrẹ ai họ je dhesẹ ai ziezi, eware nọ a rẹ rọ ẹro ruẹ e sae jọ emamọ obufihọ ewuhrẹ kẹ ogbotu ahwo. Utu ọrigbo nọ o wo ẹrọwọ avọ areghẹ na ọ k’omai eware nọ a rẹ rọ ẹro ruẹ evaọ oghẹrẹ sa-sa no.

Ifoto nọ a drọ e rrọ izoẹme ewuhrẹ ọ Uwou-Eroro Na nọ owuhrẹ na o re ro fiẹgba họ eme nọ i wuzou. Onana o rọ uzẹme re kpahe ebe nọ a re ro ru Uwuhrẹ Obe Ukoko.

Omaa-ẹmeọta evuẹ ogbotu jọ e rẹ whoma họ abọ eroruiruo eware nọ a rẹ rọ ẹro ruẹ nọ a re ro dhesẹ ẹme vẹ. Rekọ, o rẹ mae kẹ erere nọ a tẹ tẹrovi oware nọ o rrọ Ebaibol na, onọ ahwo buobu evaọ ogbotu na a kru họ obọ na. O tẹ gwọlọ nọ a rẹ rehọ ifoto hayo edhesẹ igogo eme lahwe re a ru eme jọ vẹ evaọ ẹmeọta, kake kiẹ riwi re u mu owhẹ ẹro nọ ahwo nọ a rọ obọ emu evaọ ogbotu na a rẹ sae rue riẹ vevẹ (hayo sei). Ọthobọ gheghe a rẹ rọ rehọ eware itieye na ro ru ẹme.

Ute mai evaọ eroruiruo eware nọ a rẹ ruẹ evaọ okenọ ma tẹ be t’ẹme orọnikọ re ma ru ahwo hwẹ hẹ. Ma te dhesẹ eware nọ e rrọ kpatiẹ nọ a rẹ rọ ẹro ruẹ kẹ ahwo, u re fiẹgba họ ẹme nọ ọ gwọlọ oruvẹ obọdẹ. Eware itieye na i re w’iruo gaga evaọ okenọ i te fiobọhọ ru ẹme nọ a ta vẹ, ru ei lọhọ re a wo otọ riẹ, hayo okenọ e tẹ kẹ imuẹro egaga kpahe ẹgbagba ẹme nọ a ta. A tẹ rehọ iẹe ruiruo ziezi, oware nọ a rẹ rọ ẹro ruẹ nọ u fo u re duobọte ahwo te epanọ a rẹ rọ kareghẹhọ oware na gbe ẹme uthubro na evaọ ikpe buobu.

Ẹgba nọ a re ro yo ẹme jẹ ruẹ ude i wo abọ ologbo evaọ ewuhrẹ. Kareghẹhọ epanọ Iwuhrẹ nọ e mai kpehru na a rehọ ezọ gbe ibiaro ahwo ro ruiruo evaọ ewuhrẹ, jẹ daoma raro kele ai evaọ omodawọ re whọ nyate amọfa oma.

OWARE NỌ A RẸ RUẸ NỌ U RE W’IRUO ZIEZI . . .

U re fielo họ je ru eware nọ e gwọlọ ẹromuhọ obọdẹ vẹ.

U re wo uthubro wọhọ ute ọsosuọ rai.

A tẹ be jọ eplatfọmo dhesẹ iẹe, ahwo nọ a rrọ ogbotu na kpobi a rẹ rue riẹ.

ORIA IRUO: Kere eware jọ nọ a rẹ ruẹ nọ whọ gwọlọ ro ruiruo fihọ obotọ . . .

Rọ bọ ovuhumuo kẹ ukoko Jihova

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

Ro wuhrẹ ọmọ izẹme Ebaibol jọ

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․