Rehọ Eware nọ Ẹro Ọ rẹ Ruẹ ro Wuhrẹ
1 Re ọ sae kẹ idibo oke anwae riẹ evuẹ jọ nọ i wuzou gaga, Jihova ọ rehọ eruẹaruẹ gbe ewezẹ ro ruiruo ẹsejọ. Roro kpahe eruẹaruẹ nọ Izikiẹl ọ ruẹ kpahe akẹkẹ odhiwu Jihova. (Izik. 1:1-28) Dai roro epanọ oma o jọ Daniẹl nọ ọ wezẹ ewezẹ nọ u wo otofa eruẹaruẹ nọ i dhesẹ egaga-esuo akpọ na unọjọ utọjọ. (Dan. 7:1-15, 28) Kọ ẹvẹ kpahe eviavia igbunu nọ a ru via kẹ Jọn ukọ na kpahe eware nọ e te via evaọ etoke “edẹ Ọnowo na”? (Evia. 1:1, 10) Jihova ọ rehọ eware nọ a rẹ ruẹ vevẹ, jẹ vọ avọ ẹgba ro wuhrẹ ai, o tẹ lẹliẹ eware na jọ iroro rai oke thethei.
2 Ma tẹ gwọlọ wuhrẹ amọfa uzẹme Ebaibol na evaọ edhere nọ o gbẹ rọ kake thọrọ ae ẹro ho, ma sae rehọ ividio mai wuhrẹ re. Ividio mai e ta kpahe eware buobu, je dhesẹ oware nọ ma je fi eva họ Ebaibol na, ukoko Jihova, gbe ehri-izi nọ i re fi obọ họ kẹ omai yeri uzuazọ uvi Oleleikristi. Rri umutho idhere jọ nọ ma sae rọ rehọ ividio mai wuhrẹ amọfa. Enọ e rrọ obotọ na yọ usu ividio jọ nọ a sae ro ruiruo.
3 Evaọ Odibọgba Na: Kọ whọ be hae ta kẹ ọmọ-uwuhrẹ Ebaibol ra kpahe okugbe-inievo Oleleikristi akpọ-soso mai? Rehọ ividio mai na Our Whole Association of Brothers ro dhesẹ iẹe kẹe. Whọ sae rehọ iẹe kẹe re o rri taure wha te ti ru uwuhrẹ ofa hayo whai imava wha rri rie kugbe evaọ etoke obe-uwuhrẹ na. Wha vẹ kiẹ enọ ọkiẹkpemu nọ e rrọ Odibọgba Uvie Mai ọrọ June 2002 na kugbe.
4 Izoge, whọ sae ta kẹ owuhrẹ ra inọ whọ gwọlọ dhesẹ ividio nana Jehovah’s Witnesses Stand Firm Against Nazi Assault hayo Faithful Under Trials—Jehovah’s Witnesses in the Soviet Union kẹ ahwo eklase ra soso. Vuẹ owuhrẹ na inọ whọ te rọ enọ ze re wha rọ kiẹ ividio na riwi, whọ vẹ ruẹrẹ enọ nọ e rrọ Odibọgba Uvie Mai ọrọ June 2001 hayo February 2003 na họ epanọ whọ rẹ rọ rehọ ae lele eklase na tẹme.
5 Ahwo Uviuwou gbe Egbẹnyusu: Esẹgbini, anwọ oke nọ a ro si obọ no ividio na Young People Ask—How Can I Make Real Friends?, oke vẹ emọ rai i rri ividio na ba? Kọ wha gbẹ daoma wariẹ rri rie eva uwuhrẹ uviuwou rai notha? Odibọgba Uvie Mai ọrọ April 2002 u wo enọ nọ wha rẹ rọ rehọ iẹe jiroro kugbe evaọ edhere ọsasa avọ ọbọga.
6 Kọ u wo egbẹnyusu ra jọ evaọ ukoko na nọ whọ hae gwọlọ zizie ziọ uwou ra? Ividio ọ Respect Jehovah’s Authority na nọ wha re rri kugbe o te kẹ ọbọga evaọ owọwọ yena, maero nọ wha tẹ rehọ enọ nọ e rrọ Odibọgba Uvie Mai ọrọ September 2004 na rọ kiẹ eware nọ wha jariẹ wuhrẹ na riwi.
7 Uvẹ Efa: Idhere efa vẹ whọ sae rọ rehọ ividio 20 nọ ma wo na ro ruiruo? Kọ ividio ọvo hayo ivẹ jọ nọ who re dhesẹ kẹ ohwo jọ nọ whọ rẹ nyabru ẹsikpobi u ti fi obọ họ kẹe wo ẹnyaharo abọ-ẹzi? Kọ whọ sae vuẹ ahwo nọ a be rẹrote uwou-odi, uwou-imu, hayo oria ofa jọ inọ whọ gwọlọ dhesẹ ividio na kẹ ahwo nọ a rrọ oria na? Kọ ividio na i ti fi obọ họ ru nọ imoni ra nọ e rrọ ukoko ho, erivẹ, gbe ibe-iruiruo ra a jẹ rehọ emamọ ẹro rri egagọ ra? Ividio mai e rẹ were oma, i re wuhrẹ ohwo, je ru eware vẹ ohwo ẹro ziezi. Rehọ ai wuhrẹ amọfa.
[Study Questions]
1. Ẹvẹ Jihova ọ rọ rehọ eware nọ ẹro ọ rẹ ruẹ ro wuhrẹ idibo oke anwae riẹ, kọ eme o no rie ze?
2. Eware vẹ nọ ẹro ọ rẹ ruẹ ma sai ro wuhrẹ amọfa uzẹme Ebaibol?
3. Eme whọ rẹ sai ro ruiruo rọ kpọ iroro ọmọ-uwuhrẹ rri ukoko na?
4. Ekwakwa uwuhrẹ vẹ uzoge Oleleikristi ọ sai ro ruiruo evaọ obọ isukulu?
5. Eme ọ riẹ nọ esẹgbini e sai ro ruiruo eva uwuhrẹ uviuwou?
6. Ẹvẹ whọ sai ro ru ọruẹrẹfihotọ nọ a rẹ rọ bọ ohwohwo ga kugbe egbẹnyusu?
7. Idhere vẹ nọ i rovie fihọ whọ rẹ sai roro kpahe nọ whọ rẹ rọ rehọ ividio mai ruiruo?