Rọ Ividio Wuhrẹ Emọ-Uwuhrẹ Ebaibol Ra

Eware nọ a rẹ rọ ẹro ruẹ nọ a re ro wuhrẹ i re fiobọhọ kẹ ọnọ a bi wuhrẹ na wo otoriẹ jẹ kareghẹhọ oware nọ a bi wuhrẹ iẹe na. Jihova, Owuhrẹ nọ Ọ Mai Kpehru na ọ rehọ eware nọ a rẹ rọ ẹro ruẹ ro wuhrẹ ahwo obọdẹ eware. (Emu 15:5; Jer 18:1-6) Ere ọvona Jesu, Owuhrẹ Ologbo na ọ rehọ eware nọ a rẹ rọ ẹro ruẹ ro wuhrẹ ahwo re. (Mt 18:2-6; 22:19-21) Anwọ ikpe jọ ze na, oware jọ nọ a rẹ rọ ẹro ruẹ nọ a bi ro wuhrẹ ahwo nọ u bi fiobọhọ gaga họ ividio. Kọ whọ be hae rehọ ividio wuhrẹ emọ-iwuhrẹ Ebaibol ra ziezi?

A ruẹrẹ ividio ikpe họ no nọ i ti fiobọhọ kẹ omai rọ ibroshọ Emamọ Usi nọ U No Obọ Ọghẹnẹ Ze! ro wuhrẹ ahwo. Izoẹme ividio na buobu e rọwo kugbe enọ nọ i mu gbalọ nọ e rrọ ibroshọ na. Ọnọ ọ rrọ jw.org na o dhesẹ uzoẹme nọ u fo nọ who re jo kporo ividio na. Ofariẹ, ividio efa nọ ma re kporo nọ ma tẹ be rọ ebe efa mai wuhrẹ ahwo e rrọ Ẹkpẹti Ekwakwa Ewuhrẹ mai na.

Kọ who bi wuhrẹ uzoẹme Ebaibol jọ kugbe ọmọ-uwuhrẹ ra nọ o bi wo otoriẹ riẹ hẹ? Hayo kọ ọmọ-uwuhrẹ ra ọ be rẹriẹ ovao dhe odawọ jọ? Jọ evaọ jw.org® gbe JW Broadcasting® gwọlọ ividio nọ e rẹ sai fiobọhọ kẹe. O tẹ lọhọ dede, whẹ avọ ọmọ-uwuhrẹ ra na wha sai rri ividio na jọ kugbe, kẹsena wha vẹ ta kpahe iẹe.

K’amara k’amara, a re siobọno ividio ekpokpọ. Nọ who bi rri ai na, daoma roro oghẹrẹ nọ whọ sae rọ rehọ ai wuhrẹ amọfa.