Uwuhrẹ 51

Ẹme Nọ Ọ Rẹ Nya Lele Oke, Nọ A Ghale Ziezi

Eme o gwọlọ nọ who re ru?

Ru ẹme ra lele umuo oke nọ a fihọ na, jẹ ghale oke ra fihọ k’abọ k’abọ ẹme na.

FIKIEME U JE WUZOU?

U fo re a rehọ oke nọ u te kẹ abọ ọvuọvo ọrọ igogo eme uthubro na. U wuzou re a ku ewuhrẹ na họ evaọ ẹruoke.

DEDE nọ ewoma ewuhrẹ ra họ oware nọ a rẹ mae tẹrovi, u fo nọ who re muẹrohọ oke ra re. U wo oke nọ a fihọ nọ iwuhrẹ mai i re ro muhọ je kuhọ. Re a nyate onana o gwọlọ obufihọ ohwo kpobi nọ o wo ẹme evaọ ewuhrẹ na.

Evaọ etoke Ebaibol, epanọ ahwo a rri uzuazọ u wo ohẹriẹ no epanọ a jọ eria buobu rri rie nẹnẹ. A dhesẹ oke evaọ eme wọhọ “ole auwa avọ esa” hayo “ole auwa avọ ikpe.” (Mat. 20:3-6; Jọn 1:39) Uduama o jariẹ tere he kpahe elele oke evaọ iruẹru ekẹdẹ kẹdẹ. Evaọ abọjọ akpọ na nẹnẹ, eriwo otiọye na a wo kpahe oke.

Ghele na, dede nọ uruemu ẹwho hayo onọ u j’ohwo u re ru ahwo jọ nọ a gbe se ẹnya lele oke gboja ha, ma sai wo erere otẹrọnọ ma wuhrẹ re ma sei gboja. Nọ a tẹ kẹ ahwo buobu ẹme evaọ ewuhrẹ, o gwọlọ nọ ma re roro kpahe oke nọ a fihọ kẹ abọ ọvuọvo. Ehri-uzi nọ o ta nọ “u fore a ru eware kpobi ziezi gba kiete” na o rẹ sai kie kpahe ẹnya lele oke nọ a fihọ kẹ iwuhrẹ mai.—1 Kọr. 14:40.

Epanọ A rẹ rọ Nya Lele Oke. Omaruẹrẹhọ họ ugogo oware na. Ẹsibuobu, iruẹme nọ i re wo ẹbẹbẹ kpahe ẹnya lele oke a ruẹrẹ oma kpahe te he. Ẹsejọhọ a rọ udu so omobọ rai ga hrọ. Hayo a sae va oke omaruẹrẹhọ ẹme na bẹsenọ oke o rẹ rọ j’oma vae abọ no. Re whọ nya lele oke ziezi u re muhọ avọ ovuhumuo nọ who re wo kẹ ẹme ra gbe unevaze nọ whọ rẹ rọ ruẹrẹ oma kpahe ziezi.

Kọ ẹme isase a k’owhẹ? Kaki se eria Uwuhrẹ avọ 4 rite ọrọ avọ 7 na, enọ e t’ẹme kpahe ẹmeọta ọriẹriẹ, izudhe, ẹgba-ofihọ ẹme, gbe ẹgba-ofihọ igogo eme. Kẹsena, who ve fi ohrẹ oyena h’iruo nọ who bi se oria nọ a k’owhẹ do via na. Rri oke lele isase ra na. Kọ o gwọlọ re who se vẹrẹ viere re whọ sai lele umuo oke ra? Se vẹrẹ evaọ eria nọ i wuzou tere he, rekọ gbẹ rehọ izudhe gbe ẹmẹrera fiẹgba họ eme nọ i wuzou. Dhe oria na esese. Nọ ẹriẹriẹ isase ra o bi woma viere na, o te lọhọ viere re whọ nya lele umuo oke ra.

Kọ who bi ti ru ẹme ra no obe ze? U du gwọlọ nọ who re kere eme ra thethei hi—kere enwene eme na kpobi fihọ obe—re whọ sae nya lele umuo oke ra. Who te bi ruiruo kpahe oria Uwuhrẹ avọ 25, who ti wuhrẹ kpahe edhere nọ ọ mai woma. Wo igogo eware isoi enana h’iroro: (1) Ruẹrẹ ẹme ra họ ziezi, rekọ eme na i bu hrọ họ. (2) Wo igogo eme na fihọ iroro vevẹ, rekọ who se ihie eme na kpobi fihọ uzou hu. (3) Kere umuo oke nọ whọ gwọlọ raha fihọ abọ ẹme na ọvuọvo fihọ omaa-ẹmeọta ra hayo oria nọ oke na o rẹ jọ nọ who te te ugogo ẹme jọ. (4) Whọ tẹ be ruẹrẹ oma kpahe, roro eme nọ who re sino otẹrọnọ whọ ruẹ nọ whọ be te re oke. (5) Wuhrẹ oghẹrẹ nọ whọ te rọ ta ẹme na.

Ewuhrẹ ẹme na o wuzou. Nọ who bi wuhrẹ na, muẹrohọ oke abọ ọvuọvo ọrọ ẹme ra. Wuhrẹ ẹme ra na ẹwẹwariẹ bẹsenọ ẹme na kpobi ọ rẹ rọ nya lele oke na. Whọ daoma keke eme buobu fihọ ẹme ra ha. Dina riorio obọ kẹ ẹme na omojọ keme nọ whọ tẹ be jọ aro ogbotu ru ẹme ọ sai dina theri vi epanọ whọ rọ jọ obọ uwou ruẹrẹ oma kpahe kẹe.

Ẹghale Abọ Sa-Sa. Re a nya lele oke ziezi u w’obọ kpekpekpe kugbe ẹghale abọ sa-sa ẹme owowa. Whọ rẹ raha oke na buobu fihọ oma ẹme na dẹẹ. Etẹe igogo eme uthubro na e rrọ. Eme-emuhọ ẹme na i re theri ba umuo nọ e rẹ rọ nyate itee esa nọ ma t’ẹme te evaọ oria Uwuhrẹ avọ 38 na. Rọ nya lele oria Uwuhrẹ avọ 39 na, oma ẹme na o re theri hrọ họ te epanọ oke o gbẹ rọ jariẹ ziezi kẹ emamọ ekuhọ họ.

Omodawọ ra re whọ nya lele oke ziezi o rẹ lẹliẹ ẹme ra jọ ziezi je dhesẹ adhẹẹ kẹ amọfa nọ a wo abọ evaọ ewuhrẹ na je dhesẹ adhẹẹ rọkẹ ukoko na soso.

EPANỌ A RE RO RU EI

Ruẹrẹ oma kpahe ziezi—yọ o jọ evaọ ẹruoke.

Fi oke nọ u fo họ kẹ abọ ọvuọvo ẹme ra, whọ vẹ jẹ nya lele oke na.

Wuhrẹ oghẹrẹ nọ whọ te rọ ta ẹme ra na.

ORIA IRUO: M’omaa re who te oria iwuhrẹ ukoko iminiti 15 rite 20 re a te ti muhọ ẹkwoma oke lelele nọ who re fihọ nọ whọ rẹ rọ ruẹrẹ oma ra gbe uviuwou ra kpahe. Nyasiọ oke ba nọ wha re ro te obei. Roro kpahe ebẹbẹ nọ e rẹ sae lẹliẹ owhai leti. Dawo omaa ra na riwi unuẹse buobu, hai ru inwene nọ i fo. Epọvo na who re ru re nọ who te bi ru ẹme.