Ẹkpẹti Onọ

◼ Ẹvẹ ma sae rọ ruẹ nnọ a nya lele oke evaọ abọ iwuhrẹ ukoko kpobi?

Oke o rẹ dhẹ kpata kpata nọ ma te wo emamọ ẹme nọ ma be ta kẹ egbẹnyusu. Fiki onana, o rẹ sae jọ bẹbẹ re ma ru abọ ewuhrẹ na kpobi lele oke nọ a fihọ. Eme ọ rẹ sai fi obọ họ?

Muhọ evaọ ẹruoke. Okenọ ukoko na kpobi u te kuomagbe, o rẹ sai fi obọ họ re a zizie ogbotu na re a keria oware wọhọ uminiti ọvo hayo ivẹ taure oke ewuhrẹ na u te ti te, re ewuhrẹ na ọ sai muhọ kpatiẹ evaọ oke nọ a fihọ na. (Ọtausi. 3:1) Iwuhrẹ nọ ahwo a rẹ jọ bu hu, wọhọ iwuhrẹ kẹ usiuwoma ota, a rẹ rehọ ai raha oke rọ hẹrẹ enọ e gbẹ rrọ emu tha ha.

Ruẹrẹ oma kpahe ziezi. Ugogo oware jọ nọ u re fi obọ họ evaọ ẹnya lele oke họ oma o ruẹrẹ kpahe. Wo ẹjiroro ẹme na fihọ uzou ziezi. Riẹ igogo eme na, re who ru ai lahwe. Who ru re eware nọ i wuzou tere he e rehọ oke ra ha. Ru ẹme na lọlọhọ. Otẹrọnọ ẹme na ọ gwọlọ idhesẹvia hayo ekiẹriwo, wha jọ obọ uwou wariẹ ae tao. Epanọ o rẹ lọhọ te kpobi, rri oke nọ who bi wuhrẹ ẹme ra do via na.

Ghale ẹme ra. O tẹ make rọnọ ẹme nọ a k’owhẹ na yọ onọ whọ rẹ ta ovavo hayo onọ ogbotu ọ rẹ kpahe fihọ, whọ sae ruẹ nọ u ti fi obọ họ otẹrọnọ whọ ghale ẹme na fihọ abọ sa-sa. Jiroro unu oke nọ whọ rẹ raha fihọ abọ ọvuọvo, who ve kere onana fihọ akotọ obe ẹme ra na. Kẹsena who ve muẹrohọ oke ra evaọ okenọ who bi ru ẹme na. Evaọ ẹme nọ ogbotu ọ rẹ kpahe fihọ, whaha agbefẹ ọ ahwo buobu nọ who re se re a kpahe ẹme evaọ abọ emuhọ na, nọ whọ gbẹ rọ roma totọ ta eme nọ e mai wuzou nọ e te roma via uwhremu na ha. Enọ i re ru Uwuhrẹ ọ Uwou-Eroro a rẹ nya siọ oke ba ziezi nọ a rẹ rọ kiẹ etehe ọkiẹriwo na evaọ obọ ekuhọ. A rẹ jẹ yọrọ oma re a siọ oke ole gbe olẹ ekuhọ na ba ẹre.

Kuhọ evaọ ẹruoke. Otẹrọnọ ewuhrẹ o wo abọ sa-sa, wọhọ Ewuhrẹ Odibọgba na, oruẹme kpobi ọ rẹ riẹ okenọ abọ riẹ o ti ro muhọ je kuhọ. Eme a rẹ sai ru otẹrọnọ oke o be vabọ no? Oniọvo ọvo jọ hayo efa a sai bru ẹme rai kpẹre ẹkwoma ẹro nọ a re muhọ igogo eme na ọvo jẹ nya siọ eme nọ i wuzou tere he ba. Areghẹ nọ a re ro ru onana yọ oka jọ ọrọ owuhrẹ nọ o wo ona.

Wọhọ ogbotu, ma rẹ sai fi obọ họ kẹ oniọvo nọ o bi ru ẹme na ẹkwoma iyo mai nọ ma re kele kp’aka kp’udo ho. Fikiere, mai kpobi ma rẹ sai fi obọ họ ru nọ iwuhrẹ e jẹ nya ‘kpatiẹ je lele ọruẹrẹfihọ.’—1 Kọr. 14:40.