Ithubro Rọkẹ Enọ I re Ru Ẹme Evaọ Ewuhrẹ Odibọgba
Muhọ no uvitha Odibọgba Uvie Mai nana vrẹ, ma bi ru inwene jọ evaọ eme nọ ma be hai kere evaọ omaa Ewuhrẹ Odibọgba. Ithubro obotọ na yọ ofiba gbe oruvẹ orọ eware nọ ma ta evaọ uzoẹme na “Epanọ Ma rẹ rọ Ruẹrẹ Oma Kpahe kẹ Ewuhrẹ Odibọgba,” nọ o rrọ Odibọgba Uvie Mai ọrọ May 2009.
◼ Ẹme: Onana yọ ẹme nọ a re ru no obe nọ a dhesẹ ze nọ ogbotu na ọ rẹ kpahe fihọ họ. Oruẹme na ọ rẹ ta kpahe eware nọ e te mae kẹ ukoko na erere.
◼ Enọ gbe lyo: Wọhọ Uwuhrẹ Uwou-Eroro na, eme-emuhọ gbe erọ ekuhọ abọ nana e rẹ jọ kpẹkpẹe gaga, yọ idhe-eme na kpobi i re wo enọ. Ọnọ o bi ru ẹme na ọ rẹ ta eme bu hrọ họ. A rẹ sai se ikere nọ i fielo họ ẹme na otẹrọnọ oke o riẹ. A re du se idhe-eme na ha, ajokpanọ a jọ Odibọgba Uvie Mai na ta ere.
◼ Ẹme nọ A rẹ Kpahe Fihọ: Onana yọ ẹme nọ a re ru nọ ogbotu na ọ rẹ kpahe fihọ re. Orọnikọ ẹme nọ a re ru ovavo ho, yọ orọnikọ enọ gbe iyo a re ro ru oma riẹ kpobi hi.
◼ Idhesẹvia gbe Ekiẹriwo: Nọ a te kere fihọ abọ ẹme jọ inọ ru odhesẹvia, u dhesẹ nọ oniọvo nọ a kẹ ẹme na ọ rẹ ta kẹ inievo efa re a ru odhesẹvia. Ọ rẹ salọ ahwo nọ a rẹ sae riẹ odhesẹvia na ru ziezi, enọ e rrọ emamọ oriruo, yọ o tẹ lọhọ ọ rẹ kake vuẹ ae kpahotọ. U fo ho re ma rehọ iwhowho-uvie ekpokpọ hayo enọ i wo onaa tere he ro ru odhesẹvia usiuwoma ota fikinọ ma gwọlọ re a wo uvẹ nọ a rẹ rọ gadiẹ eplatfọmo, dede na a sae rehọ ejọ ru enọ a be ta usiuwoma kẹ. Iwhowho-uvie nọ i bi ru odhesẹvia a rẹ rẹriẹ ovao ku ogbotu na. Evaọ eplatfọmo enọ a be kiẹriwi a rẹ jọ ta ẹme rai orọnikọ oria ẹkeria rai hi. Oruẹme na ọ rẹ wariẹ idhesẹvia gbe ekiẹriwo kugbe enọ o ti ro ru ai. Otẹrọnọ a jọ ewuhrẹ re oke no, yọ oniọvo jọ ọ gwọlọ bru ẹme riẹ kpẹre, orọnikọ idhesẹvia gbe ekiẹriwo ọ rẹ seba ha. Idibo iruiruo a rẹ nọ mi ọnọ o re koko iruẹru ugboma ekpako na họ hayo ọkpako ọfa taure ọ tẹ te salọ ahwo odhesẹvia hayo ọkiẹriwo.
Otẹrọnọ a dhesẹ oghẹrẹ nọ a re ro ru ẹme jọ, ere a rẹ nya lele. Nọ inievo a te bi ru eme evaọ Ewuhrẹ Odibọgba na wọhọ epanọ ma dhesẹ na, o te whae ze nọ Iwuhrẹ Odibọgba e te rọ nya ‘kpatiẹ ziezi.’—1 Kọr. 14:40.