Epanọ Ma rẹ rọ Ruẹrẹ Oma Kpahe kẹ Ewuhrẹ Odibọgba
1. Eme họ ẹjiroro Ewuhrẹ Odibọgba na, kọ ẹvẹ ma sai ro wo erere noi ze ziezi?
1 A ruẹrẹ Ewuhrẹ Odibọgba na họ re u fi obọ họ k’omai wo onaa evaọ odibọgba na. Eware nọ a rẹ mae jariẹ ta kpahe họ, ewhowho emamọ usi Uvie na, epanọ ma re ro ru ilele, gbe ewhowho ẹdẹ ẹdhoguo Ọghẹnẹ nọ ọ be tha na. (Mat. 28:20; Mak 13:10; 2 Pita 3:7) Nọ ma tẹ ruẹrẹ oma kpahe ziezi je wobọ evaọ ewuhrẹ nana, ẹsiẹe ma rẹ mai wo erere noi ze.
2. Ẹvẹ ma sae rọ ruẹrẹ oma kpahe kẹ ẹme nọ a ti ru re ma wo erere noi ze?
2 Ẹme nọ A re Ru Ovavo: Evaọ ẹsibuobu a re dhesẹ oria nọ a re ru ẹme na no ze kẹ oruẹme na evaọ Odibọgba Uvie Mai na. Se oria nọ a rọ ẹme na no ze gbe Ikereakere nọ e riẹ na, who ve roro epanọ whọ sai ro fi eme na họ iruo evaọ odibọgba ra.
3. Ẹvẹ ma rẹ rọ ruẹrẹ oma kpahe kẹ ẹme enọ gbe iyo?
3 Ẹme Enọ gbe Iyo: A re ru ẹme nana wọhọ Uwuhrẹ Uwou-Eroro na, avọ eme-emuhọ gbe erọ ekuhọ nọ e rẹ jọ kpẹkpẹe. Si usi họ otọ igogo-eme nọ e rrọ edhe-ẹme kpobi, jẹ ruẹrẹ oma kpahe re whọ kẹ iyo nọ e rẹ bọ amọfa ga.
4. Ẹvẹ ma sae rọ ruẹrẹ oma kpahe kẹ ẹme nọ ogbotu ọ rẹ kpahe-fihọ?
4 Ẹme nọ Ogbotu Ọ rẹ Kpahe-Fihọ: Ohwo nọ o bi ru ẹme nana ọ rẹ ta eme jọ ovavo tao, kẹsena o ve zizie ogbotu na re a kpahe ẹme. Who te si usi họ otọ igogo-eme, je se ikere nọ e rrọ idhe-eme na, whọ te sae kuyo enọ nọ a te nọ. Oniọvo nọ o bi ru ẹme na ọ te daoma re ọ ruẹ nọ ogbotu na ọ rọ igogo-eme na via.
5. Eme o re fi obọ họ k’omai wo erere ziezi no idhesẹvia ze?
5 Idhesẹvia: Eme jọ i re wo idhesẹvia nọ i re dhesẹ epanọ a sai ro fi oware nọ a bi wuhrẹ na họ iruo evaọ ẹkwotọ ukoko na. A sae vuẹ ekpako ukoko, iwhowho-uvie nọ i wo onaa ziezi, hayo ekobaro re a ru idhesẹvia na. Roro kpahe oghẹrẹ nọ a ti ru odhesẹvia na evaọ oke oma ruẹrẹ kpahe ra. Nọ a tẹ rọ edhere oriruo nọ o rrọ Odibọgba Uvie Mai ro ru odhesẹvia, roro kpahe epanọ whọ sae rọ rehọ eme obọra rọ tae kẹ ohwo kpobi nọ whọ nyaku. Ruẹ nọ who wo obe hayo emagazini nọ a ti ro ru odhesẹvia na. Wha sae jọ etoke Uwuhrẹ Uviuwou rai ru odhesẹvia epanọ a sai ro fi ebe nana họ ada.
6. Fikieme u je woma re ma ruẹrẹ oma kpahe kẹ Ewuhrẹ Odibọgba na?
6 Nọ ma tẹ ruẹrẹ oma kpahe je roro kpahe eware nọ ma te jọ Ewuhrẹ Odibọgba na wuhrẹ, ẹsiẹe ma rẹ mai wo erere noi ze. Ere oruo u re ru nọ ma jẹ sae tuduhọ ohwohwo awọ ziezi. (Rom 1:11, 12) Nọ ma tẹ ruẹrẹ oma kpahe ziezi kẹ Ewuhrẹ Odibọgba, ma te sai ru iruo odibọgba mai gba ziezi.—2 Tim. 3:17.