Kọ Whọ Gwọlọ Riẹ Kpahe Ebaibol na Viere?

Fikieme Who je Se Ebaibol Na?

EBIABOL na o wo ohẹriẹ no ebe efa kpobi—o wo ithubro iyoyou nọ i n’obọ Ọghẹnẹ ze. (1 Ahwo Tẹsalonika 2:13) Who te fi eware nọ Ebaibol na o wuhrẹ h’iruo, who ti wo erere gaga. Who ti ru uyoyou ra kẹ Ọghẹnẹ rro viere yọ who ti si kẹle iẹe, Ọnọ Ọ rẹ Kẹ ‘okẹ uwoma avọ okẹ nọ o gba kiete kpobi na.’ (Jemis 1:17) Whọ te riẹ epanọ whọ rẹ rọ nya bru ei evaọ olẹ. Evaọ etoke ukpokpoma, whọ rẹ sae ruẹ obufihọ Ọghẹnẹ. Whọ tẹ be rria uzuazọ rọwo kugbe itee nọ a fihọ Ebaibol na, Ọghẹnẹ ọ te k’owhẹ uzuazọ ebẹdẹ bẹdẹ.—Ahwo Rom 6:23.

Izẹme nọ i re rovie ohwo aro e rrọ Ebaibol na. Enọ i wo eriariẹ Ebaibol na a re wo ufuoma no iroro ethọthọ nọ e be kpọ izuazọ ima ahwo buobu nẹnẹ na. Wọhọ oriruo, ẹriẹ uzẹme na kpahe oware nọ o rẹ via k’omai okenọ ma te whu o rẹ k’omai ufuoma no ozodhẹ inọ iwhuowhu na e sae nwa omai oma hayo inọ imoni hayo egbẹnyusu mai nọ i whu no e be ruẹ uye. (Izikiẹl 18:4) Ewuhrẹ Ebaibol ọrọ ẹkparomatha na ọ rẹ kẹ enọ iyoyou rai i whu seba omosasọ. (Jọn 11:25) Ẹriẹ uzẹme na kpahe enjẹle imuemu u re si omai ozọ kpahe enwoma uruemu-imizi je fiobọhọ k’omai wo otoriẹ oware nọ ukpokpoma u je bu otọakpọ na tere nẹnẹ.

Ehri-izi Ọghẹnẹ nọ e rọ Ebaibol na i re dhesẹ oghẹrẹ nọ ma re yere uzuazọ nọ o jẹ wha irere ugboma ze k’omai. Wọhọ oriruo, ẹjọ ‘owowa evaọ uruemu’ u re fiba omokpokpọ mai. (1 Timoti 3:2) Ma te ‘ru oma mai fo no eware nọ i re zue oma gbe ẹzi,’ ma rẹ whaha eyao buobu. (2 Ahwo Kọrint 7:1) Efihiruo ohrẹ Ọghẹnẹ nọ o rọ Ebaibol na o rẹ kẹ evawere evaọ orọo gbe adhẹẹ omobọ ohwo.—1 Ahwo Kọrint 6:18.

Who te fi Ẹme Ọghẹnẹ h’iruo, whọ rẹ jọ ohwo nọ ọ rẹ wereva viere. Eriariẹ Ebaibol i re fiobọhọ k’omai duku udhedhẹ iroro gbe edẹro jẹ k’omai ẹruore. U re fiobọhọ k’omai wo ekwakwa nọ i siuru wọhọ ohrọoriọ, uyoyou, oghọghọ, udhedhẹ, ẹwo, gbe ẹrọwọ. (Ahwo Galesha 5:22, 23; Ahwo Ẹfẹsọs 4:24, 32) Ekwakwa itieye na i re fiobọhọ ru omai jọ obọdẹ ọzae hayo aye uwou-orọo, ọsẹ hayo oni, gbe ọmọ.

Kọ whọ sai roro kpahe obaro na no ẹdẹjọ? Eruẹaruẹ Ebaibol i dhesẹ oria nọ ma yeri uzuazọ te no k’omai. Orọnikọ eruẹaruẹ nana i dhesẹ uyero akpọ inẹnẹ ọvo ho rekọ i dhesẹ re nnọ Ọghẹnẹ o ti nwene otọakpọ nana zihe ruọ aparadase kẹle.—Eviavia 21:3, 4.

Obufihọ Evaọ Ewo Otoriẹ Ebaibol Na

Ẹsejọhọ whọ daoma no re who se Ebaibol na rekọ whọ ruẹ nọ o rẹ bẹbẹ re who wo otoriẹ riẹ. Ẹsejọhọ whọ riẹ oria nọ who re rovie kpohọ evaọ Ebaibol na re who duku iyo enọ ra ha. Otẹrọ ere, whẹ ọvo o be via kẹ hẹ. Mai kpobi ma gwọlọ obufihọ re ma wo otoriẹ Ẹme Ọghẹnẹ. Isẹri Jihova, evaọ ekwotọ 235, a be rehọ ithubro Ebaibol kẹ ima ahwo ọvọvẹ. Eva e te were ae re a fiobọhọ k’owhẹ re.

O rẹ mai woma re a wuhrẹ Ebaibol na othotha, muhọ avọ igogo iwuhrẹ na. (Ahwo Hibru 6:1) Nọ who bi wuhrẹ haro na, o te lọhọ k’owhẹ viere re whọ re “emu ọgaga”—koyehọ, izẹme nọ i diwi viere. (Ahwo Hibru 5:14) Oware nọ Ebaibol na ọ ta a rẹ rehọ. Ebe nọ a kere no Ebaibol ze, wọhọ ibroshọ na Eme Ọghẹnẹ Ọ Gwọlọ Mi Omai?, i ti fiobọhọ k’owhẹ wo otoriẹ eria Ikereakere kpahe izoeme buobu sa-sa.

Kọ O Ruọ Owhẹ re Whọ Raha Oke k’Oka k’Oka ro Wo Otoriẹ Ebaibol Na?

A sae ruẹrẹ uwuhrẹ Ebaibol họ eva oke gbe oria nọ u kiehọ owhẹ oma. Ibuobu e rẹ jọ evaọ uwou rai wuhrẹ. Ejọ e rẹ tubẹ jọ ifonu ru uwuhrẹ dede. Orọnikọ a re koko ahwo buobu họ wuhrẹ ẹsiẹvo ho, rekọ a rẹ ruẹrẹ uwuhrẹ na họ kiehọ uyero ra, jegbe epanọ who wo eriariẹ jẹ riobe te. A re kere ẹdawọ họ, yọ a re ru oma vo owhẹ hẹ. A te kẹ iyo enọ Ebaibol ra, yọ who ti wuhrẹ epanọ who re ro si kẹle Ọghẹnẹ.

Who re du hwosa fihọ uwuhrẹ Ebaibol utioye na ha. (Matiu 10:8) Ọvọvẹ o rrọ kẹ ahwo egagọ kpobi gbe enọ e rọ uvumọ egagọ họ rekiyọ a wo isiuru re a ru eriariẹ rai kpahe Ẹme Ọghẹnẹ rro viere.

Ono ọ rẹ sai kuomagbe uwuhrẹ na? Uviuwou ra kpobi. Egbẹnyusu kpobi nọ whọ gwọlọ zizie kugbe oma a sae jariẹ. Hayo u te j’owhẹ, a sai ru uwuhrẹ na kugbe owhẹ ọvo.

Ibuobu e rẹ raha auwa ọvo k’oka k’oka ro wuhrẹ Ebaibol na. Otẹrọnọ whọ rẹ sae raha oke viere hayo whọ rẹ sae raha tere he k’oka k’oka, Isẹri na e sae nyaze ti fiobọhọ k’owhẹ.

Uzizie re Who Wuhrẹ

Ma zizie owhẹ re whọ nọ mi Isẹri Jihova. Edhere jọ nọ whọ rẹ sai ro ru onana họ ẹkwoma ekere kpohọ oria adrẹse obotọ na jọ. Ma ti ru ọruẹrẹfihotọ re ohwo jọ o ru obe uwuhrẹ Ebaibol ọvọvẹ kugbe owhẹ.

Eme Ọghẹnẹ Ọ Gwọlọ Mi Omai?