Oghẹrẹ nọ A re Yeri Kugbe Ohwo nọ A Si no Ukoko

Oware nọ o rẹ da omai te omoni hayo ogbẹnyusu ọkpekpe mai nọ a si no ukoko fiki uzioraha nọ o si obọ no ho i bu hu. Oghẹrẹ nọ ma rehọ ọkpọvio nọ Ebaibol e kẹ kpahe ẹme nana u re dhesẹ epanọ ma you Ọghẹnẹ te gbe epanọ ma be roma kpotọ kẹ ọruẹrẹfihotọ riẹ te.a Joma t’ẹme kpahe enọ jọ nọ e roma via no kpahe ẹme nana.

Ẹvẹ ma re yeri kugbe ohwo nọ a si no ukoko? Ebaibol e ta nọ: “Wha sioma no ahwo nọ a se oma rai ahwo Kristi nọ i bi bruẹnwae, hayo e nọ [i re theuvo], hayo e nọ e be gọ edhọ, hayo enọ e be ta erue, egba-idieda hayo ijihẹ—wha lele ohwo otiọye na re-emu dede he.” (1 Ahwo Kọrint 5:11) Kpahe ohwo kpobi nọ ọ daji “uwuhrẹ Kristi na ha,” ma se nọ: “Wha rehọ iẹ fihọ uwou hu hayo [wha yere iei] gbe he; keme ọnọ o yere i rie yọ o bi lele ie gbẹ ghale iruo umuomu riẹ.” (2 Jọn 9-11) Ma re lele ahwo nọ a si no ukoko t’ẹme kpahe eware abọ-ẹzi hi, yọ ma re lele ai re jẹ da gbe he. Uwou-Eroro Na ọrọ September 15, 1981, (ọrọ Oyibo) ẹwẹ-obe avọ 25, o ta nọ: “Re a nọ ohwo ọvo inọ ‘Ẹvẹ o rrọ?’ o sae jọ owojẹ ọsosuọ nọ u re su kpohọ ẹmeọta-kugbe hayo tubọ usu. Kọ ma gwọlọ j’owọ ọsosuọ yena kugbe ohwo nọ a si no ukoko?”

Kọ o ginẹ gwọlọ nọ ma si oma no ohwo na riẹriẹriẹ? Ee, yọ eware buobu e soriẹ ze. Orọ ọsosuọ, u re dhesẹ nọ ma bi yoẹme kẹ Ọghẹnẹ je bi ru lele oware nọ Ebaibol e ta. Orọnikọ u te kiehọ omai oma ọvo ma re ro yoẹme kẹ Ọghẹnẹ hẹ rekọ nọ o tẹ make rrọ bẹbẹ re ma ru ere. Uyoyou kẹ Ọghẹnẹ o rẹ wọ omai koko ijaje riẹ kpobi, kareghẹhọ nọ o kiete jẹ vọ avọ uyoyou gbe nnọ izi riẹ e rẹ wha ewoma se omai. (Aizaya 48:17; 1 Jọn 5:3) Orọ avivẹ, omasino orumuomu nọ o kurẹriẹ hẹ o rẹ thọ omai gbe ukoko na soso no ogbekuo abọ-ẹzi gbe ọrọ uruemu, ma vẹ jẹ rọ ere thọ emamọ odẹ ukoko na. (1 Ahwo Kọrint 5:6, 7) Orọ avesa, ma te gine si oma no ọnọ a si no ukoko na wọhọ epanọ Ebaibol e ta, o rẹ sae kẹe erere. Ma tẹ jẹ oziẹ nọ ogbẹgwae ẹdhoguo na u bru rehọ, ma rẹ sai duobọte udu orumuomu na nọ ọ jẹ obufihọ nọ ekpako na a jẹ kẹe anwẹdẹ rehọ họ na. Ọ tẹ ruẹ nọ enọ o you kpobi a fa usu noi no, ọ sai ti “bru omariẹ kpiroro,” ruẹ epanọ uzioraha riẹ na o gbẹdẹ te, ọ vẹ te j’owọ nọ o re ro zihe bru Jihova ze.—Luk 15:17.

Kọ ẹvẹ o rẹ jọ otẹrọnọ omoni mai a si no ukoko? Fikinọ imoni ma rrọ, o sae jọ bẹbẹ re ma ru lele oware nọ Ebaibol e ta. Ẹvẹ ma re yeri kugbe omoni mai nọ a si no ukoko? Ma rẹ sae jọ etenẹ fodẹ iyero kpobi nọ e rẹ sae via ha, rekọ j’oma dhunu te igogo iyero ivẹ jọ.

Ẹsejọ, o sae jọnọ omoni ra nọ a si no ukoko na wha gbẹ be rria uwou ovona. Nọ orọnọ imoni e rẹ fa ha fikinọ a si ohwo na no ukoko na, wha rẹ sai gbe yeri uzuazọ nọ wha je yeri kugbe anwẹdẹ ghele. Rekọ, ohwo na ọ rehọ uruemu riẹ raha usu abọ-ẹzi nọ o wo kugbe ahwo uviuwou riẹ no. Fikiere enọ e gwọlọ yoẹme kẹ Ọghẹnẹ a re lele ei t’ẹme kpahe eware abọ-ẹzi hi. Wọhọ oriruo, otẹrọnọ ọnọ a si no ukoko na ọ riẹ evaọ okenọ uviuwou na o keria bi wuhrẹ Ebaibol kugbe, ọ rẹ kpahe ẹme he. Rekọ otẹrọnọ ọnọ a si no ukoko na ọ gbẹ rrọ ọmaha, ọsẹgboni riẹ a rẹ gbẹ sae kpọe họ jẹ whọku ei. Fikiere, esẹgbini nọ e rrọ yoyou a rẹ sai wuhrẹ Ebaibol kugbe ọmọ na.b—Itẹ 6:20-22; 29:17.

Evaọ uyero ofa, o sae jọnọ omoni ra nọ a si no ukoko na ọ be rria gb’owhai hi. Dede nọ wha rẹ sai kuomagbe ẹsejọ ghele fiki eme nọ i kpomahọ uviuwou rai, wha rẹ daoma re omakugbe utioye na o siọ ẹsikpobi ba ẹjọ. Ileleikristi nọ i wo omaurokpotọ a rẹ gwọlọ unoma nọ a re ro kuomagbe omoni rai nọ a si no ukoko ho, ọnọ ọ be rria uwou ovona kugbe ai hi. Ukpoye, omaurokpotọ kẹ Jihova gbe ukoko riẹ u re ru ai nya lele ọruẹrẹfihotọ Ikereakere na kpahe ohwo nọ a si no ukoko. Edikihẹ otiọye na o rọ rọkẹ ewoma ọnọ o ruthọ na, yọ o sai fi obọ họ kẹe wo erere no ọwhọkuo na ze.c—Ahwo Hibru 12:11.

[Oruvẹ-obotọ]