ENỌ AHWO NỌ A S’EBE

Kọ u fo re ọsẹgboni a keria kugbe ọmọ rai nọ a sino ukoko evaọ etoke iwuhrẹ ukoko?

U du gwọlọ nọ ma ruawa kpahe oria nọ ohwo nọ a sino ukoko ọ rẹ keria ha evaọ obọ Ọgwa Uvie nọ a te kpohọ iwuhrẹ. A jọ emagazini Uwou Eroro na sa-sa tuduhọ esẹgbini awọ unuẹse buobu no kpahe epanọ a sai ro fi obọ họ kẹ ọmọ rai nọ a gbẹ rrọ uwou nọ a sino ukoko ruẹrẹ usu riẹ họ kugbe Jihova. Wọhọ epanọ o rrọ Uwou Eroro ọ Oyibo ọrọ November 15, 1988, ẹwẹ-obe avọ 19 rite 20, esẹgbini a rẹ sai tube wuhrẹ Ebaibol na kugbe ọmọ rai nọ a sino ukoko nọ o gbe bi lele ae rria uwou. Nọ a te ru ere, ẹsejọhọ ọmọ na o ti nwene jẹ ruẹrẹ usu riẹ họ kugbe Ọghẹnẹ.

Nọ a tẹ rrọ obọ Ọgwa Uvie, o thọ họ re ọmọ nọ a sino ukoko ọ keria kugbe ọsẹgboni riẹ ababọ ẹme nọ ọ rẹ kpahe. Nọ ma wo uzi ovuovo nọ o ta nọ obemu ohwo nọ a sino ukoko ọ rẹ keria ha na, o thọ họ re ọmọ nọ a sino ukoko ọ keria kugbe ọsẹgboni riẹ evaọ oria kpobi nọ a keria evaọ Ọgwa Uvie na. Nọ ọsẹgboni na a be daoma re ọmọ na ọ ruẹrẹ usu riẹ họ kugbe Ọghẹnẹ na, a rẹ ruẹ nọ ọ gaviezọ re ọ sai wo erere no iwuhrẹ na ze. Ọmọ na ọ tẹ keria kugbe ọsẹgboni na o te mae fi obọ họ kẹe vi ẹsenọ ọyọvo ọ tẹ keria oria riẹ sa.

Kọ otẹrọnọ ọmọ nọ a sino ukoko na ọ gbẹ be rria kugbe ọsẹgboni riẹ hẹ? Kọ onana u dhesẹ nọ ọ rẹ sae keria kugbe ọsẹgboni na ha? A jọ emagazini Uwou-Eroro mai nọ i kpemu ta kpahe oghẹrẹ usu nọ Oleleikristi o re wo kugbe omoni riẹ nọ a gbẹ be rria uwou hu nọ a sino ukoko.a Ohwo nọ a sino ukoko nọ ọ rẹ fọ tou keria kugbe ahwo uviuwou riẹ evaọ etoke iwuhrẹ u wo ohẹriẹ no usu nọ a re keke aro fihọ lele ohwo otiọna nya evaọ oke ofa gheghe. Ahwo uviuwou ohwo nọ a sino ukoko a tẹ be daoma nya lele uzi Ebaibol nọ o ta nọ a re kuomagbe ohwo otiọye he, ẹjiroro ọvo ọ riẹ nọ a rẹ rọ fo ahwo uviuwou na ha?—1 Kọr. 5:11, 13; 2 Jọn 11.

U muẹme he nọ ohwo nọ a sino ukoko nọ o mu omariẹ họ ọghọ ọ tẹ keria kugbe ahwo uviuwou riẹ hayo oniọvo ọfa kpobi evaọ etoke iwuhrẹ. Ma tẹ ta nọ u wo oria jọ nọ oghẹrẹ ahwo jọ a rẹ keria evaọ etoke iwuhrẹ, o rẹ wha ebẹbẹ sa-sa ze. Nọ inievo na kpobi a tẹ be daoma nya lele uzi Ebaibol kpahe ohwo nọ a sino ukoko, nọ a gbe bi ru oware ovo kugbe ohwo nọ a sino ukoko nọ u re ru amọfa zoruẹ hẹ, oria nọ ohwo ọ keria evaọ ewuhrẹ o muẹme he.b