Dhesẹ Omarokpotọ Oleleikristi Evaọ Okenọ A te Si Omoni Ra No Ukoko

¹ Ọgbakugbe nọ ọ rrọ udevie ahwo uviuwou ọ rẹ sae jọ gaga. Onana o rẹ wha odawọ se Oleleikristi evaọ okenọ a te siọ ọrivẹ-orọo, ọmọ, ọsẹ-hayo-oni, hayo omoni ọkpekpe ọfa riẹ no ukoko hayo nọ ọye ọvo o te si oma no ukoko na. (Mat. 10:37) Ẹvẹ Ileleikristi omarokpotọ a re yeri kugbe ahwo otiọye na? Kọ otẹrọnọ ohwo na ọ be rria uwou ovo na kugbe omai, u wo oghẹrẹ-sa nọ a re yeri kugbe ei? Orọ ọsosuọ, j’oma kiẹ oware nọ Ebaibol na ọ ta kpahe uzoẹme nana, ehri-izi nọ i kie kpahe ahwo nọ a sino ukoko gbe ahwo nọ aye ọvo a si oma no ukoko.

² Epanọ A Re Yeri-Kugbe Ahwo nọ A Sino Ukoko: Ẹme Ọghẹnẹ o jie uzi kẹ Ileleikristi nọ a lele ohwo nọ a sino ukoko no nya usu hu: “Wha sioma no ahwo nọ a se oma rai ahwo Kristi nọ i bi bruẹnwae, hayo e nọ e be gbọ oke, hayo e nọ e be gọ edhọ, hayo enọ e be ta erue, egba-idieda hayo ijihẹ—wha lele ohwo otiọye na re-emu dede he. . . . Wha le ohwo omuomu na no udevie rai.” (Ẹjẹlẹ ibieme na ọmai, 1 Kọr. 5:11, 13) Eme ọ Jesu nọ a kere fihọ Matiu 18:17 na i kie kpahe ẹme na re: “Jọ [ọnọ a sino ukoko na] ọ jọ wọhọ ọgẹdhọ hayo omiazọhọ, eva obọ ra.” Ahwo nọ a jẹ gaviezọ kẹ Jesu a riẹ ziezi inọ ahwo Ju oke oyena a wo omakugbe ọvuọvo kugbe egedhọ họ yọ a jẹ kẹnoma kẹ imiazọhọ wọhọ ahwo nọ a mu imuẹwho. Fikiere Jesu ọ jẹ hrẹ ilele riẹ nnọ a lele ahwo nọ a sino ukoko nya usu hu.—Rri Uwou-Eroro Na ọrọ September 15, 1981 (ọrọ Oyibo), ẹwẹ-obe avọ 18-20.

³ Onana u dhesẹ nnọ Ileleikristi omurokpotọ a re wo usu abọ-ẹzi kugbe ohwo nọ a sino ukoko ho. Rekọ o jọ etẹe kuhọ họ. Ẹme Ọghẹnẹ ọ ta nnọ ma “lele ohwo otiọye na re-emu dede he.” (1 Kọr. 5:11) Fikiere, ma rẹ whaha usu omakugbe nọ a re wo kugbe ohwo nọ a sino ukoko. Onana o kẹre te ẹwhaha oma nọ a re kugbe ei kpohọ erẹ-eriosehọ, ehaa, aroza, hayo usu eware e nyae dẹ hayo kpohọ obọ uwou-aroza hayo keria kugbe ei re emu makọ evaọ obọ uwou hayo evaọ ehọtẹle.

⁴ Kọ ẹvẹ kpahe ẹme nọ a re lele ohwo nọ a sino ukoko ta? Dede nọ Ebaibol na ọ nwane ta kpahe uyero kpobi hi, 2 Jọn 10 u fi obọ họ k’omai riẹ eriwo Jihova kpahe ẹme na: “Re ohwo jọ [o] te bru owhai ze, ọ gbẹ wha uwuhrẹ nana ze he, wha rehọ iẹ fihọ uwou hu hayo uyere o kẹ gbe he.” Nọ o jẹ kpahe fihọ ẹme ọnana, Uwou-Eroro Na ọrọ September 15, 1981 (ọrọ Oyibo), ẹwẹ-obe avọ 25, o ta nnọ: “ ‘Do’ gheghe nọ a ta kẹ ohwo o rẹ sae jọ owojẹ ọsosuọ nọ u re su kpohọ ẹmeọta-kugbe gbe ẹsejọhọ usu dede. Kọ ma rẹ gwọlọ jẹ owọ ọsosuọ yena kugbe ohwo nọ a sino ukoko?”

⁵ Uzẹme, o nwane wọhọ epanọ ẹwẹ-obe avọ 31 ọrọ uvitha ọ Uwou-Eroro ovona o ta riẹ: “Uzẹme na họ okenọ Oleleikristi ọ tẹ roma riẹ kẹ umuomu a je si ei no ukoko, eware buobu i re vru mi ei: edikihẹ ọjẹrehọ riẹ kugbe Ọghẹnẹ; uvẹ ẹjọ omọvo ukoko evawere orọ Ileleikristi na; usu omawere kugbe inievo na, kugbe emamọ usu nọ o wo kugbe imoni riẹ nọ e rrọ Ileleikristi.”

⁶ Nọ A Tẹ Bẹ Rria Uviuwou Ovo: Kọ onana u dhesẹ nnọ Ileleikristi nọ e be rria uwou ovo kugbe ohwo uviuwou rai nọ a sino ukoko a rẹ whaha ẹme nọ a rẹ ta kugbe ei, emu nọ a re lele ei re, gbe oma nọ a re kugbe ohwo na evaọ okenọ a te bi ru iruẹru ikẹdẹ kẹdẹ rai? Uwou-Eroro Na ọrọ April 15, 1991 (ọrọ Oyibo), evaọ oruvẹ obotọ nọ o rrọ ẹwẹ-obe avọ 22, o ta nnọ: “Otẹrọnọ omoni jọ nọ a sino ukoko ọ rrọ uviuwou Oleleikristi, ohwo yena ọ rẹ gbẹ jọ abọjọ ọrọ iruẹru ekẹdẹ kẹdẹ uviuwou na.” Fikiere, ahwo uviuwou na ọvo a rẹ jiroro ọ umuo nọ a re ku ohwo uviuwou na nọ a sino ukoko na gboma te evaọ okenọ a tẹ be re emu hayo okenọ a te bi ru iruẹru ekẹdẹ kẹdẹ efa. Ghele na, a re ru re amọfa a wo iroro nnọ eware kpobi e rrọ epọvo na wọhọ epanọ e jọ taure a te ti si ei no ukoko ho.

⁷ Dede na, Uwou-Eroro Na ọrọ September 15, 1981 (ọrọ Oyibo), ẹwẹ-obe avọ 28, o ta kpahe ohwo nọ a sino ukoko hayo ọnọ o si oma no ukoko na inọ: “Usu abọ-ẹzi nọ o jariẹ vẹre u bru dhe no riẹriẹriẹ. Onana o rrọ ere kpahe omoni riẹ dede, te ahwo nọ a gbẹ rrọ ahwo uviuwou ovo na. . . . Oyena u dhesẹ inwene evaọ usu abọ-ẹzi nọ o jọ uviuwou na vẹre. Wọhọ oriruo, otẹrọnọ a si ọzae na no ukoko, u re gbe kiehọ aye gbe emọ riẹ oma re o ru ewuhrẹ Ebaibol uviuwou kẹ ae he hayo re ọ k’obaro evaọ isase Ebaibol gbe olẹ. Otẹrọnọ ọ gwọlọ lẹ, wọhọ evaọ oke emu, o wo udu nọ o re ro ru ere evaọ uwou riẹ. Rekọ otu nọ o kiọkọ a rẹ sae lẹ h’eva se Ọghẹnẹ kẹ omobọ rai. (Itẹ 28:9; Ol. 119:145, 146) Kọ ẹvẹ otẹrọnọ ohwo nọ a sino ukoko evaọ uviuwou na ọ gwọlọ jariẹ evaọ okenọ uviuwou na u te bi se Ebaibol kugbe hayo a te bi ru uwuhrẹ Ebaibol? Ahwo nọ a kiọkọ na a rẹ sae kẹe uvẹ re ọ jariẹ re ọ gaviezọ otẹrọnọ ọ te gwọlọ wuhrẹ ai hayo ghale ẹjiroro egagọ riẹ kẹ ae he.”

⁸ Otẹrọnọ a si ọmọ nọ ọ be rria uwou na no ukoko, eyewọ Ileleikristi a re gbe wo owha-iruo ewuhrẹ riẹ. Uwou-Eroro Na ọrọ November 15, 1988 (ọrọ Oyibo), ẹwẹ-obe avọ 20, o ta nnọ: “Wọhọ epanọ a rẹ gbẹ kẹe emu, iwu, gbe oria nọ ọ rẹ jọ na, ere o gwọlọ nọ a re wuhrẹ iẹe jẹ kẹe ọkpọvio rọwokugbe Ẹme Ọghẹnẹ. (Itẹ 6:20-22; 29:17) Eyewọ iyoyou e rẹ sai ru ọruẹrẹfihotọ re a wo obe-uwuhrẹ Ebaibol kugbe ei, nọ a tẹ maki si ei no ukoko. Ẹsejọhọ o ti wo erere ọkpọvio nọ ọ mai woma no ewuhrẹ nọ a re ru kugbe ọye ọvo ze. Hayo a sae jiroro nnọ o re gbe w’obọ evaọ ọruẹrẹfihotọ ewuhrẹ uviuwou na.”—Je rri Uwou-Eroro Na ọrọ October 1, 2001, ẹwẹ-obe avọ 27-28.

⁹ Imoni Nọ E Be Rria Uwou Ovo Ho: Uwou-Eroro Na ọrọ April 15, 1988 (ọrọ Oyibo), ẹwẹ-obe avọ 28 o ta nọ: “Uyero na u wo ohẹriẹ otẹrọnọ ọnọ a sino hayo ọnọ ọye ọvo o si oma no ukoko na yọ omoni nọ ọ be rria uviuwou hayo uwou ovona ha. O sae lọhọ re a siọ enwenọ usu kpobi ba ewo kugbe omoni na. O tẹ make rrọ nọ eme orua jọ e riẹ nọ e gwọlọ ẹgwae, a re ru onana ba umuo,” evaọ ẹnya lele uzi Ọghẹnẹ na re a ‘sioma no ahwo kpobi’ nọ a reabe ọ umuomu ababọ-ekurẹriẹ. (1 Kọr. 5:11) Ileleikristi omarokpotọ a rẹ daoma re a whaha usu nọ u fo ho nọ a re wo kugbe omoni otiọye na, tube bru usu ekiọthuọ kawo dede.—Je rri Uwou-Eroro Na ọrọ September 15, 1981 (ọrọ Oyibo), ẹwẹ-obe avọ 29-30.

¹⁰ Uwou-Eroro Na u duobọ te uyero ofa nọ o rẹ sae roma via: “Kọ ẹvẹ otẹrọnọ a si omoni ọkpekpe jọ no ukoko, wọhọ ọmọ hayo ọsẹ hayo oni yọ ọ be rria uwou na vẹre he, ọ tẹ gwọlọ kua zihe ziọ obọ uwou? Uviuwou na o rẹ sae jiroro oware nọ a re ru wọhọ epanọ uyero na o rrọ. Wọhọ oriruo, ọsẹ hayo oni nọ a sino ukoko ọ sai kie ẹyao hayo ọ gbẹ be sae rẹrote oma riẹ evaọ abọ ugho hayo abọ-iwo ho. Emọ riẹ nọ e rrọ Ileleikristi na a wo owha-iruo Ikereakere gbe orọ uruemu ezi nọ a re ro fi obọ họ kẹe. (1 Tim. 5:8) . . . Oware nọ a re ru o rẹ roma hwa eware wọhọ ugogo ẹgwọlọ ọsẹ hayo oni na, uruemu riẹ gbe ọdawẹ nọ ọnọ o w’uzou uviuwou na o wo kẹ ewoma abọ-ẹzi uviuwou na.”—Uwou-Eroro Na ọrọ September 15, 1981 (ọrọ Oyibo), ẹwẹ-obe avọ 28-29.

¹¹ Rọkẹ ọmọ, uzoẹme ovona o ta h’aro nnọ: “Ẹsejọ esẹ gbe ini Ileleikristi a rẹ rehọ ọmọ rai nọ a sino ukoko nọ ọ be mọ zihe ziọ uwou na. Rekọ evaọ oghẹrẹ nọ o rrọ kpobi, esẹ gbe ini a rẹ sae wawo uyero omomọvo. Kọ ọmọ nọ a sino ukoko na ọvo ọ be rria orọ obọriẹ no vẹre, kọ o rrọ bẹbẹ kẹe re ọ rria orọ obọriẹ enẹna? Hayo kọ ọ gwọlọ zihe kpo fikinọ ọ gwọlọ uzuazọ nọ o mai kiehoma? Kọ ẹvẹ kpahe uruemu riẹ? Kọ ọ te whẹ ‘ogbekuo’ emuemu riẹ họ amọfa evaọ uwou na?—Gal. 5:9.”

¹² Irere ọ Omarokpotọ kẹ Jihova: Ẹmeoyo kẹ ọruẹrẹfihotọ Ikereakere na re a si orumuomu nọ o kurẹriẹ hẹ no ukoko jẹ kẹnoma kẹe o rẹ kẹ erere. O rẹ sẹro ẹfuọ ukoko na je dhesẹ omai via wọhọ enọ e be kpare itee ikpehru ẹfuọ Ebaibol na kpehru. (1 Pita 1:14-16) O rẹ sẹro mai no okpomahọ ogbekuo. (Gal. 5:7-9) O rẹ jẹ kẹ orumuomu na uvẹ nọ o re ro wo erere vọvọ no ọwhọkuo nọ a kẹ riẹ na ze, onọ o rẹ sai fi obọ họ kẹe mọ “ubi udhedhẹ, [orọ] ẹrẹreokie.”—Hib. 12:11.

¹³ Nọ a yo ẹme jọ nọ a ta evaọ okokohọ okogho no, oniọvo-ọmọzae jọ avọ ejime riẹ (ọrọ ọmọtẹ) a vuhu mu nnọ o gwọlọ re a ru inwene evaọ edhere nọ a bi yeri kugbe oni rai, ọnọ ọ be rria oria ofa, ọnọ a sino ukoko te ikpe ezeza no. Nọ okokohọ na ọ nwane fa no, oniọvo-ọmọzae na o te se oni riẹ, nọ ọ kẹ oni na imuẹro inọ a wo uyoyou kẹe no, o te ru ei vẹ inọ a ti gbe lele ei t’ẹme he ajokpanọ ẹme uviuwou jọ nọ o w’uzou gaga ọ riẹ nọ ọ gwọlọ nnọ a rẹ jọ keria. U lehie he, oni riẹ o te muọ ewuhrẹ họ ẹnya, uwhremu na a tẹ wariẹ rehọ iẹe ziọ ukoko. Ofariẹ, ọzae riẹ nọ ọ rrọ ukoko ho o te muọ obe họ ewuhrẹ, uwhremu riẹ ọ tẹ họ-ame.

¹⁴ Omarokpotọ nọ a rẹ rọ yọrọ ọruẹrẹfihotọ esino ukoko nọ a dhesẹ fihọ Ikereakere na o re dhesẹ uyoyou mai kẹ Jihova jẹ k’omai uyo nọ ma rẹ kpahe kẹ ọnọ ọ be poviẹ Ẹe na. (Itẹ 27:11) Onana o rẹ k’omai imuẹro eghale Jihova. Devidi Ovie na o kere kpahe Jihova nnọ: “Me ti vru no ujaje riẹ hẹ. Whọ rẹ rehọ oma kpotọ kẹ enọ e rehọ oma kpotọ.”—2 Sam. 22:23, 26.

[Study Questions]

1. Didi iyero e rẹ sae dawo omarokpotọ Oleleikristi mai?

2. Wọhọ epanọ Ebaibol na ọ ta, ẹvẹ Ileleikristi a re yeri kugbe ahwo nọ a sino ukoko?

3, 4. Didi usu kugbe ahwo nọ a sino ukoko hayo enọ i si oma no ukoko na a ghọ?

5. Okenọ a te si ohwo no ukoko, eme o re vru mi ei?

6. Kọ o gwọlọ re Oleleikristi o bru usu kpobi no omoni riẹ nọ a sino ukoko nọ a gbẹ be rria uviuwou ovo kugbe? Ru ẹme na vẹ.

7. Ẹvẹ usu abọ-ẹzi evaọ uviuwou na u re ro nwene evaọ okenọ a te si omọvo uviuwou na jọ no ukoko?

8. Didi owha-iruo eyewọ Ileleikristi i wo kpahe ọmaha rai nọ a sino ukoko nọ ọ be rria uwou na?

9. Umuo vẹ Oleleikristi o re wo usu te kugbe omoni riẹ nọ a sino ukoko ọnọ ọ be rria uwou ovo na kugbe ei hi?

10, 11. Eme Oleleikristi o re roro kpahe taure ọ tẹ te kuvẹ kẹ omoni riẹ nọ a sino ukoko re ọ kua ziọ uwou riẹ?

12. Irere jọ vẹ e rrọ ọruẹrẹfihotọ esino ukoko na?

13. Didi enwene uviuwou jọ u ru, kọ eme o no rie ze?

14. Fikieme ma jẹ romakpotọ tha ọruẹrẹfihotọ esino-ukoko na uke?