Okevẹ U ro Fo nọ Aye Ọ Fare Uzou, kọ Fikieme?

Okevẹ o rọ gba aye nọ ọ rrọ Oleleikristi họ nọ ọ rẹ fare uzou riẹ, kọ fikieme? Joma rri eme nọ Pọl ukọ na ọ ta kpahe ẹme nana. Ọ kẹ ọkpọvio nọ i re fi obọ họ kẹ omai jẹ emamọ iroro nọ e rẹ wha orro se Ọghẹnẹ. Evaọ 1 Ahwo Kọrint 11:3-16, Pọl ọ fodẹ eware esa nọ ma re roro kpahe: (1) oware nọ aye o bi ru nọ o gwọlọ nọ ọ jọ fare uzou, (2) oria nọ o jọ gwọlọ nọ ọ fare uzou, gbe (3) ẹjiroro nọ ọ rẹ rọ fare uzou.

Oware nọ o bi ru. Pọl ọ fodẹ eware ivẹ: olẹ gbe aroọruẹ. (Owọ avọ 4 gbe 5) Olẹ yọ edhere nọ ma rẹ rọ t’ẹme se Jihova. Nẹnẹ, aroọruẹ o kie kpahe uwuhrẹ Ebaibol kpobi nọ ọgbodibo Ọghẹnẹ o bi ru. Kọ Pọl ọ be ta inọ aye ọ rẹ fare uzou riẹ oke kpobi nọ ọ tẹ be lẹ hayo wuhrẹ amọfa Ebaibol? Ijo. Oria nọ aye ọ be jọ lẹ hayo wuhrẹ amọfa u re dhesẹ sọ ọ rẹ fare uzou.

Oria na. Pọl ọ fodẹ eria ivẹ—evaọ uviuwou gbe ukoko na. Ọ ta nọ: “Ọzae ọye o wo uzou aye . . . Kaye kaye nọ ọ be lẹ hayo aroọruẹ nọ o ku uzou fihọ yọ o si adhẹ no oma riẹ.” (Owọ avọ 3 gbe 5) Evaọ uviuwou na, ọzae Jihova o ro mu ọnọ o wuzou. Aye o gbe wo adhẹẹ kẹ udu-esuo ọzae riẹ hẹ, o ti ru oma vo ọzae riẹ nọ o te bi ru eware nọ Jihova o muhọ ọzae na obọ. Wọhọ oriruo, o tẹ via nọ o bi ru obe-uwuhrẹ Ebaibol kugbe omọfa evaọ iraro ọzae riẹ, ọ rẹ fare uzou riẹ ro dhesẹ nọ o vuhumu nọ ọzae riẹ o wuzou. O re ru ere o tẹ make rọnọ ọzae na ọ họ-ame no hayo ọ re họ-ame he, keme ọye o wuzou uviuwou na.a Otẹrọnọ ọ rẹ lẹ hayo wuhrẹ amọfa Ebaibol evaọ iraro ọmọzae riẹ nọ ọ họ-ame no nọ ọ gbẹ rrọ ọmaha, ọ rẹ fare uzou riẹ, orọnikọ fikinọ ọmọ na o wuzou uviuwou na ha, rekọ fiki udu nọ a rọ kẹ ọzae nọ ọ họ-ame no evaọ ukoko Ileleikristi na.

Pọl ọ fodẹ ukoko na, ta nọ: “Otẹrọnọ wha vro onana, mẹ be ta kẹ owhai nọ uruemu ofa o rọ kẹ omai gbe [ikoko] Ọghẹnẹ vi onana ha.” (Owọ avọ 16) Evaọ ukoko Ileleikristi na, ezae hayo emezae nọ e họ-ame no a re wuzou. (1 Timoti 2:11-14; Ahwo Hibru 13:17) Ezae ọvo a re ro mu ekpako hayo idibo iruiruo re a ruẹse rẹrote uthuru Ọghẹnẹ. (Iruẹru Ikọ Na 20:28) Ẹsejọ, o sae gwọlọ nọ aye nọ ọ rrọ Oleleikristi o ru oware no u fo nọ ọzae nọ ọ họ-ame no ọvo o re ru. Wọhọ oriruo, ọ sae rẹrote omakugbe kẹ usiuwoma ota fikinọ oniọvo-ọmọzae nọ ọ họ-ame no nọ o te ọ riẹ hẹ. Hayo, o sae jọnọ o bi wuhrẹ obe kugbe ohwo nọ a gbẹ ta mu no vẹre evaọ iraro oniọvo-ọmọzae nọ ọ họ-ame no. O te bi ru eware itieye na, ọ rẹ fare uzou riẹ ro dhesẹ nọ oware nọ u fo nọ ezae ọvo a re ru o bi ru na.

Evaọ abọdekọ riẹ, eware jọ buobu e riẹ nọ oniọvo-ọmọtẹ ọ rẹ jọ ukoko na ru nọ o jọ gwọlọ nọ ọ fare uzou hu. Wọhọ oriruo, o re du fare uzou hu nọ ọ tẹ be kpahe ẹme evaọ iwuhrẹ ukoko, nọ ọ tẹ rrọ usiuwoma ota n’uwou ruọ uwou kugbe ọzae riẹ hayo kugbe oniọvo-ọmọzae ọfa nọ ọ họ-ame no, hayo nọ o te bi wuhrẹ obe kugbe hayo lẹ kugbe emọ riẹ nọ e re họ-ame he. Iyero efa e rẹ sae roma via, yọ otẹrọnọ oniọvo-ọmọtẹ ọ gbẹ riẹ onọ o re ru hu, ọ rẹ sai ru ekiakiẹ efa.b U gbe mu ei ẹro ghele he, yọ otẹrọnọ obroziẹ-iroro riẹ o be ta kẹe nọ ọ fare uzou, ọ sai ru ere.

Ẹjiroro na. Evaọ owọ avọ 10 (NW), ma ruẹ ẹjiroro ivẹ nọ aye nọ ọ rrọ Oleleikristi ọ rẹ rọ fare uzou: “U fo re aye ọ fare uzou riẹ ro dhesẹ adhẹẹ nọ o wo kẹ udu-esuo fiki ikọ-odhiwu.” Orọ ọsosuọ, muẹrohọ ẹme na, “adhẹẹ nọ o wo kẹ udu-esuo.” Uzou nọ aye ọ rẹ fare yọ edhere jọ nọ o re ro dhesẹ inọ ọ rọwo udu-esuo nọ Jihova ọ rọ kẹ ezae nọ e họ-ame no evaọ ukoko na. Fikiere, ọ rẹ rehọ enẹ dhesẹ nọ o you Jihova Ọghẹnẹ gbe nnọ ọ be roma kpotọ kẹe. Ẹjiroro avivẹ họ “fiki ikọ-odhiwu.” Erere vẹ ikọ-odhiwu a re wo nọ a bi muẹrohọ eyae nọ e be fare uzou rai?

O rrọ isiuru kẹ ikọ-odhiwu re a ruẹ nọ a be rehọ adhẹẹ kẹ udu-esuo nọ Jihova o fihọ evaọ ukoko riẹ soso, makọ obọ odhiwu hayo otọakpọ. Ikọ-odhiwu na a bi je wo erere nọ a bi muẹrohọ ahwo-akpọ nọ a gba ha nọ e be rehọ adhẹẹ kẹ udu-esuo. O rrọ ere keme, o gwọlọ inọ ae omarai a rẹ roma kpotọ kẹ ọruẹrẹfihotọ Jihova, rekọ ikọ-odhiwu buobu a sai ru onana evaọ oke nọ u kpemu hu. (Jud 6) Ikọ-odhiwu na a sae ruẹ inọ aye nọ ọ rrọ Oleleikristi o wo otoriẹ gbe eriariẹ vi ọzae nọ ọ họ-ame no evaọ ukoko na; ghele na, ọ be roma kpotọ kẹ udu-esuo ọzae na. O sae jọnọ aye na yọ Oleleikristi nọ a rehọ ẹzi ọfuafo wholo nọ o ti lele Kristi su ẹdẹjọ. Aye otiọye na o ti wo ọkwa nọ o tube kpehru vi ọrọ ikọ-odhiwu dede, o ti lele Kristi su evaọ obọ odhiwu. Onana yọ obọdẹ oriruo nọ ikọ-odhiwu a bi muẹrohọ enẹna! Evaọ uzẹme, o rrọ uvẹ-ọghọ ulogbo kẹ inievo-emetẹ mai kpobi re a rehọ uruemu omaurokpotọ rai dhesẹ ẹmeoyo nọ ikọ-odhiwu buobu gbidi gbidi a bi muẹrohọ.

[Oruvẹ-obotọ]