Ẹkpẹti Onọ

◼ Kọ u fo re oniọvo-ọmọtẹ ọ fare uzou nọ avọ oniọvo-ọmọzae a te dikihẹ unuẹthẹ bi wuhrẹ obe kugbe ohwo?

Nọ oniọvo-ọmọtẹ o te bi wuhrẹ obe kugbe ohwo nọ o re wuhrẹ anwẹdẹ yọ oniọvo-ọmọzae ọ rrọ kugbei, ọ rẹ fare uzou riẹ. (1 Kọr. 11:3-10) Uwou-Eroro ọ July 15, 2002, ẹwẹ-obe avọ 27 (ọrọ Oyibo), o ta nọ: “Onana yọ obe-uwuhrẹ Ebaibol nọ a be hai ru anwẹdẹ, yọ ọnọ o wo ọmọ-uwuhrẹ na họ ọnọ ọ rẹ kpọ uwuhrẹ na. Fikiere ma sae rọ onana dhesẹ ewuhrẹ nọ ma re ru evaọ obọ Ọgwa Uvie. Otẹrọnọ oniọvo-ọmọtẹ nọ ọ họ-ame no o bi ru uwuhrẹ na yọ oniọvo-ọmọzae nọ ọ họ-ame no ọ rrọ kugbei, u fo re ọ fare uzou.” Ọ rẹ fare uzou otẹrọnọ a bi ru uwuhrẹ na evaọ uwou, nọ a te dikihẹ unuẹthẹ, hayo evaọ eria efa.

Evaọ abọdekọ riẹ, otẹrọnọ a be hai dikihẹ unuẹthẹ ru uwuhrẹ Ebaibol nọ o re dọmu ziezi hi, u du gwọlọ nọ oniọvo-ọmọtẹ ọ rẹ fare uzou hu nọ oniọvo-ọmọzae ọ tẹ rrọ etẹe. O tẹ make rọnọ ẹjiroro ozihebro na họ re o mu obe-uwuhrẹ Ebaibol họ kugbe ohwo na hayo re ọ rehọ obe mai jọ nọ ma re ro wuhrẹ ahwo ro wuhrẹ kugbei, u du gwọlọ nọ ọ rẹ fare uzou hu. Taure a te ti mu obe-uwuhrẹ họ kugbe ohwo evaọ unuẹthẹ, yọ a zihe bru ohwo na unuẹse buobu no. Fikiere, u fo re iwhowho-uvie a vuhu onana mu jẹ riẹ oke nọ u fo nọ oniọvo-ọmọtẹ ọ rẹ rọ fare uzou.