Riẹ Ọkwa Kristi Evaọ Ọruẹrẹfihotọ Ọghẹnẹ

“EVAỌ emuhọ Ọghẹnẹ ọ ma idhiwu gbe otọakpọ na,” yọ oware kpobi nọ ọ ma u “woma gaga.” (Emu. 1:1, 31) Jihova ọ ma ahwo-akpọ re a rria emamọ uzuazọ vrẹ ọvo. Rekọ, ọkparesuọ nọ ọ romavia evaọ Idẹn na o bru evawere ohwo-akpọ dhe evaọ ubroke. Ghele na, ẹjiroro Jihova kẹ otọakpọ na gbe ohwo-akpọ u nwene he. Ọghẹnẹ o dhesẹ nọ o ti siwi emọ Adamu nọ i yoẹme kẹe. A ti zihe egagọ uzẹme ze, yọ Ọghẹnẹ ọ te raha omuomu na avọ iruo imuomu riẹ kpobi no. (Emu. 3:15) Eware e vẹ te wariẹ “woma gaga.” Jihova o ti ru onana ẹkwoma Ọmọ riẹ, Jesu Kristi. (1 Jọn 3:8) Fikiere, o roja re ma riẹ ọkwa Kristi evaọ ọruẹrẹfihotọ Ọghẹnẹ.—Iruẹru 4:12; Fil. 2:9, 11.

ỌKWA KRISTI

² Ma te roro kpahe ọkwa Kristi evaọ ọruẹrẹfihotọ Ọghẹnẹ, ma rẹ ruẹ nọ ọkwa riẹ o wo abọ sa-sa. Jesu họ Ọnọ ọ ta ahwo-akpọ no igbo, ọ rrọ Ozerẹ Okpehru, Ọnọ o wuzou ukoko Ileleikristi na, yọ obọnana ọ rrọ Ovie Uvie Ọghẹnẹ. Ma te roro didi kpahe iruo nana kpobi nọ o wo na u re ru ọruẹrẹfihotọ Ọghẹnẹ were omai oma gaga je ru uyoyou nọ ma wo kẹ Kristi Jesu jọ gaga ziezi. Ebaibol na ọ ta kpahe ejọ evaọ iruo sa-sa nọ o wo na.

³ Evaọ okenọ Jesu o je ru iruo odibọgba riẹ evaọ otọakpọ, u dhesẹ oma via vevẹ inọ ẹkwoma riẹ a te rọ ruẹrẹ ahwo-akpọ nọ a bi yoẹme họ kugbe Ọghẹnẹ. (Jọn 14:6) Jesu họ Ọnọ ọ ta ahwo-akpọ no igbo, o siobọno uzuazọ riẹ rọkẹ ẹtanigbo ọrọ ahwo buobu. (Mat. 20:28) Fikiere, orọnikọ oriruo emamọ uruemu ọvo Jesu ọ rrọ họ. Ọye họ ọnọ ọ karo evaọ erugba ẹjiroro Jihova kẹ ahwo-akpọ. Ẹkwoma riẹ ọvo ma sae rọ wariẹ wo aruoriwo Ọghẹnẹ. (Iruẹru 5:31; 2 Kọr. 5:18, 19) Uwhu Jesu nọ ọ rọ rehọ uzuazọ riẹ dhe idhe gbe ẹkparomatha riẹ i rovie edhere kẹ ahwo-akpọ nọ i bi yoẹme no re a wo eghale ebẹdẹ bẹdẹ evaọ otọ esuo Uvie Ọghẹnẹ.

⁴ Jesu yọ Ozerẹ Okpehru nọ “ọ rẹ sai roro kẹ omai . . . evaọ oria nọ ma jọ ga ha” jẹ lẹ kẹ erọvrẹ izieraha ilele riẹ nọ e roma mudhe no evaọ otọakpọ obonẹ. Pọl ukọ na o ru rie vẹ nọ: “Orọnikọ ozerẹ okpehru nọ ọ rẹ sai roro kẹ omai hi evaọ oria nọ ma jọ ga ha ma wo ho, rekọ ọnọ a dawo no evaọ kabọ kabọ wọhọ omai ma wo, rekọ nọ ọ kare uzioraha.” Pọl ọ tẹ tuduhọ ahwo kpobi nọ a fi ẹrọwọ họ Jesu Kristi awọ inọ a rehọ ọruẹrẹfihotọ nana nọ Ọghẹnẹ ọ be rọ ruẹrẹ ahwo họ kugbe omariẹ na ruiruo ziezi, ọ ta nọ: “Fikiere, joma nya kẹle agbara-uvie Ọghẹnẹ nọ o re dhesẹ uwowou ulogbo na jẹ lẹ sei ududu, re ọ ruẹsi dhesẹ ohrọ gbe uwowou ulogbo kẹ omai evaọ ẹruoke nọ ma tẹ gwọlọ obufihọ.”—Hib. 4:14-16; 1 Jọn 2:2.

⁵ Jesu ọ tẹ jẹ rrọ Ọnọ o wuzou ukoko Ileleikristi na. Wọhọ epanọ o jọ kẹ ilele riẹ evaọ ikpe-udhusoi ọsosuọ na, ere ọvona o rrọ nẹnẹ re, ma du gwọlọ ohwo-akpọ jọ nọ o re su omai hi. Jesu ọ be kpọ ukoko na ẹkwoma ẹzi ọfuafo gbe esẹro nọ i te nọ e rrọ otọ riẹ, enọ i ti gu epanọ a ru te kẹe avọ Ọsẹ obọ odhiwu riẹ kpahe oghẹrẹ nọ a rẹrote uthuru Ọghẹnẹ. (Hib. 13:17; 1 Pita 5:2, 3) Jihova ọ rehọ ọruẹaro riẹ jọ ta kpahe Jesu nọ: “Rri! Me ru rie họ osẹri kẹ erẹwho na, osu gbe oletu kẹ erẹwho na.” (Aiz. 55:4) Jesu o dhesẹ nọ eruẹaruẹ nana i rugba nọ ọ ta kẹ ilele riẹ nọ: “Jọ a se owhai isu gbe he, keme ọvuọvo họ Osu rai, Kristi na.”—Mat. 23:10.

⁶ Jesu o dhesẹ oghẹrẹ iroro nọ o wo gbe epanọ u no rie eva ze te re o fiobọhọ kẹ omai nọ o zizie ahwo nọ: “Wha nyabru omẹ ze, whai kpobi nọ e be ruẹ uye, nọ ewha egbẹgbẹdẹ e rrọ uzou, mẹ te sasa owhai oma. Wha rehọ owhowha mẹ je wuhrẹ mi omẹ, keme mẹ rrọ wowolẹ je wo omaurokpotọ, wha re ti wo omosasọ kẹ omarai. Keme owhowha mẹ o rẹ nyaoma ha, yọ owha mẹ o rrọ vovori.” (Mat. 11:28-30) Jesu Kristi ọ rehọ ẹkwoma ẹwolẹ nọ ọ be rọ kpọ iruẹru ukoko Ileleikristi na gbe oghẹrẹ nọ ọ be rọ wha omosasọ se omai dhesẹ via no inọ ọye họ “emamọ othuru-igodẹ na,” ọnọ ọ be rọ aro kele Ọsẹ obọ odhiwu riẹ, Jihova Ọghẹnẹ.—Jọn 10:11; Aiz. 40:11.

⁷ Evaọ ileta ọsosuọ riẹ se ahwo Kọrint, Pọl ọ rehọ eme nana dhesẹ abọ ọfa iruo Jesu Kristi, ọ ta nọ: “Ọ te jọ ovie nọ o ti su hrọ bẹsenọ Ọghẹnẹ o re fi ewegrẹ kpobi họ otọ awọ riẹ no. Rekọ nọ a te fi eware kpobi họ otọ riẹ no, Ọmọ na omariẹ o ti fi omariẹ họ otọ Ọnọ o fi eware kpobi họ otọ riẹ na, re Ọghẹnẹ ọ ruẹse jọ eware kpobi kẹ ohwo kpobi.” (1 Kọr. 15:25, 28) Taure Jesu ọ tẹ te ziọ otọakpọ, ọ jọ “ọnọ o wo onaa iruo ziezi” nọ Ọghẹnẹ o ro ru iruo, keme ọye họ ohwo ọsosuọ nọ Ọghẹnẹ ọ ma. (Itẹ 8:22-31) Okenọ Ọghẹnẹ o vi Jesu ziọ otọakpọ, o ru oreva Ọghẹnẹ oke kpobi. O thihakọ odawọ nọ o mae rro kpobi je ru oreva Ọsẹ riẹ te uwhu. (Jọn 4:34; 15:10) Fikinọ Ọmọ riẹ o kru ẹrọwọ riẹ makọ rite uwhu, Ọghẹnẹ ọ kpare riẹ no uwhu ze kpohọ odhiwu jẹ kẹe udu nọ ọ rẹ rọ jọ Ovie Uvie obọ odhiwu na. (Iruẹru 2:32-36) Fikiere, Ọghẹnẹ ọ kẹ Kristi Jesu obọdẹ iruo re ọ karo kẹ ogbotu ikọ-odhiwu re a si esuo ohwo-akpọ no otọakpọ na je voro emuemu kpobi no. (Itẹ 2:21, 22; 2 Tẹs. 1:6-9; Evia. 19:11-21; 20:1-3) Kẹsena Uvie Ọghẹnẹ nọ Kristi o bi su evaọ obọ odhiwu o vẹ te jọ esuo ọvuọvo nọ o bi su otọakpọ na soso.—Evia. 11:15.

OWARE NỌ U DHESẸ RE A RIẸ ỌKWA JESU

⁸ Jesu Kristi, Ọnọ ọ rrọ oriruo kẹ omai ọ rrọ gbagba. A mu omai họ iẹe obọ re ọ sẹro mai. Re ma sai wo erere no uvi ẹruorote riẹ ze, o gwọlọ nọ ma rẹ ruabọhọ ẹmeoyo kẹ Jihova jẹ nya lele ukoko riẹ nọ o be nyaharo na.

⁹ Ilele Jesu evaọ ikpe-udhusoi ọsosuọ a vuhu ọkwa Kristi evaọ ọruẹrẹfihotọ Ọghẹnẹ mu ziezi. A dhesẹ onana via ẹkwoma okugbe nọ a je ro ru iruo evaọ otọ ekpakpọ Kristi, jẹ romakpotọ nya lele ọkpọvio nọ ọ jẹ kẹ ẹkwoma ẹzi ọfuafo na. (Iruẹru 15:12-21) Pọl ukọ na ọ ta kpahe okugbe nọ ọ jọ ukoko Ileleikristi nọ a wholo na okenọ o kere nọ: “Joma ta uzẹme, re uyoyou u ru omai wo ẹnyaharo evaọ eware kpobi rọwokugbe ọnọ o wuzou na, Kristi. Ugboma na soso o jẹhọ ohwohwo no oma riẹ ze, a tẹ jẹ ruẹrẹ iẹe họ re u ruiruo kugbe ẹkwoma ezo-oma na kpobi nọ e rẹ tha ohwohwo uke. Nọ okwakwa kpobi evaọ oma na u te bi ruiruo ziezi, o rẹ lẹliẹ ugboma na rro nọ o be rọ uyoyou bọ omobọ riẹ ga na.”—Ẹf. 4:15, 16.

¹⁰ Nọ omomọvo evaọ ukoko na o te bi ru eware kugbe amọfa nọ a rrọ ukoko na, aikpobi a je bi ruiruo kugbe wọhọ epanọ Kristi ọ be kpọ omai, ẹvi gbe uvi uyoyou e rẹ jariẹ, onọ o rẹ wha “okugbe ọkpekpe” ze.—Jọn 10:16; Kọl. 3:14; 1 Kọr. 12:14-26.

¹¹ Eware nọ e rrọ akpọ via nọ i bi ru eruẹaruẹ Ebaibol gba i dhesẹ vevẹ inọ anwọ 1914 a rọ rehọ ogaga Uvie kẹ Jesu Kristi. Obọnana o bi su evaọ udevie ewegrẹ riẹ. (Ol. 2:1-12; 110:1, 2) Eme onana u dhesẹ kẹ ahwo nọ a be rria otọakpọ na enẹna? Kẹle na Jesu o ti dhesẹ nọ ọye họ Ovie ivie gbe Olori ilori okenọ ọ te raha ewegrẹ riẹ no. (Evia. 11:15; 12:10; 19:16) Kẹsena eyaa esiwo nọ Jihova ọ yaa okenọ ohwo-akpọ ọ rọ kpareso na i ve ti rugba kẹ enọ e rrọ obọze Kristi nọ i wo aruoriwo riẹ. (Mat. 25:34) Eva e were omai gaga nọ ma rọ riẹ ọkwa Kristi evaọ ọruẹrẹfihotọ Ọghẹnẹ. Joma gbẹ rọ okugbe ta usi uwoma na nya akpọ na duwu wọhọ epanọ Kristi ọ be kpọ omai evaọ edẹ urere nana!