Wo Erere No Omaurokpotọ kẹ Ọruẹrẹfihotọ Uzou-Uwo nọ Ọghẹnẹ O Ru Ze

RE MA sai gine koko oma họ ru oreva Jihova, o roja nọ ma rẹ romakpotọ kẹ Ọghẹnẹ, Osu Ehrugbakpọ na. Ma re vuhumu nọ Ọmọ riẹ o wuzou ukoko Ileleikristi na, yọ ma rẹ jẹ nya lele ọruẹrẹfihotọ uzou-uwo na evaọ abọ ọfa sa-sa. Oghẹrẹ omaurokpotọ utioye na o rẹ kẹ ahwo kpobi erere.

² Evaọ ọgbọ Idẹn a jọ kake ta kẹ ohwo-akpọ kpahe omaurokpotọ kẹ udu-esuo. Ma ruẹ onana evaọ ujaje Ọghẹnẹ nọ o rrọ Emuhọ 1:28 gbe 2:16, 17. Emama efa kpobi evaọ otọakpọ a rẹ jọ otọ ahwo-akpọ, Adamu avọ Ivi a vẹ romakpotọ kẹ udu-esuo Ọghẹnẹ je ru lele oreva riẹ. Ọruẹrẹfihotọ udu-esuo nana nọ Ọghẹnẹ o ru na nọ a re lele, o rẹ wha udhedhẹ ze jẹ lẹliẹ eware nya kpatiẹ. A wariẹ ta ẹme kpahe ọruẹrẹfihotọ uzou-uwo na evaọ 1 Ahwo Kọrint 11:3. Pọl ukọ na o kere nọ: “Mẹ gwọlọ nọ wha riẹ inọ ọnọ o wuzou ọzae kpobi họ Kristi; yọ ọnọ o wuzou aye họ ọzae; yọ ọnọ o wuzou Kristi họ Ọghẹnẹ.” Onana u dhesẹ nọ evaọ ọruẹrẹfihotọ nana, ohwo kpobi o wo ohwo nọ o wuzou riẹ, ajokpaọ Jihova.

³ Ahwo buobu nẹnẹ a bi lele ọruẹrẹfihotọ uzou-uwo na ha. Fikieme? Ẹbẹbẹ na o muhọ evaọ Idẹn okenọ ọsẹgboni ọsosuọ ahwo-akpọ a keke aro fihọ salọ nọ a re no otọ esuo okpehru Ọghẹnẹ. (Emu. 3:4, 5) Rekọ, a wo ufuoma nọ a je rẹro riẹ hẹ. Ukpoye, a tẹ ziọ otọ omama ẹzi omuomu jọ, Setan Ẹdhọ na. Ọkparesuọ ọsosuọ na o hẹriẹ ahwo-akpọ no Ọghẹnẹ. (Kọl. 1:21) Fikiere, ahwo-akpọ buobu nẹnẹ a gbẹ rrọ otọ ogaga omuomu na.​—1 Jọn 5:19.

⁴ Fiki uzẹme na nọ ma bi wuhrẹ no Ebaibol na ze jẹ be nya lele, ma no igbo Setan no. Mai Isẹri nọ e rehọ oma mudhe jẹ họ-ame no, ma rọwo nọ Jihova ọ rẹ kpọ uzuazọ mai. Ma rọwo ẹme nọ Devidi ovie na ọ ta inọ Jihova họ ọnọ o “wuzou eware kpobi.” (1 Irv. 29:11) Ma rẹ rehọ omaurokpotọ ta nọ: “Riẹ nọ Jihova họ Ọghẹnẹ. Ọye họ ọnọ ọ ma omai, yọ ọye o wo omai. Mai yọ ahwo riẹ gbe igodẹ nọ ọ be ko.” (Ol. 100:3) Ma vuhumu nọ Jihova ọ rrọ ruaro yọ o te ọnọ ma rẹ roma kpobi kpotọ kẹ, keme ọye ọ ma eware kpobi. (Evia. 4:11) Nọ ma rrọ egbodibo Ọghẹnẹ uzẹme na, ma bi lele Jesu Kristi, ọnọ o fi oriruo ọgbagba ọrọ omaurokpotọ kẹ Ọghẹnẹ hotọ.

⁵ Eme Jesu o wuhrẹ no eware nọ ọ jọ otọakpọ ruẹ uye rai ze? Obe Ahwo Hibru 5:8 o kuyo nọ: “Dede nọ ọmọzae riẹ ọ rrọ, o wuhrẹ ẹmeoyo no eware nọ ọ ruẹ uye rai ze.” Ẹhẹ, Jesu ọ ruabọhọ jẹ romakpotọ kẹ Ọsẹ obọ odhiwu riẹ makọ evaọ okenọ ọ jẹ ruẹ uye dede. Ofariẹ, Jesu ọ rehọ udu obọriẹ ru uvumọ oware he. Ọ ta orọ obọriẹ hẹ; hayo kọ ọ gwọlọ oruaro obọriẹ hẹ. (Jọn 5:19, 30; 6:38; 7:16-18) Evaọ etoke odibọgba riẹ, ọ jẹ rọ evawere ru oreva Ọsẹ riẹ, dede nọ ere oruo o wha ọwọsuọ gbe ukpokpoma sei. (Jọn 15:20) Jesu ọ romakpotọ kẹ Ọghẹnẹ. Ọ “romakpotọ” tube te epanọ o ro ‘whu evaọ ure-oja.’ Oma kpobi nọ o ro kpotọ kẹ Jihova o wha irere buobu ze, o wha esiwo ebẹdẹ bẹdẹ se ahwo-akpọ, o wha riẹ ze nọ a rọ kpare iẹe kpehru, o tẹ jẹ wha oruaro se Ọsẹ riẹ.​—Fil. 2:5-11; Hib. 5:9.

ABỌ SA-SA NỌ MA RẸ JỌ ROMAKPOTỌ KẸ ỌGHẸNẸ

⁶ Ma tẹ be romakpotọ kẹ Ọghẹnẹ, bi ru oreva riẹ, eware buobu nọ e be wha awaọruọ gbe idhọvẹ se enọ e rọwo romakpotọ kẹ esuo Jihova ha i re te omai hi. Ẹsikpobi ọwegrẹ mai, Ẹdhọ, ọ be gwọlọ nọ ọ rẹ re omai no. Omuomu na ọ te sai mu omai hi nọ ma te dikihẹ ga wọso ẹe je hrẹ omamai kpotọ fihọ otọ Jihova bi yoẹme kẹe.​—Mat. 6:10, 13; 1 Pita 5:6-9.

⁷ Ma vuhumu nọ Kristi họ ọnọ o wuzou ukoko Ileleikristi na, yọ ọ kẹ “ọrigbo nọ a re fievahọ nọ o wo areghẹ na” udu re ọ kpọ eware. Onana u re kpomahọ oghẹrẹ uruemu nọ ma re dhesẹ kẹ ohwohwo. Ma tẹ be romakpotọ kẹ Ọghẹnẹ evaọ ukoko na, u re ru omai ru lele oware kpobi nọ Ebaibol ọ ta nọ ma ru evaọ egagọ mai. Onana o kẹre te iruo usi uwoma ota mai, iwuhrẹ nọ ma rẹ nya gbe abọ nọ ma rẹ jarai wo, oghẹrẹ nọ ma re yerikugbe ekpako ukoko na, gbe eruẹrẹfihotọ ukoko na nọ ma rẹ nya lele.​—Mat. 24:45-47; 28:19, 20; Hib. 10:24, 25; 13:7, 17.

⁸ Oma nọ ma re ro kpotọ kẹ Ọghẹnẹ u re ru udhedhẹ gbe omofọwẹ jọ ukoko na, je ru nọ eware e rẹ rọ nya kpatiẹ. Oghẹrẹ nọ ahwo Ọghẹnẹ nọ a be romakpotọ kẹe a re ru eware, u re dhesẹ via nọ a be rọ aro kele iei. (1 Kọr. 14:33, 40) Eware nọ ma rọ ẹro ruẹ no evaọ ukoko Jihova e lẹliẹ omai wo ọkpọ iroro Devidi ovie na. Nọ o muẹrohọ ohẹriẹ nọ o rrọ udevie idibo Jihova avọ ahwo omuomu, Devidi ọ tẹ ta avọ oghọghọ nọ: “Jọ eva e were ahwo nọ Jihova ọ rrọ Ọghẹnẹ rai!”​—Ol. 144:15.

⁹ Evaọ orọo gbe uviuwou, “ọnọ o wuzou aye họ ọzae.” Ere ọvona re, ezae a rrọ otọ Kristi, yọ ọnọ o wuzou Kristi họ Ọghẹnẹ. (1 Kọr. 11:3) Eyae e rẹ romakpotọ kẹ ezae rai, emọ a vẹ romakpotọ kẹ esẹgbini rai. (Ẹf. 5:22-24; 6:1) Nọ ahwo uviuwou na kpobi a tẹ be nya lele ọruẹrẹfihotọ uzou-uwo na o rẹ wha udhedhẹ ze.

¹⁰ Ọzae nọ o wuzou uwou na ọ rẹ rọ aro kele Kristi, rehọ edhere oyoyou sẹro uwou riẹ. (Ẹf. 5:25-29) Otẹrọnọ o re dhuaro ho hayo gbabọkẹ owha-iruo riẹ hẹ, o rẹ were aye gbe emọ riẹ re a romakpotọ kẹe. Aye yọ ofiobọhọ, hayo ọnọ o ru ọzae gba. (Emu. 2:18) Nọ ọ tẹ be tha ọzae riẹ uke avọ odiri jẹ be kẹe adhẹẹ, ọzae riẹ o re you rie, ọ vẹ jẹ wha ujiro se Ọghẹnẹ. (1 Pita 3:1-4) Nọ ezae avọ eyae a te bi lele oware nọ Ebaibol ọ ta kpahe ọruẹrẹfihotọ uzou-uwo na, yọ a bi fi oriruo hotọ kẹ emọ rai evaọ omaurokpotọ kẹ Ọghẹnẹ.

¹¹ Omaurokpotọ kẹ Ọghẹnẹ u re je kpomahọ epanọ ma re rri “enọ i wo udu-esuo okpehru,” enọ ‘Ọghẹnẹ o ru nọ a ro wo umutho udu-esuo nọ a wo na.’ (Rom 13:1-7) Ileleikristi yọ ahwo nọ a re koko uzi, a rẹ hwa osa-uzou; a rẹ “hwa eware Siza zihe kẹ Siza, rekọ eware Ọghẹnẹ kẹ Ọghẹnẹ.” (Mat. 22:21) U te no ere no, ọruẹrẹfihotọ nọ a re ru nọ a rẹ rọ jọ ẹkwotọ na ta usi uwoma o rẹ rọwokugbe izi orẹwho rai nọ e ta kpahe oghẹrẹ nọ a re ro mi ohwo evuẹ riẹ gbe oware nọ a rẹ rehọ ai ru hu, evuẹ wọhọ, inọmba ifonu, adrẹse uwou gbe evuẹ itieye na. Fikinọ ma be romakpotọ je yoẹme kẹ enọ a kẹ udu-esuo na evaọ eware kpobi nọ e wọso izi ikiẹrẹe Jihova ha, ma be sae rehọ ẹgba mai kpobi ru iruo usi uwoma ota na.​—Mak 13:10; Iruẹru 5:29.

¹² Omaurokpotọ kẹ ọruẹrẹfihotọ uzou-uwo nọ Ọghẹnẹ o ru na u kiekpahe kabọ kabọ uzuazọ. Ẹrọwọ nọ ma wo u bi ru omai kparo ruẹ okenọ ahwo-akpọ kpobi a te rọ romakpotọ kẹ Jihova Ọghẹnẹ. (1 Kọr. 15:27, 28) Ahwo nọ a vuhumu nọ Jihova họ Osu Ehrugbakpọ na jẹ ruabọhọ be romakpotọ kẹe bẹdẹ bẹdẹ a ti wo eghale buobu gbe aruoriwo Ọghẹnẹ!