ENỌ RỌKẸ AHWO NỌ A GWỌLỌ HỌ-AME
Ẹme Urere nọ A rẹ Ta Kugbe Enọ E Gwọlọ Họ-Ame
A rẹ jọ ikokohọ esese gbe ilogbo Isẹri Jihova họ ahwo ame. Evaọ obọ ekuhọ ẹme ame-ọhọ na, ọnọ o bi ru ẹme na ọ te ta kẹ enọ e be te họ-ame na re a kpama jẹ rọ urru oruarua kuyo enọ ivẹ nana:
1. Kọ who kurẹriẹ no izieraha ra no, roma mudhe kẹ Jihova no, jẹ rọwo nọ ẹkwoma Jesu Kristi o re ro siwi owhẹ?
2. Kọ whọ riẹ nọ ame-ọhọ ra u dhesẹ nọ whẹ yọ omọvo Isẹri Jihova nọ e rrọ ukoko riẹ?
Nọ enọ e be te họ-ame na a te yo Ee fihọ enọ ivẹ nana, u dhesẹ nọ a “whowho via kẹ amọfa” no inọ a fi ẹrọwọ họ ẹtanigbo na jẹ rọ omarai kpobi mudhe kẹ Jihova no. (Rom 10:9, 10) U fo nọ enọ e gwọlọ họ-ame a rẹ romatotọ roro kpahe enọ nana ziezi taure ẹdẹ ame-ọhọ na o te ti te re a sae kuyo wọhọ epanọ a ginẹ rọwo evaọ udu rai.
Kọ whọ roma ra mudhe kẹ Jihova no evaọ olẹ, nọ whọ jọ yaa eyaa nọ ọye ọvo whọ rẹ gọ, gbe nọ oreva riẹ whọ rẹ rọ karo evaọ uzuazọ ra?
Kọ u gine no owhẹ eva ze nọ whọ rẹ họ-ame nọ uvẹ o tẹ nwani rovie fihọ?
Oghẹrẹ ẹgọ vẹ o fo kẹ ame-ọhọ? (1 Tim. 2:9, 10; Jọn 15:19; Fil. 1:10)
U fo nọ ma rẹ gọ ẹgọ nọ ọ rrọ “owowa je dhesẹ nọ [ma] wo iroro nọ e gba” ro dhesẹ nọ ma be “gọ Ọghẹnẹ.” Fikiere, ahwo nọ a be te họ-ame a re ku iwu nọ a rẹ jọ ruẹ oma rai nọ a tẹ ruọ ame no ho, hayo iwu nọ a kere eme hayo drọ eware fihọ họ. Ẹgọ rai ọ rẹ jọ kpatiẹ, fo, jẹ jọ onọ u re kiehọ kẹ ame-ọhọ na.
Uruemu vẹ u fo nọ ohwo o re dhesẹ nọ ọ tẹ be họ-ame? (Luk 3:21, 22)
Oghẹrẹ nọ Jesu ọ rọ họ-ame yọ oriruo nọ Ileleikristi nẹnẹ a rẹ rọ aro kele. Ọ riẹ nọ ame-ọhọ yọ owojẹ ulogbo, yọ onana u dhesẹ oma via evaọ uruemu gbe eware nọ o ru. Fikiere, oria ame-ọhọ na ọ rẹ jọ oria nọ a rẹ jọ ta atahwẹ, zaharo, ya ame, hayo ru oghẹrẹ iruemu efa nọ i re ru ame-ọhọ na fihọ oware evere he; yọ Oleleikristi nọ ọ họ-ame obọ o re ru wọhọ ẹsenọ o wo obokparọ ulogbo jọ no ho. Dede nọ ame-ọhọ yọ oware evawere, ohwo o re dhesẹ evawere na evaọ edhere nọ o kiehọ.
Ẹvẹ iwuhrẹ nọ who re kpohọ ẹsikpobi gbe oma nọ who re kugbe ukoko na o sai ro fiobọhọ kẹ owhẹ ru eyaa nọ whọ yaa okenọ whọ roma mudhe kẹ Jihova gba?
Nọ whọ tẹ họ-ame no, fikieme u ro wuzou re who wo emamọ omaa nọ who re ro ru uwuhrẹ omobọ ra je wobọ ẹsikpobi evaọ usi uwoma ota na?
ITHUBRO RỌKẸ EKPAKO UKOKO
Nọ owhowho-uvie nọ ọ re họ-ame he ọ tẹ ta nọ ọ gwọlọ họ-ame, a rẹ tuduhọ iẹe awọ re ọ romatotọ se jẹ kiẹ “Enọ kẹ Ahwo nọ A Gwọlọ Họ-Ame” na riwi, enọ e rrọ ẹwẹ-obe avọ 185-207 obe nana. A re dhesẹ oria “Ovuẹ Rọkẹ Owhowho-Uvie nọ Ọ re Họ-Ame He” na kẹe, onọ u muhọ evaọ ẹwẹ-obe avọ 182, nọ u dhesẹ epanọ ọ sae rọ ruẹrẹ oma kpahe kẹ ọkiẹriwo nọ ekpako na a ti ru kugbei. Wọhọ epanọ a jọ etẹe ta na, ohwo nọ ọ gwọlọ họ-ame na ọ sae rehọ eme nọ o kere fihọ otọ kugbe kiyo, yọ ọ rẹ sai rovie obe na evaọ oke ọkiẹriwo na. Rekọ, u du gwọlọ nọ ohwo jọ ọ rẹ kiẹ enọ na kugbei no taure ekpako na a tẹ te keria kugbei hi.
Ohwo kpobi nọ ọ gwọlọ họ-ame ọ rẹ vuẹ ọnọ o re koko iruẹru ugboma ekpako na họ. Nọ ohwo nọ ọ ta nọ ọ gwọlọ họ-ame na o te se “Enọ kẹ Ahwo nọ A Gwọlọ Họ-Ame” na no, ọnọ o re koko iruẹru ugboma ekpako na họ ọ te nọ ohwo na sọ ọ roma mudhe kẹ Jihova no evaọ olẹ inọ oreva Riẹ o re ru. Otẹrọnọ ohwo na ọ roma mudhe no, ọnọ o re koko iruẹru ugboma ekpako na họ na o ti ru ọruẹrẹfihotọ re ekpako ivẹ a rehọ “Enọ kẹ Ahwo nọ A Gwọlọ Họ-Ame” na lele ohwo na ta ẹme. A rẹ ghale abọ ivẹ na kẹ ekpako ivẹ. U du gwọlọ nọ a re a woro ẹdẹ okokohọ no taure a tẹ te rehọ enọ nana ro lele ohwo na ta ẹme he.
A rẹ sai ru abọ ivẹ na isiava, yọ abọ ọvuọvo ọ sae rehọ auwa ọvo, rekọ a rẹ sai ru ei vrẹ auwa ọvo otẹrọnọ o gwọlọ ere. A rẹ rehọ olẹ mu abọ kpobi họ jẹ rehọ olẹ kuhọ. Evaọ okenọ a be kiẹ enọ na riwi na, ohwo ọvo ọ rẹ kpakpa ọnọ ọ gwọlọ họ-ame na hayo ekpako na oma re a ru vẹrẹ vẹrẹ hẹ. Ekpako nọ a ta kẹ nọ a ru ọkiẹriwo na a rẹ rọ ọkiẹriwo na karo evaọ omaa rai.
O rẹ mai woma re a rehọ enọ na kiẹ omomọvo nọ ọ gwọlọ họ-ame riwi, orọnikọ a re koko ahwo buobu nọ a gwọlọ họ-ame họ kugbe he. Nọ a tẹ kẹ ohwo nọ ọ gwọlọ họ-ame na uvẹ re ọ kuyo fihọ onọ kpobi, u re fiobọhọ kẹ ekpako na riẹ epanọ otoriẹ ohwo na o kodo te, onọ u re dhesẹ sọ o gine te kẹ ame-ọhọ no. Ofariẹ, u ti ru nọ ohwo na ọ te mae rọ ta oware nọ o rrọ eva riẹ via fikinọ amọfa a rrọ etẹe he. A rẹ sae kiẹ ọzae-avọ-aye kugbe.
Ohwo nọ ọ gwọlọ họ-ame na ọ tẹ rrọ oniọvo-ọmọtẹ, a re ru ọkiẹriwo na evaọ oria nọ amọfa a rẹ jọ ruẹ e rai vevẹ rekọ nọ a rẹ jọ yo ẹme nọ a be ta ha. Nọ o tẹ gwọlọ nọ ọkpako na o re se omọfa kugbe oma, o rẹ jọ ọkpako hayo odibo oruiruo, yọ abọ nọ a be te kiẹriwi a re rri rọ salọ ohwo na, wọhọ epanọ a dhesẹ evaọ edhe-ẹme nọ o lele ọnana.
Evaọ ikoko nọ ekpako e jọ bu tere he, idibo iruiruo nọ i te ziezi je wo orimuo a rẹ sae rehọ enọ nọ e rrọ “Abọ 1: Eware nọ Ileleikristi E Rọwo” rọ kiẹ ahwo nọ a gwọlọ họ-ame riwi. Ekpako ukoko ọvo e rẹ rehọ “Abọ avọ 2: Oghẹrẹ nọ Oleleikristi O re Yeri Uzuazọ” kiẹ ohwo riwi. Otẹrọnọ a jọ ukoko na wo inievo-emezae nọ i te bu tere he, a sae vuẹ ọsẹro okogho na sọ ukoko jọ nọ o kẹle rai o sai fiobọhọ.
Nọ ohwo nọ ọ gwọlọ họ-ame na ọ tẹ rrọ ọmaha, ọsẹ hayo oni hayo ọsẹgboni riẹ nọ e rrọ ukoko na a rẹ jariẹ evaọ okenọ a be kiẹe riwi na. Otẹrọnọ a te sae jariẹ hẹ, ekpako ivẹ (hayo ọkpako gbe odibo oruiruo, otẹrọnọ Abọ 1 na a be kiẹriwi) a rẹ jariẹ evaọ okenọ a be kiẹ abọ ivẹ na riwi.
Ekpako na a te daoma re u mu ae ẹro inọ ohwo nọ ọ gwọlọ họ-ame na o wo otoriẹ igogo iwuhrẹ ọsosuọ Ebaibol na te epanọ o gwọlọ. U te no ere no, a te daoma riẹ sọ uzẹme na u gine tei udu, o te je wo emamọ adhẹẹ kẹ ukoko Jihova. Otẹrọnọ ohwo na o wo otoriẹ igogo iwuhrẹ ọsosuọ Ebaibol na ha, ekpako na a ti ru ọruẹrẹfihotọ nọ a re ro fiobọhọ kẹe re ọ sai te kẹ ame-ọhọ evaọ oke ofa. Rọkẹ efa jọ, o sae gwọlọ nọ a gbẹ kẹ ae oke nọ a re ro dhesẹ via inọ a se usi uwoma ota na gboja hayo a be romakpotọ nya lele eruẹrẹfihotọ ukoko na. Obọ ekpako na o rrọ sọ a rẹ ghale auwa ọvo hayo bu viere nọ a te raha evaọ abọ ọvuọvo na fihọ enọ na evaọ oghẹrẹ nọ o sai ro fiobọhọ kẹ ae ginẹ riẹ sọ ohwo na o te kẹ ame-ọhọ. Dede nọ a sae raha oke fihọ enọ jọ vi ejọ, a rẹ rọ enọ na kpobi kiẹ ohwo na riwi.
Ekpako nọ a ta kẹ na a te keria re a jiroro sọ ohwo na o te kẹ ame-ọhọ hayo o te he nọ a tẹ rọ abọ avọ ivẹ na kiẹ ohwo na riwi no. Ekpako na a ti roro kpahe uyero omomọvo, epanọ ẹgba riẹ o te, gbe eware efa. Ahwo nọ ma gwọlọ họ, enọ e rọ udu rai kpobi kurẹriẹ bru Jihova ze no je wo otoriẹ iwuhrẹ ọsosuọ Ebaibol na vevẹ. Avọ obufihọ rai, ahwo nọ a be te họ-ame na a te sae ruẹrẹ oma kpahe ziezi kẹ iruo usi uwoma ota na nọ i wuzou gaga na.
Kẹsena, ọkpako ọvo hayo aimava nọ a kiẹ ohwo na riwi na a vẹ keria kugbei re a vuẹe sọ o te kẹ ame-ọhọ hayo o te he. Otẹrọnọ ohwo na o te, ekpako na e vẹ rehọ “Ẹme Urere nọ A rẹ Ta Kugbe Ọnọ Ọ Gwọlọ Họ-Ame” na lele iei ta ẹme evaọ ẹwẹ-obe avọ 206-207. Otẹrọnọ ohwo na o ri wuhrẹ obe Reawere Uzuazọ Bẹdẹ Bẹdẹ! na re he, ekpako na a rẹ tuduhọ iẹe awọ re o ru ere nọ ọ tẹ make họ-ame no. Wha vuẹ ohwo nọ ọ be te họ-ame na nọ a ti kere ẹdẹ ame-ọhọ riẹ fihọ Congregation’s Publisher Record riẹ. Kareghẹhọ iẹe nọ ekpako na a re mi ovuẹ omobọ ohwo nana re ukoko na o ruẹse rẹrote iruẹru egagọ Isẹri Jihova evaọ akpọ-soso, gbe re ọ sai wobọ evaọ iruẹru ukoko na, a vẹ jẹ sai fiobọhọ kẹe gọ Ọghẹnẹ ziezi. U te no ere no, ekpako na e rẹ sae kareghẹhọ iwhowho-uvie ekpokpọ inọ evuẹ omobọ ohwo jọ kpobi nọ a rehọ, a rẹ rẹrotei lele epanọ o rrọ Global Data Protection Policy of Jehovah’s Witnesses nọ o rrọ jw.org. U fo nọ ẹkeria nana ọ rẹ vrẹ iminiti ikpe he.
Nọ u te te ukpe ọvo no nọ owhowho-uvie na ọ rọ họ-ame, ekpako ivẹ a rẹ keria kugbei re a tuduhọ iẹe awọ jẹ ta eware nọ e rẹ sai fiobọhọ kẹe. Ọsẹro utu usi uwoma ota riẹ ọ rẹ jọ omọvo ekpako ivẹ na. Otẹrọnọ ohwo nọ ọ họ-ame obọ na yọ ọmaha, ọsẹ hayo oni, hayo ọsẹgboni riẹ a rẹ jọ etẹe. Ẹkeria na ọ rẹ jọ sasasa jẹ jọ oware uduotahawọ. Ekpako na a rẹ ta kpahe ẹnyaharo riẹ evaọ ukoko na jẹ ta kpahe eware nọ i re fiobọhọ kẹe ruabọhọ ewuhrẹ omobọ riẹ, isase Ebaibol ikẹdẹ kẹdẹ, egagọ uviuwou koka koka, iwuhrẹ nọ ọ rẹ nya kẹse kẹse jẹ jarai wobọ, gbe usi uwoma ota koka koka. (Ẹf. 5:15, 16) Otẹrọnọ o ri wuhrẹ obe na, Reawere Uzuazọ Bẹdẹ Bẹdẹ! na re he, ekpako na a re ru ọruẹrẹfihotọ nọ oniọvo jọ o re ro wuhrẹ iẹe. O gwọlọ nọ ekpako na a jiri ei ziezi kẹ omodawọ riẹ. Wọhọ epanọ o rẹ mae jọ na, ohrẹ nọ a rẹ kẹe evaọ oware ovo hayo ivẹ u te.