Ẹkpẹti Onọ

◼ Ẹvẹ owhowho-uvie o re kpohọ usiuwoma gbe ewuhrẹ kri te taure ọ tẹ te họ-ame?

Re ohwo ọ họ-ame yọ iroro-ejẹ nọ e mai wuzou evaọ uzuazọ. Fikiere, taure owhowho-uvie o te ti te kẹ ame-ọhọ, ọ rẹ riẹ oware nọ Ọghẹnẹ ọ gwọlọ mi ei. U te no ere no, o re dhesẹ via inọ ọ be daoma koko izi Ọghẹnẹ.

Ebaibol na ọ ta nọ Ileleikristi a hai kuomagbe ẹsikpobi, fikiere owhowho-uvie nọ ọ re họ-ame he o re dhesẹ nọ o se iwuhrẹ gboja. (Hib. 10:24, 25) Ọ rẹ jẹ hae k’uyo evaọ obọ ewuhrẹ. Ofariẹ, ọ rẹ hai ru ẹme evaọ Isukulu Odibọgba na, rekọ o gbahọ nọ o re ru ẹme taure ọ tẹ họ-ame he.

U te no ere no, nọ o rọnọ Ileleikristi a rẹ ta usiuwoma je ru ilele na, owhowho-uvie nọ ọ re họ-ame he o re kpohọ usiuwoma kẹse kẹse taure ọ tẹ te họ-ame. (Mat. 24:14; 28:19, 20) Bro emerae ọ rẹ jọ owhowho-uvie taure ọ tẹ te họ-ame? O gwọlọ nọ a rẹ kẹe oke nọ o re ro dhesẹ nọ ọ te hae rọ ọwhọ ta usiuwoma na kamara kamara. (Ol. 78:37) Rekọ, onana o nwani dhesẹ nọ ohwo na ọ rẹ ta usiuwoma na oke krẹkri taure ọ tẹ te họ-ame he, o sae rehọ umutho emerae jọ. Bro euwa ọ rẹ niyẹrẹ rai kamara kamara? U wo unu euwa jọ nọ o gbahọ nọ ọ rẹ niyẹrẹ rai hi. Ekpako ukoko a rẹ riẹ epanọ ẹgba owhowho-uvie kpobi o mu.—Luk 21:1-4.

Ekpako ukoko (hayo idibo iruiruo evaọ ukoko nọ ekpako e jọ bu tere he) nọ e be kiẹ ohwo nọ ọ gwọlọ họ-ame riwi a re vuhumu nọ ohwo kpobi ọ rrọ epọvo ho, a rẹ rọ orimuo riẹ sọ ohwo na o te kẹ ame-ọhọ no. A rẹ riẹ sọ ohwo na ọ ginẹ gwọlọ jọ Osẹri Jihova, je dhesẹ nọ o se iwuhrẹ gboja jẹ be hai kpohọ usiuwoma ota ẹsikpobi. Ekpako na a re je vuhumu nọ eriariẹ ohwo na i ri te erọ ohwo nọ ọ họ-ame kri no nọ o wo onaa usiuwoma ota no ho. Otẹrọnọ ekpako na a rri nọ ohwo na o ri te kẹ ame-ọhọ họ, a rẹ rọ unu uwowolẹ dhesẹ kẹ ohwo na no Ebaibol ze oware nọ a ro roro ere, a ve je fi obọ họ kẹe re ọ sai te kẹ ame-ọhọ evaọ oke ofa.