Oware nọ O Via Evaọ Ugbehru Kamẹl

Ivie buobu nọ i je su erua ikpe Izrẹl na a yoma gaga, rekọ ovie jọ nọ a re se Ehab ọ rrọ usu enọ e mai yoma. Ọ rehọ aye nọ ọ geva gaga nọ ọ jẹ gọ ẹdhọ nọ a re se Bale. Odẹ aye na Jezibẹl. Ehab avọ Jezibẹl a te ru ahwo Izrẹl jẹ gọ Bale, yọ a tube kpe eruẹaro Jihova buobu. Kọ eme Jihova o ru? Jihova o te vi ọruẹaro riẹ nọ a re se Elaejah uwou se Ehab.

Elaejah ọ tẹ ta kẹ Ehab nọ fiki eware iyoma nọ o bi ru na, oso ọ te rrọ evaọ Izrẹl he. Fikinọ oso ọ rrọ evaọ ikpe esa gbe ubro soso ho, eware nọ ahwo a kọ i woma ha, ohọo u te je kpe ahwo na. Jihova ọ tẹ wariẹ vi Elaejah bru Ehab. Ehab ọ tẹ ta kẹ Elaejah nọ: ‘Whẹ ohwo oyoma! Whọ wha uye nana kpobi ze.’ Elaejah ọ tẹ ta kẹ Ehab nọ: ‘Mẹ wha uye na ze he. Whọ wha riẹ ze keme whọ be gọ Bale. Ma te dawo oware jọ. Koko orẹwho na soso gbe eruẹaro Bale họ obọ ehru Ugbehru Kamẹl.’

Ahwo na a te gine kokohọ obọ ehru ugbehru na. Elaejah ọ tẹ ta nọ: ‘Wha salọ abọ ohwo nọ wha rrọ. Otẹrọnọ Jihova họ Ọghẹnẹ uzẹme na, wha lele iei. Rekọ otẹrọnọ Bale, wha lele iei. Me se owhai abọ. Jọ eruẹaro Bale nọ i bu te egba ene gbe udhuvẹ-gbikpe (450) a ruẹrẹ idhe rai họ re a bo se ọghẹnẹ rai, mẹ te ruẹrẹ idhe mẹ họ re me bo se Jihova. Ọghẹnẹ nọ o vi erae ze te mahe idhe na họ Ọghẹnẹ uzẹme na.’ Ahwo na kpobi a tẹ rọwo.

Eruẹaro Bale na a tẹ ruẹrẹ idhe rai họ. A te bo se ọghẹnẹ rai no ohiohiẹ rite owọwọ inọ: ‘O Bale, yo kẹ omai!’ Nọ Bale o yo ho, Elaejah o te je se ai ẹkoko. Ọ ta kẹ ai nọ: ‘Wha bo gaga. Ẹsejọhọ ọ rrọ owezẹ, yọ ọ gwọlọ nọ ohwo jọ ọ rọwo iẹe ze.’ Makọ rite owọwọ dede yọ eruẹaro Bale a gbe bi bo. Rekọ Bale ọ kpunu ghele he.

Elaejah ọ tẹ ruẹrẹ idhe riẹ họ agbada-idhe, o te vo ame ku họ ehru idhe na. Kẹsena ọ tẹ lẹ se Jihova nọ: ‘O Jihova, ivie ru re ahwo nana a riẹ nọ whẹ họ Ọghẹnẹ uzẹme na.’ Ẹsiẹvo na, Jihova o te vi erae no obọ odhiwu ze rọ mahe idhe na kpobi. Ahwo na kpobi a te bo nọ: ‘Jihova họ Ọghẹnẹ uzẹme na!’ Elaejah ọ tẹ ta nọ: ‘Wha kru eruẹaro Bale na kpobi, wha jọ ọvuọvo ọ dhẹ vabọ họ!’ Ẹdẹ yena, a te kpe eruẹaro Bale egba ene gbe udhuvẹ-gbikpe (450) na kpobi no.

Nọ Elaejah ọ jọ obọ abade ruẹ ẹgho ọsese jọ, ọ tẹ ta kẹ Ehab nọ: ‘Okposo ọ be tha. Ruọ akẹkẹ ra ovẹrẹ re whọ dhẹ kpo.’ Ehru o te bi, ofou ọgaga o te bi fou, kẹsena okposo o te muhọ ẹrrọ. Ehab ọ jẹ dhẹ akẹkẹ na siawọ gaga, rekọ avọ obufihọ Jihova, Elaejah ọ tẹ rọ owotọ dhẹ siawọ vi akẹkẹ Ehab! Kọ ebẹbẹ Elaejah kpobi i kuhọ no? Ma te ta kpahe onana evaọ uwuhrẹ nọ o rrọ obaro na.