Jihova O Vi Jerimaya Nyai Whowho Ovuẹ Riẹ

Jihova ọ salọ Jerimaya re ọ jọ ọruẹaro evaọ Juda. Jihova ọ ta kẹ Jerimaya nọ o whowho ovuẹ riẹ kẹ ahwo na, re ọ vẹvẹ ai unu inọ a siobọno eware iyoma nọ a bi ru. Jerimaya ọ tẹ ta nọ: ‘Jihova mẹ yọ ọmaha gheghe. Mẹ riẹ ẹme nọ mẹ te ta kẹ ahwo na ha.’ Jihova ọ tẹ ta kẹe nọ: ‘Ozọ u mu owhẹ hẹ. Mẹ te vuẹ owhẹ ẹme nọ whọ te ta. Me ti fiobọhọ kẹ owhẹ.’

Jihova ọ tẹ ta kẹ Jerimaya nọ o koko ekpako ahwo Izrẹl họ, re ọ jọ iraro rai rehọ omothẹ fi otọ, kẹsena ọ vẹ ta kẹ ai nọ: ‘Enẹ ọvona a te raha Jerusalẹm re.’ Nọ Jerimaya o ru epanọ Jihova ọ ta na, eva e tẹ dha ekpako Izrẹl gaga. Ozerẹ jọ nọ a re se Pashọ ọ tẹ tehe Jerimaya, kẹsena ọ tẹ kare iẹe fihọ ure bẹsenọ oke o rọ ke. Nọ oke u rie no, Pashọ o te siobọno Jerimaya. Jerimaya ọ tẹ ta nọ: ‘O bẹ omẹ no. Mẹ gbẹ te ta Ẹme Ọghẹnẹ hẹ.’ Kọ Jerimaya ọ ginẹ siọ Ẹme Ọghẹnẹ ba ẹta? Ijo. Nọ Jerimaya ọ wariẹ roro kpahe onana, ọ tẹ ta nọ: ‘Ovuẹ Jihova o wọhọ erae nọ e be to evaọ udu mẹ. Mẹ rẹ sae siọ Ẹme Ọghẹnẹ ba ẹta ha.’ Jerimaya ọ gbẹ jẹ vẹvẹ ahwo na unu ghele.

Nọ ikpe jọ e vrẹ no, ovie ọkpokpọ ọfa o te muhọ esuo evaọ Juda. Eva Jerimaya e jẹ dha izerẹ gbe eruẹaro erue na fiki ovuẹ nọ o je whowho na. A tẹ ta kẹ ikpahwo-esuo na nọ: “U fo nọ ọzae nana o re whu.” Jerimaya ọ tẹ ta nọ: ‘Wha te kpe omẹ no, yọ wha kpe azẹ ekueku fihọ uzou no. Keme ẹme Jihova mẹ be ta orọnọ ẹme obọmẹ hẹ.’ Nọ ikpahwo-esuo na a yo ẹme nọ Jerimaya ọ ta, a tẹ ta nọ: “Ọzae nana o fo uwhu hu.”

Nọ Jerimaya o bi whowho ovuẹ na, yọ eva e be dha ikpahwo-esuo na gaga. A tẹ ta kẹ ovie na nọ o kpe Jerimaya no. Ovie na ọ tẹ ta kẹ ai inọ a ru Jerimaya oware kpobi nọ a gwọlọ ru ei. Fikiere a te gbolo Jerimaya fihọ oza nọ o vọ avọ ọloho, keme a gwọlọ nọ o whu fihọ etẹe. Jerimaya o te je zue ruọ ọloho na.

Ọzae jọ nọ o bi ru iruo evaọ uwou ovie na nọ a re se Ibẹd-mẹlẹk ọ tẹ ta kẹ ovie na nọ: ‘Ikpahwo-esuo na a gbolo Jerimaya fihọ oza! Ma tẹ nyase iẹe ba etẹe o ti whu.’ Ovie na ọ tẹ kẹ Ibẹd-mẹlẹk udu inọ ọ rehọ ezae ọgba (30) lele oma re a nyai si Jerimaya no eva oza na ze. Kọ u gbe woma re ma jọ wọhọ Jerimaya, ọnọ ọ kuvẹ re oware ovo o whaha iẹe Ẹme Ọghẹnẹ ọta ha?