Wuhrẹ Emọ Ra

Jerimaya O Si Uke Kpemu Hu

KỌ OWARE jọ u ru udu whrehe owhẹ ẹdẹjọ no te epanọ whọ rọ gwọlọ kpairoro vrẹ oware nọ who je ru?—a Onana o rẹ via kẹ ahwo buobu. O via kẹ Jerimaya okenọ ọ jọ uzoge. Ghele na, ọ kẹ uvẹ hẹ re eme iyoma amọfa hayo eware iyoma nọ a ru rie o lẹliẹe si uke kpemu. Joma ta ẹme kpahe epanọ Jerimaya ọ rọ jọ ohwo nọ Ọghẹnẹ o you gaga, dedena o jariẹ oma ẹsejọ inọ o re si uke kpemu no iruo nọ a kẹ riẹ.

Taure a te ti yẹ Jerimaya, Jihova, Ọghẹnẹ uzẹme na, ọ salọ e riẹ inọ ọ te jọ ọruẹaro riẹ nọ ọ te vẹvẹ ahwo unu kpahe eware iyoma nọ a je ru. Kọ whọ riẹ oware nọ Jerimaya ọ vuẹ Jihova nọ ọ rro ze no?— Ọ ta nọ: “Mẹ riẹ ẹme ẹta ha, keme mẹ ọmaha.”

Didi uyo who roro nọ Jihova ọ kẹ Jerimaya?— Ọ rọ ẹwo kẹe imuẹro inọ: ‘Whọ ta nọ, Mẹ ọmaha ha; ahwo nọ me reti vi owhẹ bru kpobi whọ rẹ te nya bruẹ, gbe onọ mẹ ta kẹ owhẹ kpobi whọ rẹ ta. Whọ jọ ozọ u mu owhẹ hẹ.’ Fikieme? Jihova ọ ta nọ: “Mẹ rọ kugbe owhẹ nọ mẹ rẹ te thọ owhẹ.”—Jerimaya 1:4-8.

Ghele na, wọhọ epanọ ma ta no vẹre na, nọ oke jọ o vrẹ no, udu u whrehe Jerimaya. Ẹkoko nọ a je sei fiki iruo Ọghẹnẹ nọ o je ru o wha onana ze. Ọ ta nọ: ‘Ahwo kpobi a be hwẹ omẹ ẹsikpobi, je bi se omẹ ẹkoko.’ Fikiere, ọ tẹ jiroro inọ ọ rẹ siọ iruo na ba. Ọ ta nọ: ‘Me gbe ti se odẹ Jihova ha, hayo mẹ te gbẹ ta ẹme te odẹ riẹ vievie he.’ Kọ o gine ru ere?

Jerimaya ọ ta nọ: ‘Ẹme Jihova ọ tẹ jọ evaọ eva mẹ wọhọ erae nọ e rẹ tuọ wariẹ igbenwa mẹ, mẹ gbẹ sai wo ogaga nọ mẹ rẹ rọ whaha iẹe he.’ (Jerimaya 20:7-9) Dedenọ ozọ u mu Jerimaya ẹsejọ, uyoyou nọ o wo kẹ Jihova u ru nọ ọ gbẹ nya siọ iruo riẹ ba ha. Joma ruẹ epanọ Jihova ọ rọ thọ Jerimaya fikinọ ọ dadamu iruo nọ ọ kẹ riẹ.

Jihova ọ vuẹ Jerimaya nọ ọ vẹvẹ ahwo unu inọ a te raha Jerusalẹm a gbe si obọ no eyoma rai hi. Nọ Jerimaya o whowho unuovẹvẹ yena kẹ ahwo na, eva e dha rae, a tẹ ta nọ: “Ohwo nana o te ohwo nọ a re bruoziẹ uwhu kpe.” Rekọ Jerimaya ọ ta kẹ ae nọ a “yo uru ỌNOWO” na. Ọ tẹ jẹ ta nọ: ‘Wha vuhu onana mu, nnọ, wha te kpe omẹ, yọ wha kpe azẹ ọhaha, keme ỌNOWO na o vi omẹ nọ mẹ ta eme enana kẹ owhai.’ Kọ whọ riẹ oware nọ o via uwhremu na?—

Ebaibol e ta nọ: “Emọ ivie na avọ ahwo na kpobi a tẹ ta kẹ izerẹ na gbe eruẹaro na, nnọ, ‘Ohwo ọnana, ọ reabe uwhu hu, keme evaọ odẹ ỌNOWO Ọghẹnẹ mai ọ rọ ta eme nana kẹ omai.’” Whọ ruẹ, fikinọ Jerimaya ọ kuvẹ re ozodhẹ o lẹliẹe si uke kpemu hu, Jihova ọ thọ riẹ. Rekọ joma ruẹ oware nọ o via kẹ Yuraija, ọruẹaro Jihova ọfa nọ ọ jẹ oghẹrẹ owọ sa.

Ebaibol e ta inọ: ‘Yuraija ọ ruẹaro kpahe Jerusalẹm wọhọ epanọ Jerimaya o ru re na.’ Rekọ nọ eva e dha Jehoakim ovie na kpahe Yuraija, kọ whọ riẹ oware nọ Yuraija o ru?— Ozọ u mu rie, ọ tẹ siọ iruo nọ Ọghẹnẹ ọ kẹ riẹ ba, ọ jẹ dhẹ kpohọ Ijipti. Fikiere, ovie na o te vi ahwo kpobọ Ijipti nyae gwọlọ Yuraija mu. Nọ a mu ei ze no, kọ whọ riẹ oware nọ ekpehre ovie na o ru?— Ọ tẹ rehọ ọgbọdọ kpe Yuraija!—Jerimaya 26:8-24.

Eme who roro nọ o wha riẹ ze nọ Ọghẹnẹ ọ rọ thọ Jerimaya rekinọ ọ gbẹ rọ thọ Yuraija ha?— Ẹhẹ, o sae jọnọ ozọ u mu Jerimaya wọhọ epanọ ozọ u mu Yuraija re na, rekọ Jerimaya ọ siọ iruo Jihova ba hayo dhẹ hẹ. Ọ dadamu iruo na. Eme who roro nọ ma rẹ sai wuhrẹ no oriruo Jerimaya na ze?— O rẹ sae jọ bẹbẹ ẹsejọ re ma ru oware nọ Ọghẹnẹ ọ ta, rekọ u fo re ma fi eva họ iẹe je yoẹme kẹe ẹsikpobi.

[Oruvẹ-obotọ]

Enọ:

○ Didi iruo Ọghẹnẹ ọ salọ Jerimaya kẹ?

○ Fikieme o rọ jọ Jerimaya oma ẹsejọ inọ ọ rẹ siọ iruo Ọghẹnẹ ba?

○ Fikieme Ọghẹnẹ ọ rọ thọ Jerimaya, nọ ọ gbẹ rọ thọ Yuraija ha?

○ Eme who wuhrẹ no oriruo Jerimaya ze?