Emezae Ene nọ I Yoẹme kẹ Jihova

Nọ Nebukadneza o mu ikpahwo-esuo Juda kpobọ Babilọn, ọ tẹ ta kẹ oletu riẹ jọ nọ a re se Ashpenaz inọ ọ rẹrote ai. Nebukadneza ọ ta kẹ Ashpenaz nọ a jọ usu ikpahwo-esuo na gwọlọ izoge emezae nọ e mae goma gbe enọ e rrọ sasasa. Kẹsena a ve wuhrẹ ai evaọ ikpe esa soso, re a sae jọ ọgwa ovie Babilọn ru iruo. Ovie na ọ gwọlọ nọ a re wuhrẹ izoge emezae nana epanọ a re se, kere, jẹ ta ẹvẹrẹ Babilọn nọ a re se Akadia. Ovie na ọ tẹ jẹ gwọlọ nọ emezae nana a rẹ re oghẹrẹ emu ọvona nọ ovie na gbe iletu riẹ a rẹ re. Usu emezae nana jọ họ Daniẹl, Hananaya, Mishẹl, gbe Azaraya. Ashpenaz o te mu edẹ Babilọn kẹ ai: Bẹltẹshaza, Shedrak, Mishak, gbe Abẹdnigo. Kọ ewuhrẹ ọnana o ti ru ai siọ Jihova ba ẹgọ?

Emezae ene nana a gba riẹ mu nọ Jihova ọvo a rẹ gọ. A riẹ nọ u fo vievie he re a re emu ovie na, keme Uzi Jihova o ta nọ emu na jọ ọ fo ho. Emezae ene na a tẹ ta kẹ Ashpenaz inọ: ‘Ivie whọ kẹ omai emu ovie na ha.’ Ashpenaz ọ tẹ ta kẹ ai nọ: ‘Wha gbẹ re emu ovie na ha, ovie na ọ tẹ ruẹ nọ wha dọ fihọ, o ti kpe omẹ no!’

Oware jọ o tẹ ziọ Daniẹl iroro. Ọ tẹ ta kẹ ọnọ ọ be rẹrote ai na inọ: ‘Ivie kẹ omai ẹbe gbe ame ọvo evaọ edẹ ikpe. Kẹsena whọ vẹ rọ oma mai wawo oma emezae nọ e be re emu ovie na.’ Ọnọ ọ be rẹrote ai na ọ tẹ ginẹ rọwo.

Nọ edẹ ikpe e gba no, oma Daniẹl avọ egbẹnyusu esa riẹ nọ i kiọkọ, o poriẹ vi orọ emezae nọ e re emu ovie na. Eva e were Jihova gaga inọ Daniẹl avọ emezae esa nọ i kiọkọ a yoẹme kẹe. Jihova ọ tubẹ kẹ Daniẹl areghẹ nọ o re ro wo otoriẹ eruẹaruẹ gbe ewezẹ dede.

Nọ ewuhrẹ na o kuhọ no, Ashpenaz ọ tẹ rehọ emezae na kpobi se Nebukadneza. Nọ ovie na o lele ai ta ẹme ọ tẹ ruẹ nọ, Daniẹl, Hananaya, Mishẹl, gbe Azaraya a wo areghẹ vi emezae nọ i kiọkọ kpobi, a tẹ jẹ rrọ poriẹporiẹ. Ovie na ọ tẹ salọ ai imane na re a jọ evaọ ọgwa ovie na ru iruo. Ovie na ọ jẹ hae nọ ae kpahe epanọ a roro nọ ọ tẹ gwọlọ ru oware jọ nọ u wuzou. Jihova ọ kẹ rai areghẹ nọ o vi ọrọ ezae iwareghẹ gbe utu emajiki ovie na.

Dede nọ Daniẹl, Hananaya, Mishẹl, gbe Azaraya a jọ obọ Babilọn, a gbẹ jẹ kareghẹhọ inọ ae omarai yọ idibo Jihova. Kọ whọ te kareghẹhọ Jihova nọ ọsẹgboni ra a gbẹ rrọ kugbe owhẹ hẹ?